ބަންޑާރަ މިސްކިތް ހުރި ތަނުގައި ޒަމާނީ މިސްކިތެއް ހަދާއިރު އެތަނުގެ ތާރީހީ ހައިސިއްޔަތު ނުގެއްލޭނެހެން ހެދިދާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޝަހީމް މިހެން ވިދާޅުވެފައި ވަނީ، ބަންޑާރަ މިސްކިތް ހުރި ތަނުގައި ޒަމާނީ މިސްކިތެއް އަޅަން ނިންމާފައިވާ ކަން އިއުލާން ކުރެއްވުމުން އެކަމާ ގުޅިގެން ގިނަ ބައެއްގެ ކަންބޮޑުވުން އަމާޒުވުމާ ގުޅިގެންނެވެ. އެގޮތުން ތާރީހީ ކަންކަން ދިރާސާ ކުރަމުން އަންނަ ނާޖިހް ދީދީ މިކަމަށް ފާޑުވިދާޅުވުމުން ޝަހީމް ވަނީ ރައްދެއް ދެއްވާފައެވެ. ޝަހީމް ވިދާޅުވީ، އެ މިސްކިތް ބިނާ ކުރާއިރު ތާރީހީ ހައިސިއްޔަތު ނުގެއްލޭނެހެން އެތަން ހެދޭނެ ކަމަށާއި ހަރަމްފުޅާއި މަސްޖިދުއް ނަބަވީވެސް ބޮޑު ކުރަނީ އެގޮތަށް ކަމަށެވެ. އަދި ޝަހީމް ވަނީ ނާޖިހް މެންގެ ވިސްނުމުން މައްސަލައެއް އޮތް ކަމަށް ވިދާޅުވެފައެވެ.
ބަންޑާރަ މިސްކިތް ހުރި ބިމުގައި އާ މިސްކިތެއް އަޅަން ނިންމައި ޝަހީމް ކުރެއްވި ޕޯސްޓްުގައި ވިދާޅުވެފައި ވަނީ، މި ރޯދަ މަސް ނިމުމުން އެ މިސްކިތް ހުރި ތަނުގައި ޒަމާނީ މިސްކިތެއް އެޅުމުގެ މަސައްކަތް ފެށުމަށް ހަމަޖެހިފައިވާ ކަމަށެވެ. އެކަމަށް ބޭނުންވާ ދީލަތި އެހީވެސް ހަމަޖެހިފައިވާ ކަމަށާއި މިއާއެކު މާލޭގެ ހުރިހާ ބޮޑެތި މިސްކިތްތައް އާވެގެން ދާނެ ކަމަށް ޝަހީމް ވިދާޅުވިއެވެ.
ބަންޑާރަ މިސްކިތް ތަޅާލައި އެތަނުގައި އާ މިސްކިތެއް އަޅަން އުޅޭކަން އިއުލާން ކުރިތާ 6 ގަޑިއިރު ވީ އިރު މިކަމާ ގުޅިގެން ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ. އެގޮތުން ކުރީގެ ހެރިޓޭޖް މިނިސްޓަރު އަދި ކުރީގެ ރައީސް މައުމޫން އަބްދުލް ގައްޔޫމްގެ ދަރިކަލުން ޔުމްނާ މައުމޫން މިކަމާ ގުޅިގެން ވިދާޅުވެފައި ވަނީ، މިއީ އެއްގޮތަކަށް ވެސް ކޮށްގެންވާނެ ކަމެއް ނޫން ކަމަށެވެ. މިއީ 98 އަހަރުވެފައިވާ މާލޭގެ މުހިންމު ތާރީހީ މިސްކިތެއް ކަމަށާއި ރާއްޖޭގެ މި ފަދަ ތާރީހީ ބިނާތަކާއި ސަގާފީ ތަރިކަ ރައްކާތެރި ކުރުމަށް ސަގާފީ ތަރިކަ ގާނޫނެއް ހަދައި ތަސްދީގްކޮށްފައި ވާނެ ކަމަށް އޭނާ ވިދާޅުވިއެވެ.
މިކަމާ ގުޅިގެން ނާޖިހް ވިދާޅުވެފައި ވަނީ، ބަންޑާރަ މިސްކިތަކީ އަސްލު ނަމުން ނަމަ ބުންބާ މިސްކިތް ކަމަށާއި ރަސްމީ ނަމުން ނަމަ މަސްޖިދުއް ސުލްތާން މުހައްމަދު ޝަމްސުއްދީން މިސްކިތް ކަމަށެވެ. އެއީ ޝަމްސުއްދީން (ތިންވަނަ) ގެ ރަސްކަމުގައި 1927 ވަނަ އަހަރު ބިނާކުރި ތާރީހީ ޝީއީ މިސްކިތެއް ކަމަށާއި މި މިސްކިތް ބިނާކުރީ 1857 ވަނަ އަހަރުން ފެށިގެން ސަރުކާރުގެ ހުއްދައާއެކު މާލޭގައި ވަޒަންވެރިވި ދާއޫދީ ބޯރާ ވިޔަފާރިވެރިން ކަމަށް އޭނާ ވިދާޅުވިއެވެ.
މި މިސްކިތަށް 100 އަހަރު ފުރެން ކައިރިވެފައިވާއިރު، މިއީ ތާރީހީ ގޮތުން ނުހަނު މުހިންމު ބިނާއެއް ކަމަށާއި 1962 ވަނަ އަހަރު ބޯރާ މީހުންގެ ވިޔަފާރި ހުއްދަ ބާތިލުކޮށް، އެމީހުން ރާއްޖެއިން ފުރައިގެން ދިއުމާ ހަމައަށް، ގާތްގަނޑަކަށް 35 އަހަރު ވަންދެން މި މިސްކިތް ބޭނުންކުރީ އެ މުޖުތަމައުގެ މީހުން ކަމަށް ނާޖިހް ވިދާޅުވިއެވެ. އޭގެ ފަހުން، މި މިސްކިތް އާންމުންނަށް ހުޅުވާލުމަށްޓަކައި މަރާމާތުކޮށް، "ބަންޑާރަ މިސްކިތް" ގެ ނަމަށް ބަދަލުކޮށް، ޖެނުއަރީ 12، 1967 ގައި ހުޅުވިއެވެ. އަދި ޑިސެމްބަރު 7، 1968 ގައި މި މިސްކިތުގައި ހުކުރު ކުރަން ފެށި ކަަމަށެވެ. ވޭތުވެދިޔަ 58 އަހަރު މި މިސްކިތް ބޭނުންކުރަމުން އަންނަނީ ސުންނީ މިސްކިތެއްގެ ގޮތުގައި ކަމަށް ވެސް ނާޖިހް ފާހަގަކުރެއްވިއެވެ.
މި ބިނާއަކީ ދިވެހި ތާރީހުގެ ތަފާތު އަދި ހާއްސަ ބާބެއް ރަމްޒުކޮށްދޭ، އަދި ޖަޒީރާތަކުގެ ސަގާފަތާއި ވިޔަފާރީގެ ގުޅުންތައް ބައްޓަންވެފައިވާ ގޮތް ދައްކުވައިދޭ ތަނެއްގެ ގޮތުގައި ނާޖިހް ސިފަކުރެއްވިއެވެ. އެ މިސްކިތް ތަޅާލައި އާ މިސްކިތެއް އެތަނުގައި ބިނާކުރަން ނިންމި އިރު އެތަނުން ހިނގާފައި 2 މިނެޓެއްހާ ވަގުތުކޮޅެއްގެ ތެރޭގައި 5000 މީހުންގެ ޖާގައިގެ އިސްލާމިކް މަރުކަޒަށް ދެވޭ އިރު އެތަން ތަޅާލައި އެތަނުގައި ބޮޑު މިސްކިތެއް އެޅުމަކީ ކަންބޮޑުވާ ކަމެއް ކަމަށް ނާޖިހް ވިދާޅުވިއެވެ.
ބަންޑާރަ މިސްކިތް ތަޅާލުމަކީ ހެދޭނެ ވަރަށް ބޮޑު ގޯހެއް ކަމަށާއި އެއީ ސަގާފީ އަދި ތާރީހީ ބިނާތައް ހިމާޔަތްކުރުމަށް ހަދާފައިވާ އާސާރީ ތަރިކަ ހިމާޔަތްކުރުމުގެ ގާނޫނުގެ ރޫހާ ހިލާފު ކަމެއް ކަމަށް ވެސް ނާޖިހް ވިދާޅުވިއެވެ. މި މިސްކިތަކީ ހަމައެކަނި އަޅުކަން ކުރާ ތަނެއް ނޫން ކަމަށާއި އެއީ މި ގައުމުގެ ތަފާތު މާޒީއާ ގުޅިފައިވާ، އަގު ނުކުރެވޭ ފަދަ ސަގާފީ ތަރިކައެއް ކަމަށް އޭނާ ވިދާޅުވިއެވެ.
