ޕާސްތާ ބޮލޮގްނީސް އަކީ އިޓަލީގެ ކެއުންތަކުގެ ތެރެއިން މުޅި ދުނިޔޭގައި ވެސް އެންމެ މަގުބޫލު އެއް ބާވަތެވެ. މިއީ މީރު ރަހަގަނޑަކާއި ފައިދާހުރި މާއްދާތަކެއް އެކުލެވިގެންވާ ތައްޔާރުކޮށްލަން ފަސޭހަ ކެއުމެކެވެ. ހާއްސަކޮށް މީރު މަސްގަނޑަކާއެކު ތައްޔާރުކުރެވޭ މި ޕާސްތާއަކީ ކުދިބޮޑު އެންމެންނަށް ވެސް ކަމުދާނެ މީރު ރެސިޕީއެކެވެ.
ރޯދަމަހު ސުފުރާމަތި ފަޅުފިލުވާލަން މިއީ ރަނގަޅު ކެއުމަކަށްވާނެއެވެ.
ބޭނުންވާ ތަކެތި:
- ޕާސްތާ (ސްޕެގެޓީ ނުވަތަ ބޭނުން ބާވަތެއްގެ ޕާސްތާއެއް)
- ގިތެޔޮމަސް
- 1 ބޮޑު ފިޔާ (ކުދިކޮށް ކޮށާފައި)
- 3 ލޮނުމެދު (ގާނާފައި ނުވަތަ ކުދިކޮށް ކޮށާފައި)
- 1 ކެރެޓް (ކުދިކޮށް ކޮށާފައި)
- 2 ސައިސަމްސާ ޓޮމާޓޯ ޕޭސްޓް
- 1 ދަޅު ޓޮމާޓޯ ޕިއުރޭ ނުވަތަ ކުދިކޮށް ކޮށާފައި ހުރި ޓޮމާޓޯ
- 2 ސޫޕް ސަމްސާ އޮލިވް އޮއިލް
- އަސޭމިރުސް (ރަހަލާވަރަށް)
- 1 ސައިސަމްސާ ހިއްކި އޮރެގާނޯ ނުވަތަ އިޓަލިއަން ސީޒަނިންގް
- ގާނާފައި ހުރި ޗީޒް (މައްޗަށް އަޅާލުމަށް)
ތައްޔާރު ކުރާނެ ގޮތް:
އެންމެ ފުރަތަމަ ބޮޑު ތެއްޔަކަށް ފެން އަޅާ ކުޑަ ލޮނުކޮޅަކާއެކު ކައްކަން އުދާށެވެ. ފެންކައްކަން ފެށުމުން ޕާސްތާ އަޅާ މާ ބޮޑަށް މަޑުނުވާނެހެން ކައްކާލުމަށްފަހު ފެން ފޭދެން ބަހައްޓާށެވެ. އެއަށްފަހު ތަވައަކަށް ތެޔޮފޮދެއް އަޅައި ހޫނުވުމުން ފިޔާ، ލޮނުމެދު އަދި ކެރެޓް އަޅައިގެން ފިޔާކޮޅު ރަންކުލަ އަރަންދެން މީރުކޮށްލާށެވެ.
ދެން މީރުކުރި ތަރުކާރީގެ ތެރެއަށް މަސްކޮޅު އަޅާ މަހުގެ ރޯކަން ކެނޑި މުށިކުލަ އަރަންދެން ރަނގަޅަށް ކައްކާލާށެވެ. ސޯސް ތައްޔާރުކުރުމަށް މަސްކޮޅު ރަނގަޅަށް ކެކުމުން އޭގެ ތެރެއަށް ޓޮމާޓޯ ޕޭސްޓް، ޓޮމާޓޯ ޕިއުރޭ، އޮރެގާނޯ، ލޮނު އަދި އަސޭމިރުސް އަޅައި އެއްކޮށްލާށެވެ. ރަހަ ހެޔޮވަރު ކުރުމަށްފަހު ގިނި މަޑުކޮށްލައިގެން 15 ވަރަކަށް މިނެޓު ވަންދެން ސޯސްގަނޑު އެކުވަންދެން ކައްކާލާށެވެ. (ސޯސްގަނޑު މާ ބޮޑަށް ހިކޭނަމަ ކުޑަ ފެންފޮދެއް އެޅިދާނެއެވެ).
އެއަށްފަހު ޕާސްތާ ތައްޓަކަށް އެޅުމަށްފަހު އޭގެ މައްޗަށް ތައްޔާރުކުރި ބޮލޮގްނީސް ސޯސް އަޅާލާށެވެ. ނުވަތަ ސޯސް ތަވައިގެ ތެރެއަށް ޕާސްތާ އަޅައިގެން އެއްކޮށްލާށެވެ. އެންމެ ފަހުން މައްޗަށް ގާނާފައި ހުރި ޗީޒްކޮޅެއް ބުރުއްސާލުމުން މީރު ޕާސްތާ ބޮލޮގްނީސް ތައްޔާރުވީއެވެ.
