ދިވެހިރާއްޖޭގައި ވަޒީފާ އަދާކުރަން ބިދޭސީން ގެނައުމަށް ދޫކުރާ ދާއިމީ ކޯޓާގެ ސައިޓް އަޕްޑޭޓް ކުރަން ދީފައިވާ މުއްދަތު އަންނަ ޖޫން މަހުގެ 1 އަށް އިތުރުކޮށްފިއެވެ.
ދިވެހިރާއްޖޭގައި ބިދޭސީން ވަޒީފާ އަދާކުރުމާ ބެހޭ ގަވާއިދުގެ ދަށުން ވަޒީފާ ދޭ ފަރާތްތަކަށް އެކްސްޕެޓް ސިސްޓަމް މެދިވެރިކޮށް ދާއިމީ ކޯޓާ (ޕާމަނަންޓް ކޯޓާ) އަދި ޕްރޮޖެކްޓް ކޯޓާ ދޫކުރަމުން އަންނަ އިރު ދާއިމީ ކޯޓާ ދޫކުރުމުގެ އުސޫލުތަކަށް ބަދަލު ގެނެސްފައި ވަނީ މިދިޔަ މަހުގެ 31 ވަނަ ދުވަހުއެވެ.
އެ އުސޫލުގައި ބުނެފައި ވަނީ ދާއިމީ ކޯޓާ ދޫކޮށް ރަޖިސްޓަރީކޮށްފައިވާ ސައިޓްތަކުގެ މައުލޫމާތު އަދާ ހަމަކުރުމުގެ ގޮތުން، މި މަހުގެ 31 ވަނަ ދުވަހުގެ ކުރިން "ވޯކް ސައިޓް ޑިކްލަރޭޝަން ފޯމު" އަދި އިގްރާރު، ރަޖިސްޓަރީކޮށްފައިވާ ސައިޓުގެ" ޑޮކިއުމަންޓް އަޕްޑޭޓް ރިކުއެސްޓް" ނުވަތަ "ސައިޓް ޕާމިޓް އަޕްޑޭޓް" މެދުވެރިކޮށް ހުށަހެޅުމަށް ހުރިހާ ވަޒީފާދޭ ފަރާތްތަކަށް އަންގާ ކަމަށެވެ.
މިއަދު ހޯމް މިނިސްޓްރީން ކުރި އިއުލާންގައި ބުނީ، އެ ލިޔެކިޔުންތައް ހުށަހެޅުމަށް ދީފައިވާ އެއް މަސް ދުވަހުގެ މުއްދަތު އިތުރުކޮށް ދިނުމަށް އެދި ގިނަ ވަޒީފާ ދޭ ފަރާތްތަކުން އެދެމުންދާތީ އެ ލިޔެކިޔުންތައް ހުށަހެޅުމުގެ މުއްދަތު ޖޫން މަހުގެ 1 ވަނަ ދުވަހާ ހަމައަށް އިތުރުކޮށްފައިވާ ކަަމަށެވެ. އަދި ކަނޑައެޅިފައިވާ މުއްދަތުގެ ތެރޭގައި ފޯމު ހުށަނާޅާ ފަރާތްތަކުގެ ސައިޓްތައް ސަސްޕެންޑް ކުރެވޭނެ ކަމަށް ވެސް ހޯމް މިނިސްޓްރީން ބުނެފައި ވެއެވެ.
މި މަހުގެ 1 ވަނަ ދުވަހުން ފެށިގެން ދާއިމީ ކޯޓާ ދޫކުރާ މަސައްކަތްތަކަށް ވޯކް ސައިޓް ރަޖިސްޓްރީ ކޮށްދެވޭނީ، މިހާރު ހުށަހަޅަންޖެހޭ ލިޔެކިޔުންތަކުގެ އިތުރުން ނޮޓޮރައިޒް ކޮށްފައިވާ "ވޯކް ސައިޓް ޑިކްލަރޭޝަން ފޯމު" އަދި އިގްރާރު ހުށަހެޅުމުންނެވެ. މި ފޯމު އަދި އިގްރާރު އެކްސްޕެޓް ސިސްޓަމްގެ ހޯމްޕޭޖުން ލިބެން ހުންނާނެއެވެ.
އަދި ފޯމު ފުރުމަށް ވަޒީފާދޭ ފަރާތްތަކަށް ފަސޭހަކޮށް ދިނުމުގެ ގޮތުން، ފޯމު ފުރުމުގައި އާންމުކޮށް އަންނާނެ ސުވާލުތަކާއި ޖަވާބުތައް (FAQ) އެކްސްޕެޓް ސިސްޓަމް ހޯމްޕޭޖް އިން ލިބެން ހުންނާނެ ކަމަށް ވެސް ހޯމް މިނިސްޓްރީން ބުނެއެވެ.
