ސްޕެއިންގެ މެޑްރިޑުގައި ކުރިއަށްދާ "ފިތޫރު" ފެއާގައި ރާއްޖެއިން ބައިވެރިވެފައިވާކަމަށް ވިޒިޓް މޯލްޑިވްސް ކޯޕަރޭޝަނުން ބުނެފިއެވެ.
ވިޒިޓް މޯލްޑިވްސް ކޯޕަރޭޝަނުން ބުނީ މިއަދުން ފެށިގެން މިމަހުގެ 25އަށް ކުރިއަށްގެންދާ މި ފެއަރއަކީ، މިއަހަރު ރާއްޖެއިން ބައިވެރިވާ އެންމެ ފުރަތަމަ އަދި ބޮޑު ޓްރެވަލް ޓްރޭޑް ފެއާކަމަށެވެ. މި ފެއާގައި ވިޒިޓް މޯލްޑިވްސްއާއިއެކު ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ 22 ފަރާތެއް ބައިވެރިވާކަމަށް ވެސް އެ ކޯޕަރޭޝަނުން ބުނެފައިވެއެވެ.
ވިޒިޓް މޯލްޑިވްސްއިން ބުނީ ފިތޫރަކީ ޓްރެވަލް އެޖެންސީތަކާއި، ހޯލް ސޭލަރުންނާއި، ހޮޓަލުތަކާއި އެކޮމޮޑޭޝަންތަކާއި، އެއާލައިންތަކާއި، ފަތުރުވެރިކަމުގެ ލެޝާ އަދި ކަލްޗަރަލް އެކްސްޕީރިއަންސްތައް ފޯރުކޮށްދޭ ފަރާތްތަކާއި، އެ ދާއިރާގެ އިންފްރާސްޓްރަކްޗާ ތަރައްގީ ކުރާ ފަރާތްތަކާއި، ސްޕެއިންގެ ރަސްމީ ޖަމިއްޔާތަކާއި، ޓްރެވަލް މީޑިއާތައް ބައިވެރިވާ ފެއާއެއްކަމަށެވެ.
މިއަހަރުގެ ފެއާގައި 50،000އަށްވުރެ ގިނަ ވިޔަފާރިވެރިންނާއި ފަންނީ މާހިރުން ބައިވެރިވާ ކަމަށް ވިޒިޓް މޯލްޑިވްސްއިން ބުނެފައިވެއެވެ.
ފެއާގައި ސްޕެއިންގެ ފަތުރުވެރިންގެ މެދުގައި ރާއްޖޭގެ ފަތުރުވެރިކަމުގެ އުފެއްދުންތަކާއި ތަޖުރިބާތަކާ ގުޅޭގޮތުން އިތުރަށް ހޭލުންތެރިކުރުމަށް ހަމަޖެހިފައިވާ ކަމަށް ވެސް ވިޒިޓް މޯލްޑިވްސްއިން ބުނެފައިވެއެވެ.
