ދެފުށް ފެންނަ ގޮތަކަށް އީގަލް ހިލްސްގެ މަޝްރޫއެއް އައްޑުއަށް ގެނައުމަށް މަރުހަބާ ކިޔާނެ ކަމަށް އައްޑޫ ސިޓީގެ މޭޔަރު އަލީ ނިޒާރު މިއަދު ވިދާޅުވެއްޖެއެވެ.
ނިޒާރު މިހެން ވިދާޅުވީ އެމްޑީޕީ ކޮންގްރެސް އިންވެސްޓްމަންޓް ފޯރަމް ގައި މަޝްރޫއުތަކާ ގުޅިގެން ބާއްވި މަޝްވަރާގައި އީގަލް ހިލްސްއިން އައްޑޫއަށް މަޝްރޫއު ގެންދަން އެއްބަސްވެއްޖެ ނަމަ ސިޓީ ކައުންސިލާއި ރައްޔިތުން ދެކޭނީ ކިހިނެއްތޯ، އެމްޑީޕީގެ ޗެއާޕާސަން ކުރީގެ ރައީސް މުހައްމަދު ނަޝީދު ކުރެއްވި ސުވާލަށް ޖަވާބު ދެއްވަމުންނެވެ. އެ ސުވާލަށް ޖަވާބު ދެއްވަމުން ނިޒާރު ވިދާޅުވީ މިހާރު އެ މަޝްރޫއު އޮތް ގޮތަށް އައްޑޫއަށް ގެންދަން ބޭނުން ނުވާ ކަމަށާއި ނަމަވެސް ދެފުށް ފެންނަ ގޮތަށް ރައްޔިތުންނަށް ވާނުވާ އެނގިގެން އަންނަ ކަމަށްވާ ނަމަ މަރުހަބާ ކިޔާނެ ކަމަށެވެ.
ނިޒާރު ވިދާޅުވީ އީގަލް ހިލްސް ގެ މަޝްރޫއު މިހާރު ކުރިއަށްދާ ގޮތަށް ތާއީދު ނުކުރިޔަސް، ރައްޔިތުންނާ ހިއްސާކޮށް، ސާފުކޮށް ހިންގޭ މަޝްރޫއެއް އައްޑޫއަށް ގެނެވިއްޖެނަމަ އެކަމަށް ދޮރު ހުޅުވާލާނެކަމަށެވެ. އަދި މިފަދަ އިންވެސްޓްމަންޓްތައް އައުމަކީ އައްޑޫގެ ތަރައްގީއަށް އޮތް ފުރުސަތެއްކަން ނިޒާރު ފާހަގަކުރެއްވިއެވެ.
"އައްޑޫއަށް ތަރައްގީ ގެނައުމަށް އިންވެސްޓްމަންޓް ބޭނުން. ނަމަވެސް އެ ކަންކަން ހިންގަންވާނީ ރައްޔިތުންނަށް އެނގޭ ގޮތަށް، ސާފުކޮށް،" ނިޒާރު ވިދާޅުވިއެވެ.
މި ބައްދަލުވުމުގައި ނަޝީދު ވަނީ ރަސްމާލޭގައި ޔޫއޭއީގެ އީގަލް ހިލްސްއިން ހިނގަން ނިންމާފައިވާ މަޝްރޫއު އައްޑޫއަށް ބަދަލުކުރުމާ މެދު މަޝްވަރާ ކުރަން އެދިވަޑައިގެންފައެވެ. އަދި އެ މަޝްރޫއަކީ އުސޫލެއްގެ ގޮތުން ގޯސް މަޝްރޫއުއެއް ނޫން ކަން ފާހަގަކުރައްވަމުން ނަޝީދު ވަނީ "އިރާދަކުރެއްވިއްޔާ އެ މީހުން އަންނާނެ" ކަމަށް ވިދާޅުވެފައެވެ.
އީގަލް ހިލްސް އާއި ދިވެހި ސަރުކާރު ދެމެދު ރަސްމާލެ ގައި 20 ބިލިއަން ޑޮލަރުގެ ވޯޓާފްރަންޓް މަޝްރޫއެއް ތަރައްގީ ކުރުމަށް އެއްބަސްވުމަކަށް ސޮއިކޮށްފައިވަނީ މި އަހަރުގެ ސެޕްޓެމްބަރު 21 ގައެވެ. މިއީ ދިވެހިރާއްޖޭގެ ތާރީހުގައި އެންމެ ބޮޑު ބޭރުގެ އިންވެސްޓްމަންޓް މަޝްރޫއުތަކުގެ ތެރޭގައި ހިމެނޭ މަޝްރޫއެކެވެ.
މި މަޝްރޫއާ ގުޅިގެން ދުސްތޫރީ މައްސަލައެއް ވެސް ސުޕްރީމް ކޯޓް އަށް ހުށަހެޅިފައިވާއިރު، މަޝްރޫއާބެހޭ ބައެއް ފަރާތްތަކުން ގާނޫނީ އިއުތިރާޒުތައް ވެސް ފާޅުކޮށްފައިވެއެވެ.
