ރާއްޖޭގައި އުފެއްދޭނެ ކާބޯތަކެތީގެ ބާވަތްތައް އިމްޕޯޓުކުރުން މަދުކޮށް، ކާބޯތަކެތީގެ ރައްކާތެރިކަން ކަށަވަރުކުރުމަށްޓަކައި ދަނޑުވެރިކަމާއި މެރިކަލްޗާ ދާއިރާއިން ބޮޑެތި އިންވެސްޓްމެންޓްތަކަށް މަގުފަހިކޮށްދޭ ގަވާއިދުތައް އަންނަ އޮކްޓޯބަރު މަހުގެ ފުރަތަމަ ހަފުތާގެ ތެރޭގައި އެކުލަވާލައި ނިންމުމަށް ސަރުކާރުން އަމާޒުހިފައިފިއެވެ.
މިކަން ހާމަކުރެއްވީ "އަހާ" ފޯރަމްގައި ވާހަކަފުޅު ދައްކަވަމުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމްއެވެ. ވަޒީރު ވިދާޅުވީ، ރާއްޖެއަށް ބޭރުގެ ފައިސާ ބޭރުވުން ހުއްޓުވުމަށާއި އިމްޕޯޓަށް ބަރޯސާވާ މިންވަރު ކުޑަކުރުމަށްޓަކައި ދަނޑުވެރިކަމާއި މެރިކަލްޗާ ދާއިރާއިން ބޮޑެތި އިންވެސްޓްމެންޓްތަކަށް ޖާގަ ދޭންޖެހޭ ކަމަށެވެ. އެގޮތުން، މިފަހުން ތަސްދީގުކުރެވުނު ފަޅުރަށްތަކާ ބެހޭ އައު ގާނޫނުގެ ދަށުން ހަދަންޖެހޭ ގަވާއިދުތައް ނިމުމުން، މި ދާއިރާތަކުން ބޮޑެތި އިންވެސްޓްމެންޓްތައް ލިބިގެންދާނެ ކަމަށް ވަޒީރު ވިދާޅުވިއެވެ.
މީގެ ކުރިން ފަޅުރަށްތައް ދޫކޮށްގެން ހިންގި މަޝްރޫއުތައް އެދެވޭ ގޮތެއްގައި ކުރިއަށް ގޮސްފައި ނުވާކަން ފާހަގަކުރައްވަމުން ވަޒީރު ވިދާޅުވީ، އައު ގާނޫނުގެ ދަށުން އެ މައްސަލައަށް ހައްލު ލިބިގެންދާނެ ކަމަށެވެ. މިހާރުވެސް ދަނޑުވެރިކަން ކުރުމަށް މީހުން ދިރިއުޅޭ 10 ރަށަކާއެކު މަސައްކަތްތަކެއް ކުރެވެމުންދާއިރު، މެރިކަލްޗަގެ މަސައްކަތްތަކަށް 13 ސަރަހައްދެއް ވަނީ ކަނޑައަޅާފައެވެ.
މި ސަރަހައްދުތަކުގައި އިންވެސްޓްކުރުމަށް ގިނަ ޕްރޮޕޯސަލްތަކެއް ލިބެމުންދާކަން ފާހަގަކުރައްވައި ވަޒީރު ވިދާޅުވީ، އެ ޕްރޮޕޯސަލްތައް އިވެލުއޭޓް ކުރުމުގެ މަސައްކަތް ފެށޭނީ އަންނަ އޮކްޓޯބަރު މަހުގެ ފުރަތަމަ ހަފުތާގައި ގަވާއިދުތައް އެކުލަވާލައި ނިމުމުންނެވެ. އައު ގަވާއިދުތަކާއެކު އިންވެސްޓަރުންނަށް ލުއިތަކެއް ދެވި، ރާއްޖެއަށް ބޮޑެތި އިންވެސްޓްމެންޓްތައް ވަދެގެންދާނެ ކަމަށް ވަޒީރު ޝިޔާމް އިތުރަށް ވިދާޅުވިއެވެ.
