ރާއްޖޭގެ އެކި ކަންކޮޅުތަކުގައި ސިއްހީ ހިދުމަތްތައް ފުޅާކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، މިހާތަނަށް 11 ރަށެއްގައި ޑަޔަލިސިސްގެ ހިދުމަތް އަލަށް ފެށިފައިވާ ކަމަށް ހެލްތް، ފެމިލީ އެންޑް ވެލްފެއާ މިނިސްޓަރު ގީލާ އަލީ ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މައުލޫމާތު ދެއްވަމުން މިނިސްޓަރު ވިދާޅުވީ، އަތޮޅުތެރޭގައި ދިރިއުޅޭ ކިޑްނީގެ ބަލިތަކަށް ފަރުވާ ހޯދާ މީހުންނަށް އަމިއްލަ ރަށުން ނުވަތަ ކައިރި ރަށަކުން ފަސޭހަކަމާއެކު ޑަޔަލިސިސް ހެދޭނެ އިންތިޒާމު ހަމަޖެއްސުމަކީ ސަރުކާރުގެ މުހިންމު އަމާޒެއް ކަމަށެވެ.
މިނިސްޓަރު ގީލާ ވިދާޅުވީ އިތުރު 9 ރަށެއްގައި އެ ހިދުމަތް ގާއިމުކުރުމުގެ މަސައްކަތް ކުރުމަށް ނިންމާފައިވާކަމަށެވެ.
އިތުރަށް ގީލާ ވިދާޅުވީ ކެތް-ލެބްގެ ހިދުމަތް މިވަގުތު ވެސް އައްޑޫ އިކުއިޓޯރިއަލް ހޮސްޕިޓަލާއި ކުޅުދުއްފުށީ ރީޖަނަލް ހޮސްޕިޓަލުން ލިބެމުންދާކަމަށާއި، 12 ހޮސްޕިޓަލެއްގެ މެޝިނުތައް އާ ކުރެވި 15 އަތޮޅު ހޮސްޕިޓަލުގައި ޑެންޓަލް އޯޕީޖީގެ ހިދުމަތް ފުޅާކުރުމަށް މަސައްކަތް ކުރެވެމުންދާކަމަށެވެ.
ކުޅުދުއްފުށީ ރީޖަނަލް ހޮސްޕިޓަލުގައި ޑަޔަލިސިސް ހިދުމަތް 4 އެނދުން 10 އެނދަށް އިތުރުކޮށް، އީއާރުގެ ހިދުމަތް ފުޅާކޮށްފައިވާކަން ފާހަގަކުރައްވާ ގީލާ ވިދާޅުވީ އައިސޮލޭޝަން އިމާރާތުގެ އަމަލީ މަސައްކަތް މި އަހަރުގެ ނިޔަލަށް ނިންމުމަށް މަސައްކަތް ކުރަމުންދާކަމަށާއި، ހޮސްޕިޓަލް ޓާޝަރީ ފެންވަރަށް ގެނައުމަށް އަޅާ އާ އިމާރާތުގެ މަސައްކަތް އެމްޓީސީސީއާ ހަވާލުކޮށްފައިވާކަމަށެވެ.
