ޒަމާނީ އޮފީސްތަކުގެ ދުވަހުން ދުވަހަށް ކުރާ މަސައްކަތްތައް ބިނާވެފައިވަނީ އީމެއިލާއި އޮންލައިން މުވާސަލާތީ ވަސީލަތްތަކުގެ މައްޗަށެވެ. އެހެންކަމުން، މިފަދަ މައިގަނޑު ނިޒާމަކަށް ކުއްލި ބުރުލެއް އެރުމަކީ މުޅި ދުނިޔޭގެ އިދާރީ ހިންގުމާއި މުވާސަލާތީ ގުޅުންތަކަށް އެއްފަހަރާ ހުއްޓުމެއް އަންނަ ކަމެކެވެ. ދުނިޔޭގެ 74 ގައުމެއްގައި ބޭނުންކުރާ އައުޓްލުކް އާއި ޓީމްސް އަދި ކޯޕައިލެޓްގެ ހިދުމަތްތަކަށް ބުރޫއެރިތާ 12 ގަޑިއިރަށް ވުރެ ގިނަ އިރު ވެފައިވާއިރު، އެންމެ ގިނަ ބަޔަކު ބޭނުންކުރާ އެ ވަސީލަތްތައް އަލުން އިއާދަކުރުމަށް މައިކްރޮސޮފްޓްއިން ދަނީ މަސައްކަތްކުރަމުންނެވެ. ނަމަވެސް، މިހާތަނަށް ލިބިފައިވަނީ ވަރަށް ކުޑަ ކުރިއެރުމެއް ކަމަށް އެ ކުންފުނިން ބުނެއެވެ.
މި މައްސަލައިގައި އެންމެ ބޮޑު އަސަރެއް ކޮށްފައިވަނީ އައުޓްލުކް ބޭނުންކުރާ ފަރާތްތަކަށެވެ. ވެބްސައިޓާއި އެޕްލިކޭޝަން އަދި މޯބައިލް ފޯނުތައް މެދުވެރިކޮށް އީމެއިލް ނުހުޅުވޭ ކަމަށާއި، އަދި ލިބޭ އީމެއިލްތައް ވެސް ލަސްވާ ކަމަށް އެ ހިދުމަތް ބޭނުންކުރާ މީހުން ވަނީ ރިޕޯޓުކޮށްފައެވެ. މީގެ އިތުރުން، މައިކްރޮސޮފްޓްގެ އަމިއްލަ އުފެއްދުންތަކުގެ ބޭރުން، އާޓިފިޝަލް އިންޓެލިޖެންސް (އޭއައި) ދާއިރާގެ ކުންފުނިތައް ކަމަށްވާ އޯޕަންއޭއައި އަދި އެންތްރޮޕިކް ފަދަ އިދާރާތަކުން ބަރޯސާވާ ގުޅުންހުރި ނިޒާމުތަކަށް ވެސް ވަނީ ބުރޫއަރާފައެވެ.
މައްސަލަ ފެށިގެން އައި ގޮތާއި ފެތުރުނު މިންވަރު
މައިކްރޮސޮފްޓްގެ އުފެއްދުންތަކަށް މައްސަލަ ދިމާވާން ފެށީ އިއްޔެ ޖީއެމްޓީ ގަޑިން 16:00 ހާއިރު، އައުޓްލުކް ބޭނުން ނުކުރެވޭ ކަމަށް މީހުން ރިޕޯޓުކުރަން ފެށުމާ އެކުގައެވެ. އޮންލައިން ހިދުމަތްތަކަށް ދިމާވާ މައްސަލަތައް ބަލަހައްޓާ ޑައުންޑިޓެކްޓަރގެ ތަފާސްހިސާބުތަކުން ދައްކާ ގޮތުގައި، މައްސަލަ ޖެހުނުތާ ގާތްގަނޑަކަށް ގަޑިއެއްހާއިރުގެ ތެރޭގައި 74 ގައުމަކާއި ސަރަހައްދަކުން ވަނީ ޝަކުވާ ހުށަހަޅާފައެވެ. އަދި މިއަދު ޖީއެމްޓީ ގަޑިން 07:00 އާ ހަމައަށް 72 ގައުމަކުން އައުޓްލުކްގެ މައްސަލަތަކާ ގުޅޭ މަދުވެގެން 43،000 ރިޕޯޓު އެ ވެބްސައިޓަށް ލިބިފައިވާ ކަމަށް އަލްޖަޒީރާއިން މިއަދު ރިޕޯޓުކޮށްފައިވެއެވެ. މިއީ ހަމައެކަނި އެ ވެބްސައިޓަށް ޒިޔާރަތްކޮށް މައްސަލަ ރިޕޯޓުކުރި މީހުންގެ އަދަދަށް ވާތީ، އަސަރުކުރި މީހުންގެ އަސްލު އަދަދު މިއަށް ވުރެ މާ ބޮޑަށް ވެސް އިތުރުވާނެއެވެ.
ކެންބްރިޖް ޔުނިވާސިޓީގެ ބެނެޓް ސްކޫލް އޮފް ޕަބްލިކް ޕޮލިސީގެ އެފިލިއޭޓް ރިސާޗަރު އަދި އޭއައި ތަޖުރިބާކާރު ވޯލްޓަރ ޕަސްކުއަރެލީ ވިދާޅުވި ގޮތުގައި، ގާތްގަނޑަކަށް 430 މިލިއަން މީހުން މައިކްރޮސޮފްޓްގެ ހިދުމަތްތައް ބޭނުންކުރެއެވެ. އަދި މިހާތަނަށް އެނގިފައިވާ ގޮތުގައި މިއީ އެންމެ ފުރަތަމަ ވެސް މުވާސަލާތީ ގޮތުން ކުރިމަތިވި ނުރައްކަލެއް ކަމަށް އޭނާ ފާހަގަކުރެއްވިއެވެ. މި މައްސަލައިގެ ސަބަބުން ސިންގަޕޫރާއި ޖަޕާނުގެ ސަރުކާރުގެ ނިޒާމުތަކަށާއި، ފިލިޕީންސްގެ ސުޕްރީމް ކޯޓުގެ މުވާސަލާތީ ގުޅުންތަކަށް ވެސް ވަނީ ބުރޫއަރާފައެވެ. އަދި އޮސްޓްރޭލިއާގައި އެ ގައުމުގެ ޖާސޫސީ އިދާރާއާއި ފެޑެރަލް ފުލުހުންގެ އިދާރާ ވެސް ހިމެނެނީ މި މައްސަލައިގެ އަސަރުކުރި ތަންތަނުގެ ތެރޭގައެވެ.
މައްސަލަ ދިމާވި ސަބަބާއި ސައިބާ ހަމަލާއެއްގެ ތުހުމަތު
މި މައްސަލަ ދިމާވާން މެދުވެރިވި އަސްލު ސަބަބު މައިކްރޮސޮފްޓުން އަދި ހާމަކޮށްފައެއް ނުވެއެވެ. އެންމެ ފުރަތަމަ އެމެރިކާ ބައްރުގެ ސަރަހައްދުތަކަށް ދިމާވި މައްސަލަތަކެއް ބަލަމުންދާ ކަމަށް ބުނުމަށް ފަހު، ފަހުން އެ ކުންފުނިން ވަނީ ކޮންމެ ސަރަހައްދެއްގައި އުޅޭ ބަޔަކަށް ވެސް މީގެ އަސަރުކޮށްފާނެކަން ކަށަވަރުކޮށްދީފައެވެ. މައިކްރޮސޮފްޓުން ބުނެފައިވަނީ މައްސަލަ ޖެހުނު ނިޒާމުތަކަށް އެކި ސަރަހައްދުތަކުގައި އާދަޔާ ހިލާފަށް ބާރުބޮޑުވެފައިވާ ކަމަށާއި، ގުޅުންތަކަށް ބުރޫއަރަނީ އެ ސަބަބާ ހުރެ ކަމަށް ބެލެވޭ ކަމަށެވެ. ނަމަވެސް، ބޭނުންކުރާ މީހުންގެ ޓްރެފިކް އިތުރުވެގެން އެފަދަ ބާރުބޮޑުވުމެއް މެދުވެރިވީ ނޫން ކަމަށާއި، ބައެއް ސާވާތައް ކުއްލިއަކަށް ބޭނުން ނުކުރެވޭ ގޮތް ވީ ކަމަށް އެ ކުންފުނިން ފަހުން ބުންޏެވެ.
މައިކްރޮސޮފްޓްގެ ކޯޕައިލެޓް، އޭޖެންޓްސް އެންޑް ޕްލެޓްފޯމްގެ އެގްޒެކެޓިވް ވައިސް ޕްރެޒިޑެންޓް ޗާލްސް ލަމަންނާ އިއްޔެ ރޭ އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ ސައިބާ ހަމަލާއެއް ނުވަތަ ގަސްދުގައި ދިން ގެއްލުމެއްގެ ސަބަބުން ދިމާވި ކަމެއް ކަމުގެ އެއްވެސް ނިޝާނެއް ނެތް ކަމަށެވެ. އަދި އިތުރު މައުލޫމާތު ލިބޭ ވަރަކުން ހިއްސާކުރައްވާނެ ކަމަށް ވެސް އޭނާ ވިދާޅުވިއެވެ. މައިކްރޮސޮފްޓުން މިއަދު ދިޔައީ ނެޓްވޯކަށް ގެނައި ބަދަލެއް އަނބުރާ ގެންދިއުމުގެ މަސައްކަތް ކުރަމުންނެވެ. ނަމަވެސް، މި މައްސަލަތައް ދިމާވީ އެ ބަދަލުގެ ސަބަބުން ކަމެއް އެ ކުންފުނިން ބުނެފައެއް ނުވެއެވެ.
އޮސްޓްރޭލިއާގެ ހޯމް އެފެއާޒް މިނިސްޓަރު ޓޯނީ ބާކް ސިޑްނީގައި ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، މިއީ ސައިބާ ހަމަލާއެއް ކަމަށް ގަބޫލު ނުކުރާ ކަމަށް މައިކްރޮސޮފްޓުން އޭނާއަށް ވެސް އަންގާފައިވާ ކަމަށެވެ. އަދި ކުރިން ކްރައުޑްސްޓްރައިކަށް ދިމާވި ފަދައިން، މި ފަހަރު ވެސް ކުރިމަތިލާން ޖެހިގެން އުޅެނީ ސިސްޓަމަށް ގެނައި އަޕްޑޭޓެއްގައި މައްސަލަ ޖެހިގެން ކަމަށް އެ ކުންފުނިން ގަބޫލުކުރާ ކަމަށް މިނިސްޓަރު ވިދާޅުވިއެވެ. ޓެކްނޮލޮޖީ އެނަލިސްޓް އަދި ނޫސްވެރިޔާ ރޫޕަޓް ގުޑްވިންސް ވިދާޅުވި ގޮތުގައި، ސިސްޓަމްތަކަށް އާދަޔާ ހިލާފަށް ބާރުބޮޑުވަނީ އާންމުކޮށް ދެ ސަބަބަކާ ހުރެއެވެ. އެއީ ބޭރުން ދޭ ހަމަލާއެއްގެ ސަބަބުން ނުވަތަ އެތެރޭގެ ނިޒާމުތަކަށް ފޮނުވާ އަޕްޑޭޓެއްގައި ހުންނަ މައްސަލައެއްގެ ސަބަބުން ސާވާތައް ރީސެޓްވެ، އެއް ސާވާ އަނެއް ސާވާއާ ގުޅުން ކެނޑުމެވެ. މީގެ އިތުރުން، ބައެއް ސާވާތައް އޮޓޮމޭޓެޑް ހެލްތު ޗެކްތަކުން ފެއިލްވުމުން، އޭގެ ޓްރެފިކް އެހެން ސާވާތަކަށް ބަދަލުވެ އެ ސާވާތަކަށް ވެސް ބާރުބޮޑުވީ ކަމަށް ޕަސްކުއަރެލީ ވިދާޅުވިއެވެ. އޭނާ އެކަން ސިފަކުރެއްވީ ހަތަރު ލޭން އޮންނަ ހައިވޭއެއް ކުއްލިއަކަށް ދެ ލޭނަށް ބަދަލުވެ، ޓްރެފިކް ތާށިވެގެން މުޅި މަގު ބަންދުވުމުގެ ގޮތުގައެވެ.
މައްސަލަ ހައްލުކުރުމަށް ކުރާ މަސައްކަތް ލަސްވަނީ ކީއްވެ؟
ހިދުމަތްތައް އަލުން އިއާދަކުރުމަށް ކުރަމުންދާ މަސައްކަތްތަކުގެ އަޕްޑޭޓްތައް މައިކްރޮސޮފްޓުން ދަނީ އެކްސްގައި ހިއްސާކުރަމުންނެވެ. މައްސަލަ ޖެހުނު ސާވާތަކުން ޓްރެފިކް އެހެން ދިމާތަކަށް ބަދަލުކޮށްގެން އިއްޔެ ރޭ ކުޑަ ކުރިއެރުމެއް ލިބުނު ނަމަވެސް، ގެނައި ބަދަލުތަކުން އުންމީދުކުރި ނަތީޖާ ނުފެންނަ ކަމަށް އެ ކުންފުނިން ފަހުން ބުންޏެވެ. އަދި އަލްޖަޒީރާއިން މިއަދު ރިޕޯޓުކޮށްފައިވާ ގޮތުގައި، އެމެރިކާގެ މަސައްކަތު ގަޑި ނިމި ރޭގަނޑަށް ދިޔައިރު ވެސް މައްސަލަ ދެމިއޮތް އިރު، ޔޫރަޕަށް މިއަދު ހެނދުނު ވީއިރު މައިކްރޮސޮފްޓުން ރަނގަޅުކުރި ސާވާތައް ވެސް ދިޔައީ އަލުން ފެއިލްވަމުންނެވެ. އެ ކުންފުނީގެ ސާވިސް ހެލްތު ޕޭޖުގައި ނެރުނު ބަޔާނެއްގައި ބަޔާންކޮށްފައިވާ ގޮތުގައި، ސާވާތަކުގެ ހާލަތު ދެނެގަތުމަށާއި ކެޕޭސިޓީ އިތުރުކުރުމަށް އެކި ސަރަހައްދުތަކުގެ މަސައްކަތްތައް ދަނީ މޮނިޓާކުރަމުންނެވެ. އޭގެ ތެރޭގައި އިންފްރާސްޓްރަކްޗާ ރީބޫޓްކޮށް ނިމުމުން، ތައްޔާރުކޮށްފައިވާ ޕެޗްތައް ރަނގަޅަށް މަސައްކަތްކުރޭތޯ ކަށަވަރުކުރުން ހިމެނެއެވެ.
ސާވާތައް ރަނގަޅުކުރުމާ އެކު އަލުން ފެއިލްވާ ސަބަބު ގުޑްވިންސް ވަނީ ތަފްސީލުކޮށްދެއްވާފައެވެ. އޭނާ ވިދާޅުވި ގޮތުގައި، އޮފްލައިންވާ ސާވާތައް އަލުން ގުޅުމާ އެކު ފައިލްތައް ސިންކްރޮނައިޒްކުރުމަށް އެހެން ހުރިހާ ސާވާތަކުން އެއްފަހަރާ ގުޅަން މަސައްކަތްކުރުމުން، އަލުން ބާރުބޮޑުވެ ސިސްޓަމް ވެއްޓެނީއެވެ. އެއީ މަގުމަތީގެ އެކްސިޑެންޓެއް ސާފުކޮށްލުމުން، ފުނިޖެހިފައިވާ ޓްރެފިކް އެއްފަހަރާ ކުރިއަށް ދާން އުޅުމުން މަގުތަކަށް ނުތަކައިގެން ތާށިވާ ގޮތާ އެއްފަދަ ކަމެއް ކަމަށް އޭނާ ވިދާޅުވިއެވެ. މީގެ އިތުރުން، އެ ނިޒާމުތައް ބިނާކުރި ތަޖުރިބާކާރު ގިނަ އިންޖިނިއަރުންތަކެއް މައިކްރޮސޮފްޓުން ވަކިވެފައިވާ ކަމަށާއި، އޭގެ ސަބަބުން ސިސްޓަމްތައް މަސައްކަތްކުރާ ގޮތުގެ މުހިންމު މައުލޫމާތާއި ތަޖުރިބާ ކުންފުނީގެ ތެރެއިން އުނިވެފައިވާ ކަމަށް ވެސް ގުޑްވިންސް ފާހަގަކުރެއްވިއެވެ. ހުރިހާ ހިދުމަތެއް އެއްކޮށް ރަނގަޅުވާނެ ވަކި ވަގުތެއް މައިކްރޮސޮފްޓުން އަދި ބުނެފައެއް ނުވެއެވެ. އެ ކުންފުނިން ބުނީ ކެޕޭސިޓީ އިތުރުވާ ވަރަކުން، ހުރިހާ ހިދުމަތެއް އެއްފަހަރާ ރަނގަޅުވުމުގެ ބަދަލުގައި އެޕްލިކޭޝަންތައް އަލުން ގުޅެމުންދާނީ މަރުހަލާތަކަކަށް ބަހާލައިގެން ކަމަށެވެ.
ހިދުމަތް ބޭނުންކުރާ ފަރާތްތަކަށް އޮތް ގޮތާއި ކުރިމަތިވާ ގޮންޖެހުންތައް
މި މައްސަލަ ދިމާވެފައިވަނީ މައިކްރޮސޮފްޓްގެ ސާވާތަކަށް ކަމަށް ވާތީ، ހިދުމަތް ބޭނުންކުރާ މީހުންނަށް އަމިއްލައަށް ކުރެވޭނެ މާ ބޮޑު ކަމެއް ނެތެވެ. ނަމަވެސް، އައުޓްލުކްގެ ޑެސްކްޓޮޕް ވާޝަން ބޭނުންކުރާ ފަރާތްތަކަށް ކުރިން ޑައުންލޯޑްވެފައި ހުރި އީމެއިލްތައް ފެންނަން ހުންނާނެއެވެ. އަދި ޓީމްސް މެދުވެރިކޮށް ކުރާ ޗެޓްތަކާއި ކޯލްތައް ވެސް ބޮޑު ބައެއްގައި މެދުނުކެނޑި ދަނީ މަސައްކަތްކުރަމުންނެވެ. މިފަދަ ކުއްލި ހުއްޓުންތަކަށް ކުންފުނިތަކާއި މުއައްސަސާތަކުން ދުރާލައި ތައްޔާރުވާން ޖެހޭ ކަމަށް ޕަސްކުއަރެލީ ލަފާދެއްވައެވެ. އެގޮތުން، މުޅި ދުނިޔެއަށް ދިމާވާ މިފަދަ މައްސަލައެއްގެ ތެރޭގައި ވެސް މެދުނުކެނޑި ކުރިއަށް ގެންދަން ޖެހޭ އެންމެ އަސާސީ ހިދުމަތްތަކަކީ ކޮބައިކަން ކަނޑައަޅާފައި އޮންނަން ޖެހޭނެ ކަމަށް އޭނާ ވިދާޅުވިއެވެ.
މީގެ ކުރީގެ ހާދިސާތަކާއި މުސްތަގުބަލަށް އޮތް ސުވާލުތައް
މިއީ މި އަހަރުގެ ތެރޭގައި މައިކްރޮސޮފްޓަށް ދިމާވި މިފަދަ ފުރަތަމަ ބޮޑު މައްސަލައެއް ނޫނެވެ. މިދިޔަ ޖެނުއަރީ މަހު އުތުރު އެމެރިކާ ސަރަހައްދުގައި މައިކްރޮސޮފްޓް 365 ގެ ހިދުމަތްތައް ގާތްގަނޑަކަށް 10 ގަޑިއިރަށް މެދުކެނޑުނެވެ. އަދި އޮގަސްޓް މަހުގެ ފަހުކޮޅު ވެސް ދުނިޔޭގެ އެކި ކަންކޮޅުތަކުން އެތައް ހާސް ބަޔަކަށް އައުޓްލުކް ބޭނުން ނުކުރެވޭ ގޮތް ވިއެވެ. އެހެން ޓެކްނޮލޮޖީ ކުންފުނިތަކަށް ވެސް މިފަދަ މައްސަލަތައް ދިމާވެފައިވާއިރު، 2025 ވަނަ އަހަރުގެ އޮކްޓޯބަރު މަހު އެމެޒޯން ވެބް ސާވިސަސްއަށް ދިމާވި މައްސަލައެއްގައި ގިނަ އަދަދެއްގެ ވެބްސައިޓްތަކާއި އެޕްލިކޭޝަންތައް ހުއްޓުމަކަށް އައެވެ. އަދި 2024 ވަނަ އަހަރުގެ ޖުލައި މަހު ސައިބާ ސެކިއުރިޓީ ކުންފުނި ކްރައުޑްސްޓްރައިކްގެ ސޮފްޓްވެއާ އަޕްޑޭޓަކަށް ދިމާވި މައްސަލައެއްގައި ދުނިޔޭގެ އެކި ކަންކޮޅުތަކުގެ ކޮމްޕިއުޓަރުތައް ހުއްޓި، ވައިގެ ދަތުރުތައް ކެންސަލްވެ، ހޮސްޕިޓަލްތަކުގެ ހިދުމަތްތަކަށް ބުރޫއަރައި އެތައް ބިލިއަން ޑޮލަރެއްގެ ގެއްލުން ކުރިމަތިވިއެވެ.
މި ފަހަރުގެ މައްސަލަ ދިމާވެފައި މިވަނީ، ބޭރުގެ ކުންފުނިތަކަށް ބަރޯސާވާ މިންވަރު ކުޑަކޮށް އަމިއްލަ ސާވާތައް ބޭނުންކުރުމަށް ޔޫރަޕުން މަސައްކަތްކުރަމުންދާ ދަނޑިވަޅެއްގައެވެ. އެމެރިކާގެ ރައީސް ޑޮނަލްޑް ޓްރަމްޕްގެ ދެވަނަ ދައުރުގައި ޔޫރަޕާ ދެކޮޅަށް ޓެރިފްތައް ތައާރަފުކޮށް، ޑެންމާކުގެ ސަރަހައްދެއް ކަމަށްވާ ގްރީންލޭންޑް ހިފާނެ ކަމުގެ އިންޒާރު ދެއްވުމާ ގުޅިގެން އެ މަސައްކަތަށް ވަނީ އިތުރު ބާރެއް ލިބިފައެވެ. އެގޮތުން، ޔޫރަޕުން ބޭރުގެ ފަރާތްތަކަށް ބަރޯސާވާ މިންވަރު ކުޑަކުރުމަށްޓަކައި ޒޫމް ފަދަ އެމެރިކާގެ ވީޑިއޯ ކޮންފަރެންސިން ވަސީލަތްތައް ބޭނުންކުރުން ހުއްޓާލައި ފަރަންސޭސިވިލާތުގެ ސޮފްޓްވެއާ ބޭނުންކުރަން ފަށާނެ ކަމަށް އެ ގައުމުގެ ބޮޑުވަޒީރު ސެބަސްޓިއަން ލެކޯނޫ މި އަހަރުގެ ކުރީކޮޅު ވަނީ ވިދާޅުވެފައެވެ.
ކަސްޓަމަރުން ދިގު މުއްދަތުގެ ލައިސަންސިން އެއްބަސްވުންތަކަކުން ބަނދެވިފައި ތިބުމުން، ކުރު މުއްދަތުގައި މައިކްރޮސޮފްޓްގެ އާމްދަނީއަށް މީގެ އަސަރެއް ކުރާނެ ކަމަށް ނުބެލެވޭ ކަމަށާއި، ނަމަވެސް ދިގު މުއްދަތުގައި އަސަރުކޮށްފާނެ ކަމަށް ގުޑްވިންސް ވިދާޅުވިއެވެ. އަދި އެހެން ނިޒާމަކަށް ބަދަލުވުމަކީ އުނދަގޫ ކަމަކަށް ވާތީ ގިނަ ބަޔަކު މައިކްރޮސޮފްޓްގައި ދެމިތިބި ނަމަވެސް، ވަކި ހިސާބަކުން އެ ކެތްތެރިކަން ކޮޅުންލާނެ ކަމަށް އޭނާ ވިދާޅުވިއެވެ. ޕަސްކުއަރެލީ ވިދާޅުވި ގޮތުގައި، މި މައްސަލައިގެ ސަބަބުން މައިކްރޮސޮފްޓްގެ ހިއްސާގެ އަގު ކުޑަ ވަގުތަކަށް ދަށަށް ހިނގައިދާނެއެވެ. ނަމަވެސް، އޮފީސް ސޮފްޓްވެއާގެ ދާއިރާގައި އެ ކުންފުންޏާ ވާދަކުރެވޭނެ ފަދަ އިތުބާރު ހުރި ބަދަލެއް ޔޫރަޕްގެ އެއްވެސް ކުންފުންޏަކަށް ފޯރުކޮށްދެވިދާނެ ކަމަށް ގަބޫލު ނުކުރައްވާ ކަމަށާއި، އޭގެ ބަދަލުގައި ކުންފުނިތަކުން ބޮޑަށް ސަމާލުކަން ދޭނީ ޑިޖިޓަލް ނިޒާމުތަކަށް ދިމާވާ މިފަދަ މައްސަލަތަކުން އަރައިގަތުމުގެ ގާބިލުކަން އިތުރުކުރުމަށް ކަމަށް އޭނާ ވިދާޅުވިއެވެ.
