ދުނިޔޭގެ ފަތުރުވެރިކަމުގެ ދާއިރާގައި ބާއްވޭ އެންމެ ބޮޑު އަދި އެންމެ ނުފޫޒުގަދަ އެއް މައުރަޒު ކަމަށްވާ "އައިޓީބީ ބާލިން" 2027 ގެ ރަސްމީ ހޮސްޓް ގައުމަކަށް ދިވެހި ރާއްޖެ ހޮވައިފިއެވެ.
މިކަމާ ގުޅިގެން ވިޒިޓް މޯލްޑިވްސް ކޯޕަރޭޝަން އިން ބުނީ މިކަމާ ގުޅޭ ރަސްމީ އެއްބަސްވުމުގައި ސޮއިކުރެވުނީ އައިޓީބީ ބާލިން 2026 ގެ ތެރޭގައި ކަމަށެވެ. މި އެއްބަސްވުމުގައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (ވިޒިޓް މޯލްޑިވްސް)ގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު އަދި ސީއީއޯ އިބްރާހީމް ޝިއުރީއެވެ. މެސޭ ބާލިންގެ ފަރާތުން ސޮއިކުރެއްވީ އެ ކުންފުނީގެ ސީއީއޯ ޑރ. މާރިއޯ ޓޯބިއަސްއެވެ.
އައިޓީބީ ބާލިންގެ ހޮސްޓް ގައުމުގެ ޝަރަފު ލިބުމަކީ ދިވެހިރާއްޖޭގެ ފަތުރުވެރިކަން ދުނިޔޭގެ ފެންވަރުގައި އިޝްތިހާރު ކުރުމަށް ލިބޭ ރަނުގެ ފުރުސަތެއްކަމަށް ވިޒިޓް މޯލްޑިވްސް އިން ވަނީ ބުނެފައެވެ.
ދިވެހިރާއްޖެއަކީ މީގެ ކުރިން 2016 ވަނަ އަހަރުވެސް އައިޓީބީ ބާލިންގެ ހޮސްޓް ގައުމެވެ. މި އެއްބަސްވުމުގެ ދަށުން 2027 ވަނަ އަހަރުގެ މައުރަޒު ހުޅުވުމުގެ ކުލަގަދަ ރަސްމިއްޔާތު ބޭއްވުމުގެ ޒިންމާ އުފުލާނީ ދިވެހިރާއްޖެއިންނެވެ.
ފާހަގަކުރެވޭ ގޮތުގައި އައިޓީބީ ބާލިން 2025ގައި ރާއްޖޭގެ ފަތުރުވެރިކަމުގެ ސިނާއަތުގެ 89 ކުންފުންޏަކުން 200 އަށް ވުރެ ގިނަ މަންދޫބުން ވަނީ ބައިވެރިވެފައެވެ. އައިޓީބީ ބާލިންގައި ބައިވެރިވި ރާއްޖޭގެ ޓީމުން ވަނީ ރާއްޖެއަކީ ދުނިޔޭގެ އެންމެ ކުރީ ސަފުގައިވާ ޓޫރިސްޓް މަންޒިލެއްގެ ގޮތުގައި ޕްރޮމޯޓް ކުރުމާއި އަދި ބައިނަލްއަގްވާމީ ފެންވަރުގައި ޓޫރިޒަމް ދާއިރާގެ ގުޅުންތައް ބަދަހިކުރުމަށް މަސައްކަތް ކުރައްވާފައެވެ.
މި މައުރަޒުގައި ދިވެހިރާއްޖެއިން ވަނީ ގުދުރަތީ ރީތިކަމާއި، ސަގާފަތާއި، މެހެމާންދާރީގެ އިތުރުން ތިމާވެށި ރައްކާތެރިކުރުމަށް ކުރެވޭ މަސައްކަތްތަކުގެ މައްޗަށް އަލިއަޅުވާލާފައެވެ. އަދި ދެމެހެއްޓެނިވި ފަތުރުވެރިކަމުގެ އަމާޒުތަކަށް ވާސިލުވުމަށް ރާވާފައިވާ ޕްރޮގްރާމްތަކާއި މަޝްރޫއުތައްވެސް ވަނީ ތައާރަފުކޮށްފައެވެ.
