ޓީވީތަކުން ފެންނަމުންދާ ލާއިންސާނީ މަންޒަރުތަކަށް ފަހު އިޒްރޭލަށް ތާއީދުކުރާނީ ކާކުތޯ ސުވާލުކުރައްވައި، އެމްޑީޕީން އަބަދުވެސް ތިބޭނީ ފަލަސްތީނާއެކު ކަމަށް ކުރީގެ ރައީސް މުހައްމަދު ނަޝީދު ވިދާޅުވުމާއެކު، ސިޔާސީ މަސްރަހުގައި ގިނަ ބައެއްގެ ސަމާލުކަން ހުއްޓިއްޖެއެވެ.
މި ވާހަކަތަކަށް ސަމާލުކަން ހުއްޓުނީ، މީގެ ކުރިން އިޒްރޭލާ ގުޅޭގޮތުން އެމަނިކުފާނު ދައްކަވާފައިވާ ވާހަކަތަކާއި، ގެންގުޅުއްވި ސިޔާސަތުތަކާ މިހާރުގެ ވާހަކަތަކާ ހުރި ފަރަގުގެ ސަބަބުންނެވެ. ހާއްސަކޮށް، ދީނީ ހަރުކަށި ފިކުރާ ދެކޮޅަށް "އޯލްޓަނޭޓިވް ނެރޭޓިވް" ނުވަތަ ތަފާތު ނަޒަރިއްޔާތަކުން ވިސްނުމަށް މީގެ ކުރިން އެމަނިކުފާނު ބާރުއަޅުއްވާފައި އޮތުމަކީ މި ބަހުސްގެ މުހިންމު އެއް ނުކުތާއެވެ.
އެމްޑީޕީގެ ހަރުގޭގައި ބޭއްވި ޖަލްސާއެއްގައި ވާހަކަދައްކަވަމުން ނަޝީދު ވިދާޅުވި ގޮތުގައި، އިޒްރޭލު ސަރުކާރުގެ ލާއިންސާނީ އަމަލުތައް ފެންނަމުންދާއިރު އެ ގައުމަށް އެމްޑީޕީ ހިމެނޭ ގޮތަށް އެއްވެސް ބަޔަކު ތާއީދު ނުކުރާނެއެވެ. އަދި އެ ޕާޓީ އަބަދުވެސް ދެމިއޮންނާނީ މިނިވަންކަމަށް ވަކާލާތުކުރާ ފަލަސްތީނުގެ ރައްޔިތުންނާއެކު ކަމަށް އެމަނިކުފާނު ވިދާޅުވިއެވެ. މި މޭރުމުން ނަޝީދު ވާހަކަދެއްކެވީ، މިނިވަން ދުވަހުގެ ރަސްމީ ޖަލްސާގައި ރައީސް ޑރ. މުހައްމަދު މުއިއްޒު ދެއްކެވި ވާހަކަފުޅަކަށް ދެއްވި ނުސީދާ ރައްދެއްގެ ގޮތުގައެވެ.
ރައީސް މުއިއްޒުގެ ތުހުމަތާއި ނަޝީދުގެ ރައްދު
ޖުލައި 26 ވަނަ ދުވަހު ބޭއްވި ޖަލްސާގައި ރައީސް މުއިއްޒު ވިދާޅުވި ގޮތުގައި، މީގެ ކުރިން އެމްޑީޕީގެ ވެރިކަން ރާއްޖޭގައި ހިނގި ކޮންމެ ފަހަރަކު ފެނިގެންދިޔައީ "ޕްރޯ އިޒްރޭލް" ނުވަތަ އިޒްރޭލަށް ތާއީދުކުރާ ހާރިޖީ ސިޔާސަތެއް ތަންފީޒުކުރި މަންޒަރެވެ. އަދި އޭގެ ސަބަބުން އަރަބި އިސްލާމީ ގައުމުތަކާ ރާއްޖެ ދުރުވެގެންދިޔަ ކަމަށް ރައީސް މުއިއްޒު ފާހަގަ ކުރެއްވިއެވެ.
މި ކަމަށް ރައްދު ދެއްވަމުން ނަޝީދު ވަނީ ރައީސް މުއިއްޒަށް ބޮޑެތި ތުހުމަތުތަކެއް ކުރައްވާފައެވެ. ނަޝީދު ވިދާޅުވި ގޮތުގައި، އީރާނާ ހަނގުރާމަ ފެށުނު ދުވަސްވަރު، ސައޫދީ އަރަބިއްޔާ، ގަތަރު، ބަހުރައިން، ކުވެއިތު އަދި ޔޫއޭއީ ފަދަ ގަލްފުގެ ގައުމުތަކަށް ބޮން އަޅައި ހަލާކުކޮށްލަން މުއިއްޒު ވަނީ ގޮވާލައްވާފައެވެ. ރާއްޖޭގެ ތަރައްގީއަށް އެންމެ ބޮޑަށް އެހީތެރިވާ ގައުމުތަކަކީ އެއީ ކަމަށްވާއިރު، އެފަދަ ގޮވާލުމެއްގެ ސަބަބުން ދިވެހި ރައްޔިތުންނަށާއި މުޅި ގައުމަށް ލިބޭނީ ގެއްލުން ކަމަށް ނަޝީދު ފާހަގަކުރެއްވިއެވެ.
ނަމަވެސް ނަޝީދު އެ އިޝާރާތް ކުރައްވާ ވާހަކަފުޅަކީ ޕްރެސްކޮންފަރެންސެއްގައި ނޫސްވެރިއަކު ކުރި ސުވާލަކަށް ދެއްވި ޖަވާބުގައި، އީރާނުން ހަމަލާ ދޭނަމަ ސީދާ އިޒްރޭލާއި އެމެރިކާގެ ތަންތަނަށް ހަމަލާދިނުން ރަނގަޅު ކަމަށް މުއިއްޒު ވިދާޅުވި ވާހަކަފުޅެކެވެ. އެވާހަކަފުޅުގައި ނަޝީދު އެ ވިދާޅުވާ ގޮތަށް ސައޫދީ އަރަބިއްޔާ، ގަތަރު، ބަހުރައިން، ކުވެއިތު އަދި ޔޫއޭއީ ފަދަ ގަލްފުގެ ގައުމުތަކަށް ބޮން އަޅައި ހަލާކުކޮށްލަން މުއިއްޒު ވިދާޅުވެފައެއް ނުވެއެވެ.
ނަޝީދުގެ ކުރީގެ ސިޔާސަތު
ނަޝީދު މިހާރު ފަލަސްތީނުގެ ދިފާއުގައި ވަރުގަދައަށް ވާހަކަދެއްކެވި ނަމަވެސް، މީގެ ކުރިން އެމަނިކުފާނު ދައްކަވާފައިވާ ވާހަކަތަކާއި އަމަލުތަކާ މެދު ގިނަ ބަޔަކު ސުވާލު އުފައްދައެވެ. މީސްމީޑިއާގައި އާންމުވެފައިވާ ބައެއް ވީޑިއޯތަކުގައި، ދީނީ ހަރުކަށިފިކުރާ ގުޅޭގޮތުން ވާހަކަދައްކަވަމުން ނަޝީދު ވަނީ "އޯލްޓަނޭޓިވް ނެރޭޓިވް" އެއް ނުވަތަ އާންމުކޮށް ގަބޫލުކުރާ ގަބޫލުކުރުންތަކާ ތަފާތު ނަޒަރިއްޔާއަކުން ކަންކަމަށް ބެލުމުގެ މުހިންމުކަމަށް އިޝާރާތް ކުރައްވާފައެވެ.
2008 އިން 2012 އަށް އޮތް އެމްޑީޕީގެ ފުރަތަމަ ސަރުކާރުގައި، ރާއްޖެއާއި އިޒްރޭލާ ދެމެދު އޮތް ގުޅުން ވަރަށް ބޮޑަށް ބަދަހިކުރިއެވެ. އެގޮތުން، އިޒްރޭލުގެ ސިއްހީ މާހިރުންގެ ޓީމުތައް ރާއްޖެ ގެނައުމާއި، ދަނޑުވެރިކަމުގެ ދާއިރާއިން އެހީތެރިކަން ހޯދުމުގެ އެއްބަސްވުންތަކުގައި ސޮއިކުރުން ހިމެނެއެވެ. މީގެ އިތުރުން، އިޒްރޭލުގެ ގައުމީ އެއާލައިން ކަމަށްވާ "އެލް އަލް" ގެ ދަތުރުތައް ރާއްޖެއަށް ފެށުމާ ގުޅޭގޮތުންވެސް އޭރު މަޝްވަރާ ކުރިއެވެ. ރައީސް މުއިއްޒު އިޝާރާތްކުރެއްވި "ޕްރޯ އިޒްރޭލް" ސިޔާސަތަކީ މިއީ ކަމަށް ބެލެވެއެވެ.
ސިޔާސީ ބަޔާންތަކުގެ ފަރަގު
ސިޔާސީ މާހިރުން ފާހަގަކުރާ ގޮތުގައި، ވެރިކަމުގައި ތިބޭއިރު ގެންގުޅޭ ހާރިޖީ ސިޔާސަތާއި، އިދިކޮޅުގައި ތިބޭއިރު ދައްކާ ވާހަކަތަކާ ދެމެދު ބޮޑެތި ފަރަގުތަކެއް ހުރުމަކީ ރާއްޖޭގެ ސިޔާސީ މަސްރަހުގައި އާންމު ކަމެކެވެ. އެމްޑީޕީ ވެރިކަމުގައި އޮތްއިރު އިޒްރޭލާއެކު ގުޅުން ބަދަހިކުރަން މަސައްކަތްކުރީ، ބައިނަލްއަގުވާމީ މުޖުތަމައުގައި ރާއްޖެއަކީ ހުޅުވިފައިވާ، މެދުމިނުގެ ސިޔާސަތެއް ގެންގުޅޭ ގައުމެއްގެ ގޮތުގައި ދެއްކުމުގެ ބޭނުމުގައި ކަމަށް އޭރުގެ ސަރުކާރުން ވަނީ ބުނެފައެވެ.
ނަމަވެސް، މިހާރު ގާޒާގައި ހިނގަމުންދާ ހަނގުރާމައާއި، އީރާނަށް އިޒްރޭލުން ދެމުންދާ ހަމަލާތަކާ ގުޅިގެން ދިވެހި ރައްޔިތުންގެ މެދުގައި އޮތް ނުތަނަވަސްކަމާއި ރުޅިވެރިކަން ވަރަށް ބޮޑެވެ. މިފަދަ ދަނޑިވަޅެއްގައި، އެއްވެސް ސިޔާސީ ޕާޓީއަކަށް އިޒްރޭލަށް ތާއީދުކުރާކަން ހާމަކުރުމަކީ ސިޔާސީ ގޮތުން ބޮޑު ގެއްލުމަކާ ކުރިމަތިލާން ޖެހޭނެ ކަމެކެވެ. އެގޮތުން، ނަޝީދުގެ ރާގު މިހާރު ބަދަލުކުރައްވާފައި ވަނީ ކަމުގައި ބައެއް ފަރާތްތަކުން ގަބޫލު ކުރެއެވެ.
އިޒްރޭލާ މެދު ގެންގުޅޭ ސިޔާސަތުގެ މައްސަލައަކީ ރާއްޖޭގެ އެތެރޭގެ ސިޔާސީ ކޯޅުންތަކުގައި އަބަދުވެސް ބޭނުންކުރާ ހަތިޔާރެކެވެ. އެމްޑީޕީން އިޒްރޭލަށް ތާއީދު ނުކުރާނެ ކަމަށް ނަޝީދު ވިދާޅުވިއިރު، މާޒީގައި އެމަނިކުފާނު ގެންގުޅުއްވި "އޯލްޓަނޭޓިވް ނެރޭޓިވް" ގެ ވިސްނުމާއި، އޭރުގެ ސަރުކާރުން އެޅި ފިޔަވަޅުތަކަކީ ސިޔާސީ ވާދަވެރިން އަބަދުވެސް އެމަނިކުފާނާ ދެކޮޅަށް ބޭނުންކުރާނެ ކަންކަމެވެ. އަނެއްކޮޅުން، ގަލްފުގެ ގައުމުތަކާ ގުޅޭގޮތުން ނަޝީދު ކުރެއްވި ތުހުމަތުތަކަކީވެސް، ހާރިޖީ ސިޔާސަތުގެ މައްސަލަތައް އެތެރޭގެ ސިޔާސީ ބޭނުންތަކަށް ބޭނުންކުރަމުންދާ ކަމުގެ މިސާލެކެވެ.
