ސަރުކާރުގެ ބޯހިޔާވަހިކަމުގެ ސިޔާސަތުތައް ބައްޓަންކޮށްފައިވަނީ އެއްވެސް ބޯހިޔާވަހިކަމެއް ނެތް އާއިލާތަކަށް އިސްކަންދޭ ގޮތަށް ކަމަށް ހައުސިން މިނިސްޓްރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
ސަރުކާރުގެ ބޯހިޔާވަހިކަމުގެ ސިޔާސަތާއި ގުޅޭގޮތުން "ލިންކްޑްއިން"ގައި ކުރެއްވި ޕޯސްޓެއްގައި މިނިސްޓަރު ވިދާޅުވީ ބޯހިޔާވަހިކަމަކީ ހަމައެކަނި މިލްކިއްޔާތެއް ނުވަތަ މުއްސަނދިކަން އިތުރުކުރަން އޮތް ވަސީލަތެއް ނޫން ކަމަށާއި އެއީ ތައުލީމާ، ސިއްހަތާ، ވަޒީފާ އަދި އިޖުތިމާއީ ބަދަހިކަމުގެ ބިންގާ ކަމުގައެވެ.
ބޯހިޔާވަހިކަމުގެ ބޭނުންތެރިކަން ވަޒަންކުރަނީ ވަކިވަކި ފަރުދުންގެ ގޮތުގައި ނޫން ކަމަށާއި، އެއީ އާއިލާތަކުގެ ނިސްބަތުން ވަޒަންކުރާ އެއްޗެއްކަން ހާމަކުރައްވަމުން މިނިސްޓަރު ވިދާޅުވީ އާއިލާއެއްގެ ކޮންމެވެސް އެއް މެންބަރެއްގެ ނަމުގައި ބޯހިޔާވަހިކަމެއް އޮތްނަމަ، އެ އާއިލާއަށް އިތުރު ޔުނިޓެއް ދިނުމުގެ ކުރިން އެއްވެސް އެއްޗެއް ނެތް އާއިލާއަކަށް ފުރުސަތު ދިނުމަކީ ފަރަގު ކުޑަކުރުމަށް ކުރަންޖެހޭ ކަމެއް ކަމަށެވެ.
"އާއިލީ ބޯހިޔާވަހިކަން" ޕްރޮގްރާމުގެ ދަށުން އެއްވެސް ބޯހިޔާވަހިކަމެއް ނެތް މީހުންނަށް އިސްކަންދެނީ ވަރަށް ސާދާ އުސޫލަކުންކަން ހާމަކުރައްވަމުން މިނިސްޓަރު ވިދާޅުވީ ބިމެއް ނުވަތަ ގެއެއް ނެތް އާއިލާތަކަކީ ގިނަ ފަހަރަށް އެބައެއްގެ މުދަލާއި ތަކެތީގެ ރައްކާތެރިކަން ލިބިފައިނުވާ ބައެއް ކަމަށެވެ.
އިތުރަށް މިނިސްޓަރު ވިދާޅުވީ ކިތަންމެ ކުޑަ ނަމަވެސް ބޯހިޔާވަހިކަމުގެ ފުރުސަތެއް އޮތް އާއިލާއެއްގެ ހާލަތު، އެއްވެސް ވަސީލަތެއް ނެތް އާއިލާއަކާ އަޅާބަލާއިރު ތަފާތުވާނެ ކަމަށެވެ. މީގެ އިތުރުން މިނިސްޓަރު ވިދާޅުވީ އަތްފޯރާފަށުގެ ބޯހިޔާވަހިކަމުގެ މަޝްރޫއުތައް ކުރިއަށް ގެންދާވަރަކަށް އާންމު ބޯހިޔާވަހިކަމަށް އޮތް ބާރު ކުޑަވާނެކަމަށެވެ.
