ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ނިމިދިޔަ ފެބްރުއަރީ މަހު އާމްދަނީގެ ގޮތުގައި 2.8 ބިލިއަން ރުފިޔާ ލިބިއްޖެއެވެ.
މިއީ މިދިޔަ އަހަރުގެ ފެބްރުއަރީ މަހާ އަޅާބަލާއިރު 0.8 ޕަސެންޓް ދަށް އަދަދެކެވެ. އަދި މިއީ މި އަހަރުގެ ފެބްރުއަރީ މަހު ލިބޭނެ ކަމަށް އަންދާޒާކުރި އަދަދަށްވުރެ 11.6 ޕަސެންޓް ދަށް އަދަދެއް ކަމަށް މީރާގެ ތަފާސްހިސާބުތަކުން ދައްކައެވެ.
މީރާއިން އާންމުކޮށްފައިވާ ފެބްރުއަރީ މަހުގެ އާމްދަނީގެ ރިޕޯޓުގައިވާ ގޮތުން، އާމްދަނީ ދަށްވި މައިގަނޑު ސަބަބަކީ ކުއްޔަށްދީފައިވާ މުއްދަތު އިތުރު ކުރުމުގެ ފީ، އެއާޕޯޓް ޑިވެލޮޕްމަންޓް ފީ އަދި ޓޫރިޒަމް ބިމު ކުލީގެ ގޮތުގައި ލިބުނު އާމްދަނީ ދަށްވުމެވެ. މީގެ އިތުރުން ފެބްރުއަރީ މަހުގެ ޓެކްސް ސުންގަޑިތައް ސަރުކާރު ބަންދު ދުވަސްތަކަކާ ދިމާވުމުގެ ސަބަބުން، އެ ސުންގަޑިތައް މާޗް މަހަށް ފަސްކޮށްފައި ވުމަކީ ވެސް އާމްދަނީ ދަށްވި ސަބަބެއް ކަމަށް އެ އިދާރާއިން ފާހަގަ ކުރެއެވެ. ނަމަވެސް މިދިޔަ އަހަރުގެ ފެބްރުއަރީ މަހާ އަޅާބަލާ އިރު، މި އަހަރުގެ ފެބްރުއަރީ މަހު އެޑްވާންސްކޮށް ފައިސާ ދެއްކި މިންވަރު ވަނީ އިތުރުވެފައި ކަމަށް އެ ހިސާބުތަކުން ދައްކައެވެ.
ޖުމްލަކޮށް ބަލާއިރު ފެބްރުއަރީ މަހުގެ އާމްދަނީ ވަނީ ފާއިތުވި އަހަރުތަކުގައި އެއްވަރެއްގައި ހިފެހެއްޓިފައެވެ. އެގޮތުން 2022 ވަނަ އަހަރުގެ ފެބްރުއަރީ މަހު 1.74 ބިލިއަން ރުފިޔާ ލިބުނުއިރު، 2023 ވަނަ އަހަރު އެ އަދަދު ވަނީ 2.34 ބިލިއަން ރުފިޔާއަށް އިތުރުވެފައެވެ. އަދި 2024 ވަނަ އަހަރު 2.77 ބިލިއަން ރުފިޔާ ލިބުނުއިރު، 2025 ވަނަ އަހަރު ލިބިފައިވަނީ 2.79 ބިލިއަން ރުފިޔާއެވެ. އެހެންކަމުން، މި އަހަރުގެ ފެބްރުއަރީ މަހު ލިބުނު 2.80 ބިލިއަން ރުފިޔާގެ އާމްދަނީން، ފާއިތުވި އަހަރުތަކެކޭ އެއް ވަރެއްގައި ހިފެހެއްޓިފައި ހުރި ކަން ފާހަގަވެއެވެ.
އެންމެ ބޮޑު އާމްދަނީއެއް ޖީއެސްޓީން
ފެބްރުއަރީ މަހު މީރާއަށް ބަލައިގަތް އާމްދަނީގެ އެންމެ ބޮޑު ބައެއް ހިއްސާކުރަނީ މުދަލާއި ހިދުމަތުގެ އަގުން ނަގާ ޓެކްސް (ޖީއެސްޓީ) އެވެ. އެގޮތުން ޖީއެސްޓީގެ ގޮތުގައި 1.4 ބިލިއަން ރުފިޔާ ލިބިފައިވާ އިރު، މިއީ ޖުމްލަ އާމްދަނީގެ 52.3 ޕަސެންޓެވެ. ދެވަނައަށް އެންމެ ބޮޑު އާމްދަނީއެއް ލިބިފައި ވަނީ އިންކަމް ޓެކްސް އިންނެވެ. އެއީ 599.2 މިލިއަން ރުފިޔާ ނުވަތަ ޖުމްލަ އާމްދަނީގެ 21.4 ޕަސެންޓެވެ.
މީގެ އިތުރުން، ގްރީން ޓެކްސްގެ ގޮތުގައި 200.36 މިލިއަން ރުފިޔާ (7.2 ޕަސެންޓް)، ޑިޕާޗާ ޓެކްސްގެ ގޮތުގައި 134.33 މިލިއަން ރުފިޔާ (4.8 ޕަސެންޓް)، އަދި އެއާޕޯޓް ޑިވެލޮޕްމަންޓް ފީގެ ގޮތުގައި 122.56 މިލިއަން ރުފިޔާ ވަނީ ލިބިފައެވެ. އަދި ކުއްޔަށް ދީފައިވާ މުއްދަތު އިތުރުކުރުމުގެ ފީގެ ގޮތުގައި 196.34 މިލިއަން ރުފިޔާ (3.3 ޕަސެންޓް) ލިބިފައިވާ ކަމަށް ތަފާސްހިސާބުތަކުން ދައްކައެވެ. ޖުމްލަ އާމްދަނީގެ ތެރެއިން ޓެކްސްގެ ގޮތުގައި 2.40 ބިލިއަން ރުފިޔާ ލިބިފައިވާ އިރު، ޓެކްސް ނޫން އާމްދަނީގެ ގޮތުގައި ލިބިފައި ވަނީ 395 މިލިއަން ރުފިޔާއެވެ.
ޑޮލަރުން ލިބުނު އާމްދަނީ އަދި ނުލިބި ހުރި ފައިސާ ހޯދުން
ފެބްރުއަރީ މަހު މީރާއަށް ބަލައި ގަތް ޖުމްލަ އާމްދަނީގެ ތެރޭގައި އެމެރިކާ ޑޮލަރުން ލިބުނު 126.85 މިލިއަން ޑޮލަރު ހިމެނެއެވެ. ޑޮލަރުން ލިބުނު އާމްދަނީގެ އެންމެ ބޮޑު ބައެއް ހިއްސާކުރަނީ ފަތުރުވެރިކަމުގެ ދާއިރާއިން ނަގާ ޖީއެސްޓީއެވެ. އެއީ ޑޮލަރުން ލިބުނު އާމްދަނީގެ 59.3 ޕަސެންޓެވެ. ފަތުރުވެރިކަމުގެ ދާއިރާއިން ލިބޭ އާމްދަނީއަކީ ދައުލަތުގެ ބޭރު ފައިސާގެ ރިޒާވް ހިފެހެއްޓުމަށް މުހިންމު ދައުރެއް އަދާކުރާ އެއްޗެކެވެ.
މީރާއިން ހާމަކޮށްފައިވާ ގޮތުގައި، ފެބްރުއަރީ މަހު ލިބުނު އާމްދަނީގެ 19 ޕަސެންޓަކީ ކުރީގެ ސުންގަޑިތަކަށް ފައިސާ ނުދެއްކުމުގެ ސަބަބުން ފަހުން ދައްކާފައިވާ ފައިސާއެވެ. އަދި 16.9 ޕަސެންޓަކީ ނުލިބި ހުރި ފައިސާ ހޯދުމަށް މީރާއިން ކުރި މަސައްކަތްތަކުގެ ތެރެއިން ހޯދި ފައިސާއެވެ.
އެގޮތުން، ނުލިބި ހުރި ފައިސާ ހޯދުމަށް ކުރި މަސައްކަތުން ޖުމްލަ 398.88 މިލިއަން ރުފިޔާ ވަނީ ހޯދާފައެވެ. މީގެ ތެރޭގައި ޑިއުސް ކްލިއަރެންސް މެދުވެރިކޮށް ހޯދި 155.84 މިލިއަން ރުފިޔާއާއި، އިންސްޓޯލްމަންޓް އުސޫލުން ފައިސާ ދެއްކުމަށް އެއްބަސްވެގެން ހޯދި 60.6 މިލިއަން ރުފިޔާ ހިމެނެއެވެ. މީގެ އިތުރުން، ޓެކްސް ނުދައްކާ ފަރާތްތަކަށް ގުޅައިގެން ހަނދާންކޮށްދީގެން 34.44 މިލިއަން ރުފިޔާ ހޯދާފައިވާ އިރު، ބޭންކް އެކައުންޓް ފްރީޒްކޮށްގެން 5.21 މިލިއަން ރުފިޔާ ވަނީ ހޯދާފައެވެ.
މީރާގެ އާމްދަނީގެ ތަފާސްހިސާބުތަކުން ދައްކާ ގޮތުގައި، އަންދާޒާކުރި ވަރަށްވުރެ އާމްދަނީ ދަށްވި ނަމަވެސް، ދައުލަތަށް ލިބެންޖެހޭ ފައިސާ ހޯދުމަށް އެ އިދާރާއިން ދަނީ ގިނަ މަސައްކަތްތަކެއް ކުރަމުންނެވެ. އަންދާޒާކުރި 2.98 ބިލިއަން ރުފިޔާގެ ބަދަލުގައި 2.63 ބިލިއަން ރުފިޔާ ލިބިފައިވުމުން، މިއީ އަންދާޒާކުރި އަދަދުގެ 88 ޕަސެންޓެވެ. ކުރިއަށް އޮތް މަސްތަކުގައި ފަތުރުވެރިކަމުގެ ދާއިރާއިން ލިބޭ އާމްދަނީ އިތުރުވެ، ދައުލަތުގެ އާމްދަނީ ރަނގަޅުވާނެ ކަމަށް މާލީ އިދާރާތަކުން ލަފާކުރެއެވެ.
