ޗައިނާ ސަރުކާރުގެ ހިލޭ އެހީގެ ދަށުން މާލެއާއި ވިލިމާލޭގެ މަގުތައް ޒަމާނީ ފެންވަރަށް އަލުން ތަރައްގީކުރުމުގެ ބޮޑު މަޝްރޫއާއި، ވިލިމާލޭގައި ގާއިމުކުރުމަށް ހަމަޖެހިފައިވާ 100 އެނދުގެ "ޗައިނާ-މޯލްޑިވްސް ފްރެންޑްޝިޕް ހޮސްޕިޓަލް" ގެ އަމަލީ މަސައްކަތް މިއަހަރުގެ ފަހުކޮޅު ނުވަތަ އަންނަ 2027 ވަނަ އަހަރުގެ ކުރީކޮޅު ރަސްމީކޮށް ފެށިގެންދާނެ ކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގ ޝިންހުއާ ހާމަކުރައްވައިފިއެވެ.
"ދަ ޕްރެސް" އަށް ދެއްވި ހާއްސަ ބަސްދީގަތުމެއްގައި ޗައިނާގެ ސަފީރު ވިދާޅުވީ، މި ދެ މަޝްރޫއަކީވެސް "ޗައިނާ އެއިޑް" ގެ ދަށުން ދިވެހި ރައްޔިތުންގެ ލާބައާއި މަންފާއަށްޓަކައި ޗައިނާ ސަރުކާރުގެ ސައްތައިން ސައްތަ ހިލޭ އެހީގައި ކުރިއަށްގެންދިއުމަށް ހަމަޖެހިފައިވާ މުހިންމު މަޝްރޫއުތަކެއް ކަމަށެވެ. އަދި މި މަޝްރޫއުތަކުގެ ތައްޔާރީ މަސައްކަތްތައް ދުރާލާ ރޭވިފައިވާ ތާވަލާ އެއްގޮތަށް، ވަރަށް ބާރަށް ކުރިއަށްދާ ކަމުގެ ޔަގީންކަން އޭނާ ދެއްވިއެވެ.
ޗައިނާ ސަރުކާރުގެ އެހީތެރިކަމާއެކު ރާއްޖޭގައި މިހާރުވެސް ކާމިޔާބު ދެ މަޝްރޫޢެއްގެ އަމަލީ މަސައްކަތް ކުރިއަށްދާކަން ފާހަގަކުރައްވަމުން ސަފީރު ވިދާޅުވީ، ދެ ގައުމުގެ ރަމްޒީ ގުޅުން ދައްކުވައިދޭ ސިނަމާލެ ބްރިޖު މަރާމާތުކޮށް ބެލެހެއްޓުމުގެ މަޝްރޫއާއި، ދިވެހިރާއްޖޭގެ ދަނޑުވެރިކަމާއި ރުއްގަސް ހިމާޔަތްކުރުމަށްޓަކައި ރުކަށް ޖެހޭ ކޮކޮނަޓް ބީޓަލް ނައްތާލުމަށް ގާއިމުކުރާ ބައޮލޮޖިކަލް ކޮންޓްރޯލް ފެކްޓަރީގެ މަސައްކަތުން ވަރަށް ރަނގަޅު ނަތީޖާއެއް ފެންނަމުންދާ ކަމަށެވެ. މީގެއިތުރުން، ރާއްޖޭގެ އިދާރީ ހިންގުން ހަރުދަނާކުރުމަށް އެކި ރަށްރަށުގައި ކައުންސިލް އިދާރާތަކުގެ އައު އިމާރާތްތައް ބިނާކުރުމުގެ މަޝްރޫއަށް ބޭނުންވާ އެންމެހައި ހުއްދަތައްވެސް މިއަހަރުގެ ތެރޭގައި ލިބި، އެ މަސައްކަތްވެސް ކުރިއަށްދާނެ ކަމަށް ވިދާޅުވިއެވެ.
ބޮޑެތި އުމްރާނީ ތަރައްގީގެ މަޝްރޫއުތަކަކީ އެކަށީގެންވާ ވަގުތާއި ފަންނީ މަރުޙަލާތަކެއް ފުރިހަމަކުރަންޖެހޭ ކަންކަންކަން ސަފީރު ތަފްސީލުކޮށްދެއްވިއެވެ. އެގޮތުން އަމަލީ މަސައްކަތް ފެށުމުގެ ކުރިން ފީސިބިލިޓީ ސްޓަޑީ ހެދުމާއި، ތަފްސީލީ ޑިޒައިންތައް އެކުލަވާލުމާއި، ބަޖެޓު ކަނޑައެޅުމުގެ އިތުރުން ސަރުކާރުގެ ކަމާބެހޭ އިދާރާތަކުން ނަގަންޖެހޭ ހުއްދަތައް ހޯދުމަކީ ނުހަނު މުހިންމު ކަންކަން ކަމުގައި ވިދާޅުވިއެވެ.
އެމަނިކުފާނު އިތުރަށް ފާހަގަކުރެއްވި ގޮތުގައި، މި މަޝްރޫއުތަކަކީ ޗައިނާގެ ހިލޭ އެހީގައި ކުރިއަށްގެންދާ ކަންކަމަށް ވީނަމަވެސް، ޗައިނާއިން އަބަދުވެސް އިސްކަންދެނީ ދިވެހި ސަރުކާރުގެ ވިސްނުމާއި، ހިޔާލާއި، މަޝްވަރާތަކަށް ފުރިހަމައަށް އިހްތިރާމްކޮށްގެން މަސައްކަތްތައް ކުރިއަށް ގެންދިއުމަށެވެ. އަދި ދެ ގައުމުގެ ދެމެދުގައި ކުރެވޭ ފުޅާ ވިލަރެސްކުރުންތަކަކީ މަޝްރޫއުތައް އެންމެ ފުރިހަމަ ގޮތުގައި ނިންމުމަށްޓަކައި ކޮންމެހެން ބޭނުންތެރި ކަމެއް ކަމަށް ވިދާޅުވިއެވެ.
މަޝްރޫއުތަކުގެ ކާމިޔާބީއާ ގުޅޭގޮތުން ވާހަކަދައްކަވަމުން ސަފީރު ވިދާޅުވީ، މަޝްރޫއެއްގެ ކާމިޔާބީ މިނެކިރަންވާނީ ހަމައެކަނި އެ މަސައްކަތް ނިމޭ އަވަސްމިނަކުން ނޫން ކަމަށެވެ. އެންމެ މުހިންމު އަދި އަގުހުރި ކަމަކީ އެ މަޝްރޫއެއްގެ ސަބަބުން އާންމު ރައްޔިތުންގެ ދިރިއުޅުމުގެ ފެންވަރަށް އަންނަ ހެޔޮ ބަދަލާއި، ރާއްޖޭގެ އިގްތިސާދަށާއި ދުރުރާސްތާ ތަރައްގީއަށް ލިބިގެންދާ ދެމެހެއްޓެނިވި ކުރިއެރުން ކަމުގައި ވިދާޅުވިއެވެ.
މީގެއިތުރުން، ކޮކޮނަޓް ބީޓަލް ކޮންޓްރޯލް ކުރުމުގެ މަޝްރޫއުގެ ދަށުން ރާއްޖޭގެ ތިން ރަށެއްގައި ހާއްސަ ވަސީލަތްތައް ގާއިމުކުރެވެމުންދާ ކަމަށާއި، މި ދާއިރާއިން ދިވެހި ފަންނީ މަސައްކަތްތެރިން ތަމްރީނުކޮށް، ދަނޑުވެރިކަމުގެ ދާއިރާއަށް ދިމާވެފައިވާ ގޮންޖެހުންތަކަށް ދާއިމީ ޙައްލެއް ހޯދައިދިނުމަށް މަސައްކަތްކުރަމުންދާ ކަމަށް ހާމަކުރެއްވިއެވެ.
ނިންމަވާލައްވަމުން ސަފީރު ވަނީ ރާއްޖެއާއި ޗައިނާއާ ދެމެދު އޮތް ޒަމާންވީ ގާތް ރަޙްމަތްތެރި ގުޅުން ފާހަގަކުރައްވައި، އުމްރާނީ ތަރައްގީގެ އިތުރުން ހާއްސަ، ތައުލީމީ އަދި ފަތުރުވެރިކަމުގެ ދާއިރާއިން ރާއްޖެއަށް ބޭނުންވާ އެހީތެރިކަން މެދުކެނޑުމެއްނެތި ފޯރުކޮށްދެއްވާނެ ކަމުގެ ފުރިހަމަ ޔަގީންކަން ދެއްވާފައެވެ. އަދި ޗައިނާގެ އަމާޒަކީ ރާއްޖޭގެ އިގްތިސާދީ ގާބިލުކަން އިތުރުކޮށް، އަމިއްލަ ފައިމައްޗަށް ތެދުވެ ތިބި ދެމެހެއްޓެނިވި މުޖުތަމައެއް ބިނާކުރުމަށް އެހީތެރިވުން ކަމުގައި ވިދާޅުވިއެވެ.
