ދުބާއީން ފުރައިގެން އިޒްރޭލަށް މިދިޔަ ބުދަ ދުވަހު ދަތުރުކުރި ފްލައިދުބާއީގެ ފްލައިޓެއް ހައިޖެކްކޮށް، ޓެރަރިސްޓް ހަމަލާއެއް ދޭން އުޅުނު މައްސަލައިގެ ތަހުގީގަށް ޔުނައިޓެޑް އަރަބް އެމިރޭޓްސް (ޔޫއޭއީ) ގައި ދެ ދިވެއްސަކާ ސުވާލުކޮށްފިއެވެ. މި މައްސަލައިގެ ތަހުގީގަށް ދެ ދިވެހިންނާ ސުވާލުކޮށްފައިވަނީ ރޭގެ ވަގުތެއްގައެވެ.
މިކަމާ ގުޅޭގޮތުން މައުލޫމާތު ދެއްވަމުން ސަރުކާރުގެ ތަރުޖަމާނު މުހައްމަދު ހުސައިން ޝަރީފް (މުންދު) ވިދާޅުވީ، ފްލައިދުބާއީ އެއާލައިންގައި 8 ދިވެހިން މަސައްކަތް ކުރަމުންދާ ކަމަށެވެ. އަދި އޭގެ ތެރެއިން 6 މީހުންނަކީ ޕައިލެޓުންނާއި ކޯ-ޕައިލެޓުން ކަމަށާއި، މި ހާދިސާގެ ތަހުގީގަށް ރޭ ސުވާލުކޮށްފައިވަނީ އެ އެއާލައިންގައި މަސައްކަތްކުރާ ދެ ޕައިލެޓުންނާ ކަމަށް މުންދު ފާހަގަކުރެއްވިއެވެ.
މުންދު އިތުރަށް ވިދާޅުވީ، މި ހާދިސާއާ ގުޅިގެން އެއްވެސް ދިވެއްސަކު ހައްޔަރުކުރި ކަމުގެ މައުލޫމާތެއް މިހާތަނަށް ލިބިފައި ނުވާ ކަމަށެވެ. ނަމަވެސް ތަހުގީގަށް ދެ ދިވެއްސަކާ ސުވާލުކޮށްފައިވާކަން ކަށަވަރުކޮށްދެއްވަމުން، މި މައްސަލައިގައި ޔޫއޭއީ ސަރުކާރު މެދުވެރިކޮށް އިތުރު މައުލޫމާތު ހޯދުމުގެ މަސައްކަތް ކުރަމުންދާ ކަމަށް ވިދާޅުވިއެވެ.
ބައިނަލްއަގުވާމީ މީޑިއާތަކުން ރިޕޯޓްކޮށްފައިވާ ގޮތުގައި، 170 އަށް ވުރެ ގިނަ ފަސިންޖަރުންނާއެކު ދުބާއީން ތެލް އަވީވަށް ދަތުރުކުރި އެ ފްލައިޓުގެ ކޮންޓްރޯލް އަތުލަން މަސައްކަތްކޮށްފައިވަނީ އެ ފްލައިޓުގެ ކޯ-ޕައިލެޓެވެ. ޔޫއޭއީގެ ޕްރޮސެކިއުޓާ ޖެނެރަލް ހާމަކުރެއްވި ގޮތުގައި، ކޯ-ޕައިލެޓް ވަނީ ކޮކްޕިޓްގައި އޮންނަ ކުއްލި ހާލަތްތަކުގައި ބޭނުންކުރާ ކޯރާޑިއަކުން (ކްރޭޝް އެކްސް) ފްލައިޓުގެ ކެޕްޓަނަށް ހަމަލާދީ، ޓެރަރިސްޓް އަމަލެއް ހިންގަން މަސައްކަތްކޮށްފައެވެ.
މި ހާދިސާ ހިނގި ވަގުތު ބޯޓު ވަނީ ކުއްލިއަކަށް 17،000 ފޫޓަށް (5،200 މީޓަރަށް) ތިރިއަށް ވެއްޓެން ފަށާފައެވެ. ނަމަވެސް ޒަހަމްވެފައި އޮތް ކެޕްޓަން ސުމިތު މަޗާރު ހިތްވަރުކޮށްފައި ކޮކްޕިޓްގެ ދޮރު ހުޅުވުމުން، ފަސިންޖަރުން އެތެރެއަށް ވަދެ ހަމަލާދިން ކޯ-ޕައިލެޓް ހިފަހައްޓައި ބޯޓު ކޮންޓްރޯލް ކުރިއެވެ. އަދި ބޯޓުގައި ތިބި ރިޒާވް ދެ ޕައިލެޓުންގެ އެހީތެރިކަމާއެކު ބޯޓު ވަނީ ސައޫދީ އަރަބިއްޔާއަށް ސަލާމަތްތެރިކަމާއެކު ޖައްސާފައެވެ.
ޔޫއޭއީގެ އެޓާނީ ޖެނެރަލް ހަމަދު ސައިފް އަލް ޝަމްސީ ވިދާޅުވީ، މި ހާދިސާ ހިނގަން މެދުވެރިވި ސަބަބާއި، މިކަމުގެ ފަހަތުގައިވާ މަގުސަދުތައް ހޯދުމަށް ތަހުގީގު ކުރިއަށްދާ ކަމަށެވެ.
