ރަސްމާލެ މަޝްރޫއުގެ ދަށުން ބިން ކުއްޔަށް ދޫކުރުމާ ގުޅޭގޮތުން ކުރީގެ ރައީސް އަބްދުﷲ ޔާމީން ދެއްކެވި ވާހަކަފުޅުތަކަށް ރައްދު ދެއްވައި، ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކުރީ ހުދު ރައީސް ޔާމީންގެ ވެރިކަމުގައި ކަމަށް ބަންޑާރަ ނައިބު އަހްމަދު އުޝާމް ވިދާޅުވެއްޖެއެވެ.
އުޝާމް މިހެން ވިދާޅުވީ، ރަސްމާލޭގައި 20 ބިލިއަން ޑޮލަރުގެ ވޯޓާ ފްރަންޓު މެރީނާއެއް ތަރައްގީކުރުމަށް ޔޫއޭއީގެ އީގަލް ހިލްސް ކުންފުންޏަށް 500 ހެކްޓަރުގެ ބިން 99 އަހަރަށް ދޫކުރަން ނިންމާފައިވާ ކަމަށް ބުނެ، ޕީއެންއެފްގެ ޖަލްސާއެއްގައި ރައީސް ޔާމީން ސަރުކާރަށާއި ބަންޑާރަ ނައިބަށް ވަރަށް ބޮޑަށް ފާޑުވިދާޅުވުމާ ގުޅިގެންނެވެ.
މިކަމާ ގުޅިގެން ބަންޑާރަ ނައިބު އަހްމަދު އުޝާމް ވިދާޅުވީ، ރައީސް ޔާމީން މިއަދު އެކަން ހަނދުމަފުޅު ނެތީ ކަމަށް ވެދާނެ ކަމަށެވެ. އެގޮތުން ރާއްޖޭގައި އެންމެ ފުރަތަމަ ޓޫރިޒަމާ ބެހޭ ގާނޫނެއް 1999 ވަނަ އަހަރު އެކުލަވާލިއިރު، ރިޒޯޓުތައް ކުއްޔަށް ދޫކުރަމުން އައީ ގިނަވެގެން 25 އަހަރަށް ކަމަށާއި، 2010 ވަނަ އަހަރު ރައީސް މުހައްމަދު ނަޝީދުގެ ވެރިކަމުގައި ގެނައި އިސްލާހަކުން އެ މުއްދަތު 50 އަހަރަށް އިތުރުކުރި ކަމަށް އުޝާމް ފާހަގަކުރެއްވިއެވެ. އަދި އެ މުއްދަތު 99 އަހަރަށް އިތުރުކޮށް ގާނޫނު އިސްލާހުކުރީ 2015 ވަނަ އަހަރު ރައީސް ޔާމީންގެ ވެރިކަމުގައި ކަމަށް އޭނާ ވިދާޅުވިއެވެ.
މީގެ އިތުރުން ޓޫރިޒަމާބެހޭ ގާނޫނުގެ 8 ވަނަ މާއްދާގައި ބަޔާންކޮށްފައިވާ ގޮތުން، ޓޫރިސްޓް ރިޒޯޓެއް ކުއްޔަށް ދޫކޮށްފައިވާ 99 އަހަރުގެ މުއްދަތު ހަމަވުމުން، އެރަށެއްގައި ކޮށްފައިވާ އިންވެސްޓްމަންޓެއްގެ އަގުން ދަރަންޏަށް ކެނޑުމަށްފަހު ބާކީވާ އަގު އިންވެސްޓްކޮށްފައިވާ ފަރާތަށް ސަރުކާރުން ދައްކަންޖެހޭކަން ވެސް އުޝާމް ފާހަގަކުރެއްވިއެވެ.
ނަމަވެސް، ރަސްމާލޭގައި ހިންގުމަށް ރާވާފައިވާ މަޝްރޫއަކީ މުޅިން ތަފާތު މަޝްރޫއެއްކަން ފާހަގަކުރައްވަމުން ބަންޑާރަ ނައިބު ވިދާޅުވީ، އެ މަޝްރޫއު ގަވަން ކުރާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން ކަމަށެވެ. އަދި މި މަޝްރޫއާ ގުޅިގެން މިހާތަނަށް ސޮއިކޮށްފައި ވަނީ ހަމައެކަނި ލެޓާ އޮފް އިންޓެންޓް އެއްގައި ކަމަށާއި، އަމަލީ މަސައްކަތް ފެށުމުގެ ކުރިން އެ އެއްބަސްވުމުގެ ޓާމްސްތަކަށް އިތުރަށް މަޝްވަރާކޮށް ޑެފިނިޓިވް އެގްރީމެންޓްތަކެއް އެކުލަވާލުމުގެ އިތުރުން، މިކަމާ ގުޅޭ ގާނޫނުތައް ރައްޔިތުންގެ މަޖިލީހުން ފާސްކުރަންޖެހޭނެ ކަމަށް އުޝާމް ވިދާޅުވިއެވެ. އޭނާ ވަނީ މި މަޝްރޫއު ކުރިއަށް ގެންދިއުމުގައި ގާނޫނުއަސާސީއާއި ގާނޫނުތަކާ ހިލާފު އެއްވެސް ކަމެއް ސަރުކާރުން ނުކުރާނެ ކަމުގެ ޔަގީންކަން ދެއްވާފައެވެ.
ރޭ ބޭއްވި ޕީއެންއެފް ޖަލްސާގައި ރައީސް ޔާމީން ވަނީ، ރަސްމާލެ މަޝްރޫއު މިހާރުން މިހާރަށް ހުއްޓާލުމަށް ގޮވާލައްވާފައެވެ. އަދި 99 އަހަރަށް ބިން ދިނުމަކީ ތަން ދާއިމީކޮށް ވިއްކާލުން ފަދަ ކަމެއް ކަމަށާއި، މި ސަރުކާރު ބަދަލުވުމާއެކު އެ އެއްބަސްވުން ބާތިލުވާނެ ކަމަށް ވިދާޅުވިއެވެ.
ރަސްމާލެއަކީ ރައްޔިތުންގެ ފައިސާއިން ހިއްކާ ތަނަކަށްވާތީ، މިފަދަ ބޮޑު މަޝްރޫއެއް ހިންގަންވާނީ މަޖިލީހުގެ ލަފަޔާއި ރައްޔިތުންގެ ފެންނަ ނުފެންނަ ވޯޓަކުން ކަމަށާއި، މިކަމުގައި ގާނޫނާ ހިލާފުވާނަމަ ރައީސް ޑރ. މުހައްމަދު މުއިއްޒުގެ އިތުރުން އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްޠަލިބާއި ބަންޑާރަ ނައިބު އަހްމަދު އުޝާމް ވެސް ވެރިކަން ނިމުމުން ގާނޫނުގެ ކުރިމަތީގައި ޖަވާބުދާރީވާން ޖެހޭނެ ކަމަށް ޔާމީން ވިދާޅުވެފައިވެއެވެ.
