މާލޭގައި ދިރިއުޅެމުން އަންނަ ތ. ވިލުފުށީ ހަލީމަތު ޒޫނާ އަބްދުﷲ (43އ) އާއި އޭނާގެ ފިރިމީހާ އަބްދުﷲ ޝިހާމް (އައްޑޫމީދޫ / ސައިމާގެ) އަކީ ގެ އުފާވެރި ދިރިއުޅުން ބަދަލުވެގެން ދިޔައީ ކުއްލިއަކަށެވެ. ފިރިމީހާއަށް ލިބޭ ކުޑަ އާމްދަނީން ހަރަދު ބަލަހައްޓައިގެން މާލޭގައި ދިރިއުޅެން އޭނާއަށް މަޖުބޫރުވެފައިވަނީ އޭނާގެ ސިއްހީ ހާލަތުގެ ސަބަބުންނެވެ. ދަރިއަކު ނެތި އެކަނި އުޅެމުން ދިޔަ ނަމަވެސް އެ ދެމަފިރިންގެ ދިރިއުޅުން އުފާވެރިއެވެ.
ޒޫނާއަކީ ގިނަ އަހަރުތަކެއް ވަންދެން ޓައިޕް 2 ޑައިބެޓީޒް (ހަކުރުބަލި) އާ ހަނގުރާމަކުރަމުން އައި ހިތްވަރުގަދަ އަންހެނެކެވެ. މީގެ ކުރިން ހިތުގެ ބައްޔަށް ފަރުވާ ހޯދާފައިވާ ޒޫނާ ހަކުރުބަލީގެ ވޭނުގައި އުޅެނިކޮށް އޭނާގެ ފައިތިލައިގައި އުފެދުނު ކުޑަކުޑަ ފާރުކޮޅެއް، ކުއްލިއަކަށް ބޮޑުވެ، ވަޅުގަނޑެއް ހެދި، ދޮސް ފައިބަން ފެށިއެވެ. ކުރު މުއްދަތެއްގެ ތެރޭގައި އެ ފާރުގަނޑު މުޅި ފައިގެ ދަށްފުށަށް ފެތުރި، ފައިތިލައިގެ ދެބައިކުޅަ އެއްބައި ވަނީ މުޅިން ހަލާކުވެފައެވެ.
"އެންމެ ފުރަތަމަ ފައިގެ ދަށްފުށުގައި ހުރީ ހަރުވެފައި އިން ތަންކޮޅެއް. އެ ތަންކޮޅު ފާރުވެގެން އައިޖީއެމްއެޗަށް ދެއްކީމަ ފުރަތަމަ ސާފުކޮށްފަ ބޭސްއެޅީ. އެކަމަކު އެތަނުގެ ބޭސް ބަދަލުކުރަން ދިޔަ ދުވަހު އެގުނީ ފާރުގަނޑު ރަނގަޅުނުވެ މާ ބޮޑަށް ސަކަރާތްކަން. އެހެންވެ ޑޮކްޓަރުންގެ އިރުޝާދާއެކު ކުޑަ ސާޖަރީއެއް ހެދީ" ޒޫނާގެ އާއިލާއިން މައުލޫމާތުދިން އާމިނަތު ޝިހާމް ބުންޏެވެ.
އެ ސާޖަރީއަށްފަހުވެސް ފައި ރަނގަޅު ނުވެގެން އައިޖީއެމްއެޗް އިން އިތުރު 2 އޮޕަރޭޝަނެއްވެސް ކުރިކަން ފާހަގަކޮށް އާމިނަތު ޝިހާމް ބުނީ ހަތަރުވަނަ ފަހަރަށް އޮޕަރޭޝަން ކުރަން ނިންމީ ސެޕްޓެމްބަރު މަހު 19 ވަނަ ދުވަހު ކަމަށެވެ. އެހެންނަމަވެސް އެ ދުވަހު ތިއޭޓަރުން ޖާގަ ނުލިބިގެން އޮޕަރޭޝަން ނުކުރެވި މިއަދާ ހަމައަށްވެސް ޒޫނާ އޮތީ އައިޖީއެމްއެޗް ހޮސްޕިޓަލުގައެވެ.
"ކޮންމެ ދުވަހަކުވެސް ބޭސްގަނޑު ބަދަލުކުރޭ. އެކަމަކު މިހާރު މުޅި ފަޔަށް އެ ފާރުގަނޑު ފެތުރި ފައިތިލަވެސް ކަޅުވާން ފަށައިފި. މިތަނުން އިތުރު މާ ބޮޑު ފަރުވާއެއް ނުލިބޭ. ބޭނުންވަނީ އިންޑިއާއަށް ފުރަން. އެކަމަކު އެކަމަށް ބޭނުންވާ ލިޔުންތައް ނުލިބިގެން އާސަންދަވެސް ހަމަނުޖެހޭ. ޒޫނާގެ ބަލި ހާލަތު ހުރި ގޮތުން މާލޭގައި ދިރިއުޅެނީ އަޅުގަނޑުގެ ބޭބެ އަށް ލިބޭ މަދު އާމްދަނީއިން ދެކޮޅު ޖައްސައިގެން. މިވަގުތު މިހާ ބޮޑު ހަރަދެއް ކުރާނެ ތަނަވަސްކަމެއް ބޭބެގެވެސް އަދި އަޅުގަނޑުމެންގެ އާއިލާއަކުވެސް " އާމިނަތު ޝިހާމް ބުންޏެވެ.
ޒޫނާ އަކީ ޓައިޕް 2 ހަކުރުބަލީގެ މީހެއްގެ އިތުރުން ހިތުގެ ނާރުތައް ހިމަވުމުގެ ސަބަބުން ސްޓެންޓް ލައްވާފައިވާ މީހެކެވެ. އެހެންކަމުން އޭނާއަށް އިތުރު ސިއްހީ މައްސަލައެއް ކުރިމަތިވެދާނެތީވެސް އާއިލާއިން ކަންބޮޑުވެއެވެ. ޒޫނާގެ ފަޔަށް އެކަށީގެންވާ ފަރުވާ ނުލިބި ލަސްވާ ކޮންމެ ދުވަހަކީ އޭނާގެ ފަޔަށް އިތުރު ގެއްލުންތައް ލިބެމުން އަންނަ ދުވެހެކެވެ.
މިހާރު އޭނާގެ ފައިތިލައިގެ އަރިމަތިން ފެށިގެން ދަށްފަރާތަށް (އަޑިއަށް) ފެތުރިފައިވާ، ފާރުގަނޑުގެ މަސްކޮޅުތަކާއެކު ދޮސް އުފެދިގެން އޮހޯރެމުން އަންނައިރު ފައިގެ އެ ސަރަހައްދުގެ މަސްތައްވަނީ މަރުވެފައެވެ. އަދި ފާރު ގަނޑުގެ ކައިރިފަށުން ދިޔަ އާއި ލޭ އައުމުގެ އިތުރުން ފައިގެ އިނގިލިތަކަށްވެސް ވަނީ އަސަރުކޮށްފައެވެ. މިހާރު ޒުނާއަށް މީހެއްގެ އެހީތެރިކަމާ ނުލާ ހިނގާ އުޅުމަށް ނުކުޅެދިފައިވާއިރު، މިއީ އޭނާގެ އާއިލާއަށް ބަލަން ކެތްވާ ވަރު މަންޒަރެއް ނޫނެވެ.
ޒޫނާއަށް އައިޖީއެމްއެޗްގެ ސާޖިކަލް ވާޑްގައި އެނދުމަތިކޮށްގެން ފަރުވާދެމުން އަންނައިރު ރާއްޖެއިން މިހާރު ދެވެނީ ހަމައެކަނި ވަގުތީ ފަރުވާއެއްކަމަށް އާއިލާއިން ވަނީ ބުނެފައެވެ. އެ ފާރުގަނޑު މުޅި ފަޔަށް ފެތުރި އިތުރު ތަކްލީފެއްގައި ޒޫނާ އުޅޭ މަންޒަރު ބެލުމަކީ އެ އާއިލާއަށް ކެތްވާވަރުގެ ކަމެއް ނޫނެވެ.
ފައިތިލައިގެ މަރުވެފައިވާ ހިސާބު ރަނގަޅުނުކުރެވުނު ނަމަވެސް، ފައިގެ ބާކީ ހުރި ބައި ސަލާމަތްކުރުމަށްޓަކައި ވީ އެންމެ އަވަހަކަށް އިންޑިއާއަށް ގޮސް އިތުރު ފަރުވާ ހޯދުމަށް އާއިލާއިން ބޭނުންވެއެވެ. އާސަންދައިގެ އެހީތެރިކަން ލިބޭނެކަމުގެ އެއްވެސް އުއްމީދެއް ނެތްއިރު، ރާއްޖެއިން ބޭރުގައި ތިބެންޖެހޭނެ މުއްދަތެއް ނޭނގެއެވެ. ފުރުމުގެ ހަރަދާ، ސާޖަރީ އާއި ބޭސްފަރުވާގެ ހަރަދުތަކުގެ އިތުރުން، ކެއިންބުއިމާއި ހުރުމުގެ ހަރަދުތައް އުފުލުމަކީ އެ ދެމަފިރިންނަށް މިއަދު ކުޅަދާނަ ކަމެއް ނޫނެވެ.
ޒޫނާއަށް އެހީތެރިވާން ބޭނުންވާ ފަރާތްތަކުން ފިރިމީހާ އަބްދުﷲ ޝިހާމްގެ 9125013 ނަންބަރަށް ގުޅައިގެން ކުރިއަށް ގެންދިއުމަށް އާއިލާއިން އެދެއެވެ. އަދި ފައިސާގެ އެހީތެރިކަމެއްވެވެން ނެތް ނަމަ ޒޫނާއަށް ހެޔޮ ދުއާކޮށް ދިނުމަށް އާއިލާއިން ވަނީ އެދިފައެވެ.
ފައިސާގެ އެހީ ދެއްވަން ބޭނުންފުޅުވާ ފަރާތްތަކުން:
- އަބްދުﷲ ޝިހާމް - އެކައުންޓް ނަންބަރު: 7701134493101 (ދިވެހި ރުފިޔާ)
- އަބްދުﷲ ޝިހާމް - އެކައުންޓް ނަންބަރު: 7730000673990 (ޑޮލަރު އެކައުންޓް)
މީސްތަކުންނަށް އެހީތެރިވުމަކީ އަދި މީސްތަކުންގެ ހާޖަތްތައް ފުއްދައިދިނުމަކީ އިހުސާންތެރިކަމުގެ ތެރެއިން ހިމެނޭކަމެކެވެ. ﷲ ސުބުޙާނަހޫ ވަތައާލާ ވަހީކުރައްވާފައިވެއެވެ. (وَأَحْسِنُوا ، إِنَّ اللَّـهَ يُحِبُّ الْمُحْسِنِينَ) سورة البقرة: 195 މާނައީ: "އަދި ތިޔަބައިމީހުން އިހުސާންތެރިވާށެވެ. ހަމަކަށަވަރުން ﷲ އިހުސާންތެރިވާ މީސްތަކުންދެކެ ލޯބިވެވޮޑިގަންނަވަ އެވެ."
