ބޭންކް އޮފް މޯލްޑިވްސް (ބީއެމްއެލް) އަށް ގަނެފައިވާ ޑޮލަރަށްވުރެ އިތުރަށް، ރާއްޖެއިން ބޭރުގެ މުއާމަލާތްތަކަށް 69 މިލިއަން ޑޮލަރު ވިއްކާފައިވާކަން އެ ބޭންކުން ހާމަކޮށްފިއެވެ.
އެ ބޭންކުގެ އެކްސް އެކައުންޓް މެދުވެރިކޮށް އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި، ރާއްޖެއިން ބޭރަށް ފައިސާ ފޮނުވުމަށާއި ކާޑު މުއާމަލާތްތަކަށް ދޫކުރާ ޑޮލަރުގެ މިންވަރު ވަނީ ބޮޑުތަނުން އިތުރުވެފައެވެ. އެގޮތުން، 2025 ވަނަ އަހަރުގެ މުޅި އަހަރު ދުވަހު ބޭރުގެ މުއާމަލާތްތަކަށް ޖުމްލަ 566 މިލިއަން ޑޮލަރު ވިއްކާފައިވާއިރު، މިއީ އެވްރެޖްކޮށް މަހަކަށް 47 މިލިއަން ޑޮލަރެވެ. ނަމަވެސް، 2026 ވަނަ އަހަރުގެ މޭ މަހުގެ ނިޔަލަށް މި އަދަދު ވަނީ ވަރަށް ބޮޑަށް އިތުރުވެފައެވެ. މި އަހަރުގެ ފުރަތަމަ ފަސް މަސްދުވަހުގެ ތެރޭގައި އެކަނިވެސް 345 މިލިއަން ޑޮލަރު ވިއްކާފައިވާއިރު، މިއީ މަހަކަށް އެވްރެޖްކޮށް 69 މިލިއަން ޑޮލަރެވެ.
ޑެބިޓް އަދި ކްރެޑިޓް ކާޑުގެ މުއާމަލާތްތަކަށް ބަލާއިރު، 2025 ވަނަ އަހަރު ޖުމްލަ 390 މިލިއަން ޑޮލަރު ވިއްކާފައިވެއެވެ. އެއީ މަހަކަށް އެވްރެޖްކޮށް 33 މިލިއަން ޑޮލަރެވެ. އޭގެ ބަދަލުގައި، 2026 ވަނަ އަހަރުގެ މޭ މަހުގެ ނިޔަލަށް ކާޑު މުއާމަލާތްތަކަށް 198 މިލިއަން ޑޮލަރު ވިއްކާފައިވާއިރު، މިއީ މަހަކަށް އެވްރެޖްކޮށް 40 މިލިއަން ޑޮލަރެވެ. ބީއެމްއެލްއިން ފާހަގަކުރި ގޮތުގައި، މި މުއްދަތުގެ ތެރޭގައި ޖުމްލަ 3.1 މިލިއަން ކާޑު ޓްރާންސެކްޝަން ހިންގާފައިވެއެވެ. އަދި ހަމައެހެންމެ، މޭ މަހުގެ ނިޔަލަށް ބޭރު ފައިސާގެ އެހީ ފޯރުކޮށްދިނުމުގެ ގޮތުން 45،764 ޓީޓީ ހަދައިދީފައިވާކަންވެސް ތަފާސްހިސާބުތަކުން ދައްކައެވެ.
މީގެ އިތުރުން، 2026 ވަނަ އަހަރުގެ މޭ މަހުގެ ނިޔަލަށް ޔޫއެސް ޑޮލަރުގެ ނެޓް އޯޕަން ޕޮޒިޝަން (އެންއޯޕީ) ހުރީ މައިނަސް 6.6 ޕަސެންޓްގައެވެ. ބޭންކުން ބުނި ގޮތުގައި، މި ނިސްބަތް ހުރީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވާއިދުތަކުން ލާޒިމްކުރާ މިންގަނޑުގެ ތެރޭގައެވެ. ބީއެމްއެލްއިން އިތުރަށް ބުނެފައިވަނީ، ބޭންކަށް ގަނެފައިވާ ޑޮލަރަށްވުރެ އިތުރަށް ޖުމްލަ 59 މިލިއަން ޑޮލަރު މިހާތަނަށް ވިއްކާފައިވާ ކަމަށެވެ.
