ދުނިޔޭގެ ހިތުގެ ދުވަހުގެ ގޮތުގައި ފާހަގަކުރާ ސެޕްޓެމްބަރު 29 ވަނަ ދުވަހާ ގުޅުވައިގެން، ހިތުގެ ބަލިތަކާއި ސްޓްރޯކުން ރައްކާތެރިވުމަށް އަވަސް ފިޔަވަޅުތަކެއް އެޅުމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފިއެވެ.
އެޗްޕީއޭ އިން ނެރުނު ނޫސްބަޔާނެއްގައި ބުނެފައިވަނީ، ދިވެހިރާއްޖޭގައި މަރުވާ މީހުންގެ އެންމެ ބޮޑު އިންސައްތައެއް ނުވަތަ 84 އިންސައްތަ ހިއްސާކުރަނީ ގައިންގަޔަށް ނާރާ ބަލިތައް ކަމަށެވެ. އަދި އޭގެ ތެރެއިން ވެސް މީހުން މަރުވުމާއި ނުކުޅެދުންތެރިކަން ދިމާވުމުގެ މައިގަނޑު ސަބަބަކީ ހިތުގެ ބަލިތަކާއި ސްޓްރޯކް ކަމަށް އެ އޭޖެންސީން ފާހަގަކުރެއެވެ.
އެޗްޕީއޭއިން ބުނީ ރާއްޖޭގައި ހެދުނު ނޮން ކޮމިއުނިކަބަލް ޑިޒީސް ރިސްކް ފެކްޓާ ސާވޭ 2021 ގައި ދައްކާ ގޮތުގައި ރާއްޖޭގައި 15 އަހަރާއި 65 އަހަރާ ދެމެދުގެ 4.7 އިންސައްތަ މީހުން ނުވަތަ ކޮންމެ 4 މީހަކުން 1 އަކު މަރުވަނީ ހިތުގެ ބަލި، ސްޓްރޯކް އަދި އެންޖީނާ ފަދަ ބަލިތަކުގެ ސަބަބުން ކަމަށެވެ.
މިއަހަރުގެ ހިތުގެ ދުވަހުގެ ޝިއާރަކީ "ޑޯންޓް މިސް އަ ބީޓް" މިއެވެ. މި ޝިއާރުގެ މައިގަނޑު މަގުސަދަކީ ހިތުގެ ދުޅަހެޔޮކަން ރައްކާތެރިކުރުމަށާއި ބަލިޖެހުމުގެ ކުރިން ރައްކާތެރިކަމުގެ ފިޔަވަޅުތައް އަވަހަށް އެޅުމަށް އާންމުން ހޭލުންތެރިކުރުވުންކަމަށް އެޗްޕީއޭއިން ވަނީ ބުނެފައެވެ.
އެޗްޕީއޭއިން ބުނީ 2026 ވަނަ އަހަރުގެ ސެޕްޓެމްބަރު މަހުގެ ނިޔަލަށް 37،038 މީހުން ގައިންގަޔަށް ނާރާ ބައްޔަށް ސްކްރީންކުރެވިފައިވާކަން ފާހަގަކޮށްފައެވެ. މީގެތެރެއިން 21.2 އިންސައްތަ މީހުންނަކީ ކޮލެސްޓްރޯލް މައްޗަށް ދާ މީހުންކަމަށާއި، 10.4 އިންސައްތަ މީހުންނަކީ ހަކުރުބަލި ތަހައްމަލުކުރަމުންދާ މީހުންކަމަށް ބުނެފައެވެ.
ލޭ މައްޗަށް ދިއުމަކީ ހިތުގެ ބަލިތަކަށް ހުށަހެޅޭ ސަބަބެއްކަން ފާހަގަކޮށް އެޗްޕީއޭއިން ބުނީ ހިތުގެ ބަލީގެ އަލާމާތްތަކަށް ސަމާލުވުމަށް އިލްތިމާސްކޮށްފައެވެ. އެގޮތުން ހާޓް އެޓޭކްގެ އާންމު އަލާމާތްތަކުގެ ތެެރޭގައި މޭގައި ރިއްސުން ނުވަތަ ފިއްތުމެއް އިހުސާސްވުން، އަދި މި ތަދު އަތް، ކޮނޑު، ކަރު، ދަތްދޮޅި ނުވަތަ ބުރަކަށްޓަށް ފެތުރިގެން ދިއުމާއެކު އާދަޔާ ހިލާފަށް ނޭވާ ކުރުވެ، ދާހިއްލުން ހިމެނޭކަމަށް އެޗްޕީއޭއިން ވަނީ ބުނެފައެވެ.
ގައިންގަޔަށް ނާރާ ބަލިތައް ކޮންޓްރޯލްކުރުމަށް ޓަކައި، ސެޕްޓެމްބަރު 2026 ގެ ނިޔަލަށް ރާއްޖޭގެ އަތޮޅުތަކުގައި ސިއްހީ ހިދުމަތްތައް އިތުރަށް ފުޅާކޮށް ހަރުދަނާކުރުމުގެ މަސައްކަތް ކުރަމުންދާކަން ފާހަގަކޮށް އެޗްޕީއޭއިން ބުނީ މާލެ ސަރަހައްދުގައި ދަމަނަވެށީގެ އިތުރުން އާބަން ޕްރައިމަރީ ހެލްތް ކެއާ ސެންޓާގެ ނަމުގައި ޕްރައިމަރީ ހެލްތް ކެއާ ފޯރުކޮށްދޭނެ މަރުކަޒެއް ގާއިމުކުރެވިފައިވާކަމަށެވެ.
އެއާއެކު އެޗްޕީއޭއިން ވަނީ ސިއްހަތަށް ފައިދާހުރި ކާނާ ބޭނުންކުރުމާއި، ގަވާއިދުން ކަސްރަތުކުރުމާއި، ދުންފަތުގެ އިސްތިއުމާލުކުރުމުން ދުރުހެލިވުމަކީ ހިތުގެ ބަލިތަކާއި ހަކުރުބަލިން ރައްކާތެރިވުމަށް ކުރެވިދާނެކަންކަން ކަމުގައި ބުނެފައެވެ.
