މާލޭގެ މަގުތައް ޒަމާނީ ފެންވަރަކަށް ހެދުމުގެ ބޮޑު މަޝްރޫއުގެ ދަށުން، އަމީނީމަގުގެ ސެގްމަންޓް 1 އަދި 2 ގެ މަސައްކަތްތައް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ކާމިޔާބުކަމާއެކު ނިންމައި، މިއަދު އާންމުންނަށް ހުޅުވާލައިފިއެވެ.

މާލޭގެ މަގުތައް ހެދުމުގެ މަޝްރޫއުގެ ދަށުން އަމީނީމަގާއި، އިއްޒުއްދީންމަގު އަދި ބޮޑުތަކުރުފާނުމަގު މަރާމާތުކުރުމުގެ މަސައްކަތްތައް ކުރިއަށްދާއިރު، އެމްޓީސީސީން ހާމަކުރި ގޮތުގައި މި ދެ ސެގްމަންޓް ނިންމައި ހުޅުވާލުމަކީ މި ސަރަހައްދު ބޭނުންކުރާ ރައްޔިތުންނަށް ދަތުރުފަތުރު ކުރުމުގައި ކުރިމަތިވަމުންދިޔަ ދަތިތަކަށް ބޮޑު ލުޔެއް ލިބިގެންދާނެ ކަމެކެވެ.

އެމްޓީސީސީން މަޢުލޫމާތު ދޭ ގޮތުގައި، ސެގްމަންޓް 1 ގެ ދަށުން ކުރިން އަޅާފައިވާ އެގްރިގޭޓް ބޭސް ކޯސް (އޭބީސީ) އަދި ތާރު ނެގުމަށްފަހު، 2،794.062 އަކަމީޓަރުގެ ސަރަހައްދެއްގައި ސަބްގްރޭޑް، ސަބްބޭސް، އޭބީސީ އަދި އަލުން ތާރު އެޅުމުގެ މަސައްކަތް ވަނީ ފުރިހަމަކޮށްފައެވެ. މީގެ އިތުރުން މި ސެގްމަންޓްގައި މަގުމަތީގެ ނިޝާންތައް ކުރެހުމުގެ މަސައްކަތް ވެސް މިހާރު ވަނީ ނިންމާލާފައެވެ. އަދި ސެގްމަންޓް 2 ގެ ދަށުން 133.64 އަކަމީޓަރުގެ ސަރަހައްދެއްގައި ކުރިން އަޅާފައިވާ ތާރު ނެގުމަށްފަހު، އަލުން އޭބީސީ އެޅުމާއި ތާރު އެޅުމުގެ މަސައްކަތް ވެސް ވަނީ ކާމިޔާބުކަމާއެކު ނިންމާލާފައެވެ.

މި ދެ ސެގްމަންޓްގެ މަސައްކަތް ނިމުމާއެކު، މަޝްރޫއުގެ ދެން ހުރި ބައިތަކުގެ މަސައްކަތްތައް ވެސް ބާރަށް ކުރިއަށްދާނެ ކަމަށް އެ ކުންފުނިން ބުނެއެވެ. އެގޮތުން، އިއްޒުއްދީން ހިނގުމުން ފެށިގެން ކޯރުކެނޑި ހިނގުމާ ހަމައަށް ހިމެނޭ ސެގްމަންޓް 3 ގެ ދަށުން، 1،924.77 އަކަމީޓަރުގެ ސަރަހައްދެއްގައި ކުރިން އަޅާފައިވާ ތާރު ނެގުމަށްފަހު އަލުން އޭބީސީއާއި ތާރު އެޅުމާއި، މަގުމަތީގެ ނިޝާންތައް ކުރެހުމުގެ މަސައްކަތް ކުރިއަށްދާނެއެވެ.

މީގެއިތުރުން، ކޯރުކެނޑި ހިނގުމުން ފެށިގެން ގިޔާސުއްދީން އިންޓަނޭޝަނަލް ސްކޫލާ ހަމައަށް ހިމެނޭ ސެގްމަންޓް 4 ގެ ދަށުން، 1،148.91 އަކަމީޓަރުގެ ސަރަހައްދެއްގައި ކުރިން އަޅާފައިވާ ތާރު ނެގުމަށްފަހު އަލުން އޭބީސީއާއި ތާރު އެޅުމާއި، މަގުމަތީގެ ނިޝާންތައް ކުރެހުމުގެ މަސައްކަތް ކުރުމަށް ވަނީ ހަމަޖެހިފައެވެ.

1980 ވަނަ އަހަރު އުފެދުނު އެމްޓީސީސީއަކީ ވޭތުވެދިޔަ 45 އަހަރު ދުވަހުގެ ތެރޭގައި ރާއްޖޭގެ އުމްރާނީ ތަރައްގީ އާއި އިޖުތިމާއީ ވަސީލަތްތައް ބިނާކުރުމުގައި އެންމެ އިސް ދައުރެއް އަދާކޮށްފައިވާ އަދި މިހާރުވެސް އަދާކުރަމުންދާ ކުންފުންޏެވެ. އެ ކުންފުނިން ދަނީ ރާއްޖޭގެ އެކި ކަންކޮޅުތަކުގައި ގިނަގުނަ ތަރައްގީގެ މަޝްރޫއުތައް ކާމިޔާބުކަމާއެކު ހިންގަމުންނެވެ.