ދިވެހިރާއްޖޭގެ ގާނޫނުއަސާސީ އާއި ވެރިކަން ހިންގުމުގެ ނިޒާމަށް ބޮޑެތި އިސްލާހުތަކެއް ގެނައުމަށް އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއިލް ހުށަހެޅުއްވި "ބޮޑު ބަދަލު" ސިޔާސަތު، އެ ޕާޓީގެ ކޮންގްރެސްގެ ބޮޑު އަޣުލަބިއްޔަތަކުން ފާސްކޮށްފިއެވެ.
މިހާރު ކުރިއަށްދާ އެމްޑީޕީ ކޮންގްރެސްގައި މި ހުށަހެޅުން ހުށަހަޅުއްވާފައި ވަނީ މިއަދުގެ މެންދުރުފަހު ދަންފަޅީގައެވެ. އެ ގަރާރަށް ތާއީދު ކުރެއްވީ އެމްޑީޕީގެ މެންބާޝިޕް ކޮމިޓީގެ ކޯ ޗެއާ އަދި ރައްޔިތުންގެ މަޖިލީހުގެ ހުޅުދޫ ދާއިރާގެ ކުރީގެ މެންބަރު އިލްޔާސް ލަބީބްއެވެ. ޖުމްލަ 520 ވޯޓުން ފާސްކުރި މި ގަރާރުގެ މައިގަނޑު މަގުސަދަކީ ގާނޫނުއަސާސީއަށާއި ވެރިކަމުގެ ވައްޓަފާޅިއަށާއި މަޖިލީހަށް ރައްޔިތުންގެ ބައިވެރިވުން އިތުރުކޮށް، އިގުތިސާދީ ފުދުންތެރިކަން ވަރުގަދަ ކުރުމެވެ.
މި ގަރާރުގައި ހިމެނޭ ކަންކަމަށް ބަލާއިރު ދައުލަތުގެ ވެރިޔާ އާއި ސަރުކާރުގެ ވެރިޔާ ވަކިކޮށް، އެ މަގާމުތަކަށް މީހުން އައްޔަންކުރާ އުސޫލު ބަދަލު ކުރުން ހިމެނެއެވެ. އެގޮތުން، ސަރުކާރުގެ ވެރިޔާ ރައްޔިތުންގެ ސީދާ ވޯޓަކުން އިންތިހާބު ކުރާއިރު، ދައުލަތުގެ ވެރިޔާ އިންތިހާބު ކުރުމަށް ހަމަޖެހިފައިވަނީ ރައްޔިތުންގެ މަޖިލީހާއި ކައުންސިލްތަކުން ނަގާ ވޯޓަކުންނެވެ.
މީގެ އިތުރުން، މިނިވަން މުއައްސަސާތަކާއި ފަނޑިޔާރުގެއަށް ސިޔާސީ ނުފޫޒު ފޯރުވުން ހުއްޓުވުމަށްޓަކައި، ސުޕްރީމް ކޯޓުގެ ފަނޑިޔާރުންނާއި މިނިވަން ކޮމިޝަންތަކުގެ މެންބަރުން ވަކި ކުރުމަށް ރައްޔިތުންގެ ރުހުން ހޯދަންޖެހޭ ގޮތަށް ހަމަޖެއްސުމަށް ވެސް މި ގަރާރުގައި ހުށަހަޅާފައިވެއެވެ. އަދި ރައްޔިތުންގެ މަޖިލީހުގައި އަތޮޅުތައް ރަނގަޅަށް ތަމްސީލުކުރުމުގެ ފުރުސަތު ދިނުމާއި، މަޖިލިސް މެންބަރުންގެ މަސައްކަތް ރަނގަޅު ނޫންނަމަ ރައްޔިތުންނަށް އެ މެންބަރުން ރިކޯލް ކުރުމުގެ ބާރު ލިބޭ ގޮތަށް ކަންކަން ބަދަލުކުރުމަށް ވެސް ވަނީ ހިމަނާފައެވެ.
ކޮންގްރެސްއަށް މި ގަރާރު ހުށަހަޅުއްވަމުން ފައްޔާޒު ވިދާޅުވެފައި ވަނީ، މިހާރު އޮތް ނިޒާމުގައި ރައްޔިތުންގެ ހައްގުތަކަށް ވުރެ ވެރިމީހާގެ ބާރުތައް މާބޮޑަށް އިތުރުވެފައިވާ ކަމަށެވެ. ހާއްސަކޮށް ސަރުކާރުން މަޖިލީހުގެ ސުޕަ މެޖޯރިޓީ ބޭނުންކޮށްގެން ގާނޫނު އަސާސީގެ ޗެކްސް އެންޑް ބެލެންސެސްގެ ނިޒާމު ނައްތާލަމުންދާކަން ފާހަގަކުރައްވައި، ރައްޔިތުންގެ ހައްގުތައް ކަށަވަރުކުރުމަށްޓަކައި މި ހިންގުމުގެ ނިޒާމާމެދު އަލުން ވިސްނާ ފިކުރުކުރަންޖެހިފައިވާ ކަމަށް އޭނާ ވިދާޅުވެފައި ވެއެވެ.
ފައްޔާޒު އިތުރަށް ވިދާޅުވީ، ދިވެހި ދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިން ކަމަށާއި އަދި އެ ބާރުތައް ދެމި އޮންނާނީ ވެސް ރައްޔިތުންގެ ކިބައިގައި ކަމަށް ގާނޫނު އަސާސީގައި ބުނެފައިވާއިރު ރައްޔިތުން ތަމްސީލުވާ މިންވަރާ ރައްޔިތުންގެ ބަސް ސީދާ އިއްވޭ މިންވަރު މިހާރު ވަނީ ވަރަށް ބޮޑަށް ކުޑަ ކޮށްލާފައި ކަމަށެވެ.
