ދިވެހިރާއްޖޭގައި ނުރައްކާތެރި ކެމިކަލް ވިއްކާ ފަރާތްތަކުން "ކެމިކަލް ވިއްކުމުގެ ހުއްދަ" ނެގުމަށާއި، ކެމިކަލް ގުދަންކުރާ ތަންތަން ރަޖިސްޓްރީ ކުރުމަށް ދީފައިވާ މުއްދަތު އިތުރު އެއް މަސްދުވަހަށް އިތުރުކޮށްދީފި ކަމަށް މިނިސްޓްރީ އޮފް ޑިފެންސުން ހާމަކޮށްފިއެވެ.
ޑިފެންސް މިނިސްޓްރީން މިއަދު ނެރުނު އިއުލާނެއްގައި ބުނީ، ރާއްޖޭގައި ނުރައްކާތެރި ކެމިކަލް ވިއްކުމަށް ހުއްދަ ނެގުމަށާއި އަދި އެފަދަ ކެމިކަލްތައް ސްޓޯރ ކުރާ ނުވަތަ ބަހައްޓާ ތަންތަން "މަކުޑި" ޕޯޓަލް މެދުވެރިކޮށް ރަޖިސްޓަރ ކުރުމަށް ކުރިން ދީފައިވާ މުއްދަތު މިހާރު ހަމަވެފައިވާ ކަމަށެވެ. ނަމަވެސް، އެ މުއްދަތުގެ ތެރޭގައި ކެމިކަލް ވިއްކާ ފިހާރަތައް ރަޖިސްޓްރީ ކުރުމާއެކު ހުއްދައަށް އެދުނު ފަރާތްތަކުގެ އަދަދު ނިސްބަތުން ވަރަށް މަދުކަން އެ ވުޒާރާއަށް ފާހަގަކުރެވިފައިވާ ކަމަށް އިއުލާނުގައި ބަޔާންކޮށްފައި ވެއެވެ.
އެހެންކަމުން، ނުރައްކާތެރި ކެމިކަލް ވިއްކާ ފަރާތްތަކުން އެ ހުއްދަ ނެގުމަށާއި ކެމިކަލް ބަހައްޓާ ތަންތަން މަކުޑި ޕޯޓަލްގައި ރަޖިސްޓާ ކުރުމަށް މިއަދުން ފެށިގެން އެއް މަސް ދުވަހުގެ އިތުރު ފުރުސަތެއް ދިނުމަށް މިހާރު ވަނީ ނިންމާފައި ކަމަށް އެ މިނިސްޓްރީން ބުނެއެވެ.
މިނިސްޓްރީން އިތުރަށް ބުނީ، އަލަށް ދެވުނު މުއްދަތުގެ ތެރޭގައި ރަޖިސްޓަރީ ނުކޮށް ކެމިކަލް ވިއްކަމުންދާ ފަރާތްތަކާ މެދު "ނުރައްކާތެރި ކެމިކަލާބެހޭ ގަވާއިދު 2019" ގެ ދަށުން ހަރުކަށި ފިޔަވަޅު އަޅާނެ ކަމަށެވެ. އަދި އެފަދަ ފަރާތްތަކަށް ކުރިއަށް އޮތް ތަނުގައި ނުރައްކާތެރި ކެމިކަލް ރާއްޖެ އެތެރެކުރުމުގެ ހުއްދަ އިތުރަށް ނުދެވޭނެ ކަމަށްވެސް ޑިފެންސް މިނިސްޓްރީން ވަނީ އިންޒާރު ދީފައެވެ.
