ރާއްޖޭގައި ބާއްވާ އެންމެ ބޮޑު އަދި އެންމެ އުފާވެރި އިޖުތިމާއީ ހަރަކާތް ކަމަށްވާ "އޫރީދޫ ފަން ރަން" 2026 ވަނަ އަހަރު ބާއްވާނެ ތާރީހު އޫރީދޫ މޯލްޑިވްސްއިން އިއުލާނުކޮށްފިއެވެ.
އޫރީދޫއިން ހާމަކުރި ގޮތުގައި، އެތައް ހާސް ބަޔަކު އެއްވެގެން ބާއްވާ މި ކުލަގަދަ ދުވުން އޮންނާނީ 2026 ޑިސެމްބަރު 11 ވާ ހުކުރު ދުވަހު ހުޅުމާލޭގައެވެ. ދުޅަހެޔޮ ދިރިއުޅުމަކަށް ހިތްވަރުދިނުމާއި، އާއިލީ ގުޅުން ބަދަހިކުރުމުގެ މަގްސަދުގައި ބާއްވާ މި ހަރަކާތަކީ ކުޑަކުދިންނާއި ބޮޑެތިމީހުންނަށްވެސް ބައިވެރިވެވޭ ގޮތަށް، މަޖާ ހަރަކާތްތަކަކާއެކު ކުރިއަށްގެންދާ ދުވުމެކެވެ.
މީގެ އިތުރުން، އޫރީދޫގެ 20 ވަނަ އަހަރީ ދުވަހާ ގުޅުވައިގެން ކުރިއަށްގެންދިޔަ "ލިވް އަންލިމިޓެޑް" ކެމްޕޭނުގެ ނަސީބުވެރިޔާވެސް ވަނީ ހޮވާފައެވެ. މި ކެމްޕޭނުގެ ދަށުން މީގެ ކުރިން 19 ފަރާތަކަށް އުމްރާ ދަތުރު ހަދިޔާކޮށްފައިވާއިރު، ކެމްޕޭން ނިންމާލުމުގެ ގޮތުން ދޭ ބޮޑު އިނާމު ކަމަށްވާ ދެ މީހުންގެ ހައްޖު ދަތުރުގެ ނަސީބުވެރިއަކަށް ހޮވިފައިވަނީ މިޞްރިއްޔާ ޢަލީއެވެ.
އޫރީދޫގެ އީޖާދީ ހިދުމަތަށް 21 އަހަރު ފުރުން ފާހަގަކުރަމުންދާއިރު، އެ ކުންފުނިން ބުނީ ރާއްޖޭގެ މުސްތަގުބަލު ބައްޓަންކުރުމަށްޓަކައި އައު ޖީލުގެ ވަސީލަތްތަކާއި ޑިޖިޓަލް ޚިދުމަތްތަކަށް އިންވެސްޓްކުރުމުގައި ދެމިއޮންނާނެ ކަމަށެވެ. މީގެ ތެރޭގައި ސްމާޓް ހޯމް ސޮލިއުޝަންތަކާއި، ރައްކާތެރި ޑިޖިޓަލް ތަޖުރިބާތަކުގެ އިތުރުން އާޓިފިޝަލް އިންޓެލިޖެންސް (އޭއައި) އަދި ފިންޓެކް ފަދަ ޒަމާނީ ވަސީލަތްތައް ހިމެނެއެވެ.
އޫރީދޫގެ މައިގަނޑު އަމާޒަކީ އަންނަން އޮތް ޖީލުތަކަށްޓަކައި ޑިޖިޓަލް ގޮތުން ގުޅުވާލެވިފައިވާ، ބާރުވެރި އަދި އެންމެން ބައިވެރިވާ މުޖުތަމައެއް ބިނާކުރުމުގައި ދެމިއޮތުމެވެ. މިގޮތުން ވިޔަފާރިތަކާއި އުފެއްދުންތެރިން ބާރުވެރިކުރުވުމަށް ޒަމާނީ ޓެކްނޮލޮޖީގެ އެހީގައި ގިނަ މަސައްކަތްތަކެއް ކުރަމުންދާނެ ކަމުގެ ޔަގީންކަން އެ ކުންފުނިން ވަނީ އަލުން އަރުވާފައެވެ.
