ބަންޑާރަ މިސްކިތް ހުރި ބިމުގައި ޒަމާނީ ބޮޑު މިސްކިތެއް އަޅަން ނިންމުމާއެކު އެއީ ހިމާޔަތް ކުރަން ޖެހޭ ތަނެއް ކަމަށް ބުނެ ގިނަ ބަޔަކު ކަންބޮޑުވުން ފާޅު ކުރުމުން ގޮތެއް ނިންމަވާނީ މަޝްވަރާއަށްފަހު ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ގަރުނެއްހާ ދުވަސްވީ ބަންޑާރަ މިސްކިތް ތަޅާލައި އެތަނުގައި އާ މިސްކިތެއް އަޅަން ނިންމާފައިވާކަން ޝަހީމް އިއުލާން ކުރެއްވީ އިއްޔެއެވެ. މިގޮތުން ބަންޑާރަ މިސްކިތް ހުރި ތަނުގައި އާ މިސްކިތް އެޅުމުގެ މަސައްކަތް މި ހިނގާ ރޯދަ މަހަށްފަހު ފަށާނެ ކަމަށް ޝަހީމް ވިދާޅުވިއެވެ.
ނަމަވެސް އެއީ ތާރީހީ ބިނާއެއް ކަމަށް ބުނެ އިއްޔެ ވަނީ ތާރީހު ދިރާސާކުރާ ފަރާތްތަކުގެ އިތުރުން އާއްމުންގެ ގިނަ ބަޔަކު ކަންބޮޑުވުން ފާޅުކޮށްފައެވެ.
އެގޮތުން ހެރިޓޭޖް މިނިސްޓްރީގެ ކުރީގެ އެނަލިސްޓް އަދި ތާރީހު ދިރާސާ ކުރައްވާ މުހައްމަދު ނާޖިހު ދީދީ ވިދާޅުވި ގޮތުގައި އެފަދަ ތަނެއް ނައްތާލުމަކީ، ތާރީހަށް ދެވޭނެ އިއާދަނުކުރެވޭނެ ފަދަ ބޮޑު ގެއްލުމެއް ކަމަށާއި އެއީ، ރާއްޖޭގެ ސަގާފީ ތަރިކަ ރައްކާތެރި ކުރުމަށް ހަދާފައިވާ ގާނޫނާ ވެސް ހިލާފު ކަމެއް ކަމަށެވެ.
"މިކަން ނުކުރުމަށް އިސްލާމިކް މިނިސްޓްރީއަށް ގޮވާލަން. އަދި ތަރިކައާ ބެހޭ ވުޒާރާއަށް ވެސް މިކަން ހުއްޓުވުމަށް ގޮވާލަން،" އެކްސްގައި ހިއްސާކުރި ޕޯސްޓެއްގައި ނާޖިހު ވިދާޅުވި އެވެ. ހަމަ އެ ޕޯސްޓަށް ރައްދު ދެއްވާ ޝަހީމް ވަނީ ރާއްޖޭގައި އާސާރީ މިސްކިތްތަކުގެ ލިސްޓެއް އޮންނަ ކަމަށާއި އެއީ އާސާރީ މިސްކިތެއް ނޫން ކަމަށް ވިދާޅުވެ ދިފާއު ކުރައްވާފައެވެ.
މީގެ އިތުރުން ވެސް ކުރީގެ ހެރިޓޭޖް މިނިސްޓަރު ޔުމްނާ މައުމޫން ވެސް ވަނީ ކަންބޮޑުވުން ފާޅުކުރައްވާފައެވެ. ޔުމްނާ ވިދާޅުވި ގޮތުގައި ބަންޑާރަ މިސްކިތް ތަޅައިލުމަކީ އެއްގޮތަކަށް ވެސް ކޮށްގެންވާނެ ކަމެއް ނޫނެވެ. އަދި ހަމަ އެހެންމެ ރާއްޖޭގެ މި ފަދަ ތާރީހީ ބިނާތަކާއި ސަގާފީ ތަރިކަ ރައްކާތެރިކުރުމަށް، ސަގާފީ ތަރިކަ ގާނޫނެއް ހަދައި ތަސްދީގު ކޮށްފައިވާނެ ކަމަށް ޔުމްނާ ވިދާޅުވެފައި ވެއެވެ.
މި މައްސަލައާ ގުޅިގެން އާންމުންވެސް ކަންބޮޑުވުން ފާޅު ކުރަމުންދާ މި ދަނޑިވަޅުގައި ޝަހީމް އެންމެ ފަހުން ވިދާޅުވީ، ބަންޑާރަ މިސްކިތް ހުރި ތަނުގައި ބޮޑު މިސްކިތެއް އަޅަން ނިންމީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި އެ ތަން ހިމެނިފައި ނެތުމުން ކަމަށެވެ. އަދި މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފައި ކަމަށް ވެސް އޭނާ ވިދާޅުވި އެވެ.
"މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފަ. އެއާ އެއްގޮތަށް. އާ މިސްކިތެއް ބިނާކުރުމާ މެދު ފުޅާ ދާއިރާއެއްގައި މަޝްވަރާކުރާން ބޭނުން،" ޝަހީމް ވިދާޅުވިއެވެ.
ވިޔަފާރިވެރިންގެ މިސްކިތް ބިނާ ކުރީ 1927 ވަނަ އަހަރު އެވެ. އެއީ އޭރު ރާއްޖޭގައި ވިޔަފާރިކުރަން އުޅުނު ވޯރާ ވިޔަފާރިވެރިން ބިނާކުރި މިސްކިތެކެވެ. އެ ތަނަށް އޭރު ކިޔައި އުޅުނީ ބުމްބާ މިސްކިތެވެ. ނަމަވެސް ފަހުން އެ ތަނުގެ ނަން ބަންޑާރަ މިސްކިތަށް ބަދަލުކުރީ އެވެ.
