ފަތުރުވެރިކަމުގެ ދާއިރާއިން ނަގާ ޖީއެސްޓީ (ޓީޖީއެސްޓީ) ގެ ގާނޫނަށް ފަހުން ގެނެވުނު އިސްލާހުތަކާ ގުޅިގެން އުފެދިފައިވާ ކަންބޮޑުވުންތަކަށް ހައްލެއް ހޯދައިދިނުމުގެ ގޮތުން، އެ ގާނޫނަށް އަވަސް ބަދަލުތަކެއް ގެންނެވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފިއެވެ.
މިކަން ހާމަކުރެއްވީ ގައުމީ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ރަސްމިއްޔާތުގައި މިރޭ ވާހަކަދައްކަވަމުން ޓޫރިޒަމް މިނިސްޓަރު މުހައްމަދު އަމީންއެވެ.
މިދިޔަ އޮގަސްޓު މަހުގެ ފަހުކޮޅު ތަސްދީގުކުރި ޖީއެސްޓީ ގާނޫނުގެ 8 ވަނަ އިސްލާހުގެ ދަށުން، ރާއްޖެއިން ބޭރުގެ ޓްރެވަލް އެޖެންޓުންގެ އަތުން ޓެކްސް ނަގަން ފެށުމާއެކު ސިނާއަތުގެ ގިނަ ފަރާތްތަކަކުން ވަނީ އެކަމުގަ ހުރި ކަންބޮޑުވުންތަކާއެކު ޝަކުވާ ކޮށްފައެވެ. އެގޮތުން ޔޫރަޕުގެ ޓުއާ އޮޕަރޭޓަރުންނާއި އެޖެންޓުންގެ ޖަމިއްޔާތަކުން ވަނީ، މި އުސޫލަށް އަމަލުކުރުމަށް ދީފައިވާ މުއްދަތު ކުރުވުމާއި އެހެނިހެން ދަތިތަކާ ހުރެ، އެ ނިންމުން ފަސްކޮށްދިނުމަށް އެދި ސަރުކާރަށާއި މީރާއަށް ހުށަހަޅާފައެވެ.
މިކަމަށް ރިޔާއަތް ކުރައްވާ ވާހަކަ ދައްކަވަމުން މިނިސްޓަރު އަމީން ވިދާޅުވީ ޑެސްޓިނޭޝަން ޕްރިންސިޕަލްގެ ދަށުން ގެނައި ބަދަލުތަކާ ގުޅިގެން ވިޔަފާރިވެރިންގެ ފަރާތުން ރައީސުލްޖުމްހޫރިއްޔާއަށް ގިނަ ހުށަހެޅުންތަކެއް ލިބިފައިވާ ކަމަށެވެ. އަދި އިންޑަސްޓްރީގެ އެދުމަށް އިޖާބަދެއްވައި، އެ ގާނޫނަށް އަވަސް އިސްލާހުތަކެއް ގެނައުމަށް ރައީސް ނިންމަވާފައިވާ ކަމުގެ ޔަގީންކަން މިނިސްޓަރު ދެއްވިއެވެ.
މިދިޔަ އޮގަސްޓު މަހުގެ 31 ވަނަ ދުވަހު ރައީސުލްޖުމްހޫރިއްޔާ ތަސްދީގުކުރެއްވި މި އިސްލާހަކީ ދައުލަތަށް ލިބެންޖެހޭ އާމްދަނީ އިތުރުކޮށް، ޓެކްސް ނިޒާމު ހަރުދަނާކުރުމަށް ސަރުކާރުން ގެނައި ބަދަލެކެވެ. 'ޑެސްޓިނޭޝަން ޕްރިންސިޕަލް' ގެ ދަށުން ގެނެވުނު މި ބަދަލުގެ ސަބަބުން ރާއްޖޭގައި ދާއިމީ ތަނެއް ނެތް އޮފްޝޯ ބުކިން ޕްލެޓްފޯމުތަކާއި ބޭރުގެ ޓުއާ އޮޕަރޭޓަރުން ވިއްކާ އެކޮމޮޑޭޝަނާއި، ކެއުމާއި އަދި ދަތުރުފަތުރު ފަދަ އިންބައުންޑް ޓޫރިޒަމް ޕްރޮޑަކްޓުތަކުން ޖީއެސްޓީ ނެގުން ވަނީ ލާޒިމުކޮށްފައެވެ. ސަރުކާރުން ކުރިން ލަފާކޮށްފައިވަނީ މި ބަދަލާއެކު ދައުލަތުގެ އާމްދަނީއަށް އަހަރަކު ގާތްގަނޑަކަށް 1.6 ބިލިއަން ރުފިޔާ އިތުރުވާނެ ކަމަށެވެ.
