ހުޅުމާލޭގައި ދިރިއުޅޭ އިސްރަށްވެހިންގެ ދުޅަހެޔޮކަން އިތުރުކޮށް، އިޖުތިމާއީ ގުޅުންތައް ބަދަހިކުރުމުގެ މަގްސަދުގައި "ދުޅަހެޔޮ އިސްރަށްވެހިން"ގެ ނަމުގައި ހާއްސަ ޕްރޮގްރާމެއް ފަށައިފިއެވެ.
މިއީ ހައުސިންގް ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ހެލްތު މިނިސްޓްރީ ގުޅިގެން ކުރިއަށްގެންދާ ޕްރޮގްރާމެކެވެ.
މިއަހަރުގެ އިސްރަށްވެހިންގެ ދުވަސް ފާހަގަކުރުމުގެ ގޮތުން މިއަދު ހެނދުނު ހުޅުމާލޭ ސެންޓްރަލް ޕާކުގައި ބޭއްވި ހާއްސަ ހަރަކާތެއްގައި މި ޕްރޮގްރާމު ރަސްމީކޮށް އިފްތިތާހުކޮށްދެއްވީ މިނިސްޓާ އޮފް ހެލްތު ވެލްފެއާ އެންޑް ފެމިލީ، ގީލާ އަލީއެވެ.
މި ޕްރޮގްރާމަކީ ގިނަ އިސްރަށްވެހިން އަބަދު ގޭގައި ތިބެންޖެހުމާއި، އިޖުތިމާއީ ހަރަކާތްތަކުން އެކަހެރިވުން ނައްތާލައި، އެފަރާތްތަކަށް އުފާވެރި އަދި ހަރަކާތްތެރި މާހައުލެއް ގާއިމުކޮށްދިނުމަށް ރޭވިފައިވާ ހަރަކާތެކެވެ. މި ޕްރޮގްރާމުގައި ބައިވެރިވުމަށް އެދޭ އިސްރަށްވެހިންނަށް ރަޖިސްޓްރޭޝަނާއި ސެޝަންތައް ހަމަޖެހިފައިވަނީ މުޅިން ހިލެއެވެ.
މި ޕްރޮގްރާމުގެ ދަށުން ކޮންމެ ހަފްތާއަކު ތިން ދުވަހު އިސްރަށްވެހިންގެ އުމުރާ ގުޅޭގޮތަށް ފަރުމާކޮށްފައިވާ ލުއި ކަސްރަތުތަކާއި، ހިނގުމާއި، ސްޓްރެޗިންގ އަދި ނޭވާލުމުގެ ކަސްރަތުތައް ކުރިއަށްދާނެއެވެ. މީގެ އިތުރުން "ގޯލްޑަން އަވާ"ގެ ނަމުގައި ހަފްތާއަކު އެއްފަހަރު ނުވަތަ ދެ ހަފްތާއިން އެއް ދުވަހު އިސްރަށްވެހިންނަށް ހާއްސަ ހަވީރުގެ ސައެއް ބޭއްވުމަށް ވަނީ ހަމަޖެހިފައެވެ.
ހަމައެއާއެކު، މަހަކު އެއްފަހަރު ކުޑަގިރި ނުވަތަ ކައިރި ހިތްފަސޭހަ އެހެން ރަށަކަށް ދަތުރުދިއުމާއި، އަހަރުގެ ކޮންމެ ކުއާޓަރެއްގައި ލޭގެ ޕްރެޝަރު ބެލުން ފަދަ މެޑިކަލް ޗެކަޕްތައް ހެދުން ކުރިއަށްދާނެއެވެ. އަދި ކުޑަކުދިންނާއި ޒުވާނުންނަށް އިސްރަށްވެހިންގެ ފަރާތުން ސަގާފީ މައުލޫމާތުތައް ހިއްސާކުރުމުގެ ހަރަކާތްތައްވެސް މި ޕްރޮގްރާމުގެ ތެރޭގައި ހިމެނެއެވެ.
މި ހުރިހާ ހަރަކާތެއްގައިވެސް ބައިވެރިންގެ ރައްކާތެރިކަމާއި ސިއްހީ ހާލަތަށް ހާއްސަ ސަމާލުކަމެއް ދެވޭނެއެވެ. އެގޮތުން ދަތުރުފަތުރުގެ އިންތިޒާމުތަކުގެ އިތުރުން ސެޝަންތައް ކުރިއަށްދާއިރު ފަސްޓްއެއިޑްގެ ހިދުމަތާއި، ބޯފެނާއި އަރާމުކުރެވޭނެ އިންތިޒާމުތައް ވަނީ ހަމަޖައްސާފައެވެ.
މި ޕްރޮގްރާމަކީ އެޗްޑީސީ އާއި ހެލްތު މިނިސްޓްރީގެ އިތުރުން ހުޅުމާލެ ހޮސްޕިޓަލް، މޯލްޑިވްސް ޕޮލިސް ސަރވިސް، ފިޒިއޯ ސޮލިއުޝަންސް، ޕެންޝަން އޮފީސް، އެމްޓީސީސީ، އުރީދޫ އަދި އެކިއެކި ޖަމިއްޔާތަކުގެ އެއްބާރުލުމާއެކު ކުރިއަށްގެންދާ ޕްރޮގްރާމެކެވެ. އެޗްޑީސީގެ އަމާޒަކީ މި ޕްރޮގްރާމްގެ ސަބަބުން އިސްރަށްވެހިންގެ ސިއްހީ އަދި ނަފްސާނީ ދުޅަހެޔޮކަން އިތުރުވެ، ހުޅުމާލެއަކީ ހުރިހާ އުމުރެއްގެ މީހުންނަށްވެސް އުފަލާއެކު ދިރިއުޅެވޭނެ ހިތްފަސޭހަ މާހައުލަކަށް ހެދުމެވެ.
