މިދިޔަ ސެޕްޓެމްބަރު މަހުގެ ތެރޭގައި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އަށް 1،288 ޓަނަށް ވުރެ ގިނަ މަސް ކިރާފައިވާ ކަމަށާއި، މަސްވެރިންނަށް 27.3 މިލިއަން ރުފިޔާ ދޫކޮށްފައިވާ ކަމަށް އެ ކުންފުނިން ބުނެފިއެވެ.
މިފްކޯއިން އާންމުކޮށްފައިވާ ސެޕްޓެމްބަރު މަހުގެ ހިސާބުތަކަށް ބަލާއިރު، ޖުމްލަ 453 ދޯންޏަކުން ވަނީ 1,288.42 ޓަނުގެ މަސް އެ ކުންފުންޏަށް ކިރުވާފައެވެ. އަދި އެ މަހަށް ވާ ފައިސާގެ ގޮތުގައި މަސްވެރިންނަށް ޖުމްލަ 27,323,275.00 ރުފިޔާ ވަނީ ދޫކޮށްފައެވެ.
މި މުއްދަތުގައި އެންމެ ގިނައިން ކިރާފައި ވަނީ ކަޅުބިލަމަހެވެ. އެގޮތުން 451 ދޯންޏަކުން 1,284.1 ޓަނުގެ ކަޅުބިލަމަސް ކިރާފައިވާއިރު، އެ މަހަށްވާ 27,226,550.00 ރުފިޔާ ވަނީ މަސްވެރިންނަށް ދޫކޮށްފައެވެ. ކަންނެލީގެ ބާވަތްތަކަށް ބަލާއިރު، 10 ކިލޯއިން ދަށުގެ 0.5 ޓަނުގެ ކަންނެލި އެއް ދޯނިން ކިރުވާފައިވާތީ އެއަށް 900.00 ރުފިޔާ ވަނީ ދޫކޮށްފައެވެ. އަދި 15 ކިލޯއިން މަތީގެ 3.8 ޓަނުގެ ކަންނެލި 5 ދޯންޏަކުން ކިރުވާފައިވާއިރު، އެ މަހަށްވާ 95,825.00 ރުފިޔާ ވަނީ މަސްވެރިންނަށް ދީފައެވެ.
ފާއިތުވި މަސްތަކުގައި މަސްވެރިންނަށް ދޫކުރި ފައިސާގެ އަދަދުތަކަށް ބަލާއިރު، ޖޫން މަހު މިފްކޯއިން ދޫކޮށްފައި ވަނީ 11.3 މިލިއަން ރުފިޔާއެވެ. ނަމަވެސް ޖުލައި މަހު މި އަދަދު ބޮޑުތަނުން އިތުރުވެ 50 މިލިއަން ރުފިޔާ ދޫކުރިއިރު، އޮގަސްޓް މަހު ވަނީ 29.99 މިލިއަން ރުފިޔާ މަސްވެރިންނަށް ދޫކޮށްފައެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން 2023 ވަނަ އަހަރު ވެރިކަމާ ހަވާލުވި އިރު، މަސްވެރިންނަށް ނުދައްކާ 250 މިލިއަން ރުފިޔާގެ ބެކްލޮގެއް އޮތް ނަމަވެސް، އެ ފައިސާ އެއްކޮށް ދައްކާ ވަނީ ހަލާސްކޮށްފައެވެ. އަދި ކިރާ މަހަށް 48 ގަޑިއިރު ތެރޭގައި ފައިސާ ދޫކުރަން ފެށި ފަހުން، މިއަހަރުގެ އޮގަސްޓު މަހުގެ 27 ވަނަ ދުވަހާ ހަމައަށް މިފްކޯ މެދުވެރިކޮށް މަސްވެރިންނަށް 2.2 ބިލިއަން ރުފިޔާ ވަނީ ދޫކުރެވިފައެވެ. މަސްވެރިންނަށް މަހުގެ ހަމަ އަގު ހޯދައިދިނުމަށް ސަރުކާރުން ކުރަމުންދާ މަސައްކަތްތަކުގެ ދަށުން، މިހާރު މަސް ގަންނަ އަގު ވަނީ 22 ރުފިޔާއަށް ބޮޑުކޮށްފައެވެ.
މިފްކޯއިން ބުނި ގޮތުގައި، ސަރުކާރުގެ މައިގަނޑު ސިޔާސަތަކީ މަސްވެރިން ކިރުވާ މަހަށް ވީހާވެސް އަވަހަކަށް ފައިސާ ފޯރުކޮށްދިނުމެވެ. އަދި ފައިސާ ދޫކުރުމުގައި ދެފުށް ފެންނަ ނިޒާމެއް ގާއިމުކޮށް، މަސްވެރިންނަށް ލިބެންޖެހޭ ފައިސާ ގަވާއިދުން ލިބޭނެ އިންތިޒާމުތައް އިތުރަށް ހަރުދަނާ ކުރުމަށް މެދުކެނޑުމެއްނެތި މަސައްކަތް ކުރަމުންދާ ކަމަށް އެ ކުންފުނިން ހާމަކުރެއެވެ.
