މާދާމާ ފާހަގަ ކުރާ ދިވެހި ގައުމިއްޔަތު ދިރުވާ އާލާ ކުރުމުގެ ދުވަސް ފާހަގަ ކުރަން ހާއްސަ ފިނިބުރެއް ބޭއްވުމަށް ހަމަޖެހިފައިވާކަަމަށް މިނިސްޓާ އޮފް ދިވެހި ލެންގުއޭޖް، ކަލްޗާ އެންޑް ހެރިޓޭޖް އާދަމް ނަސީރު އިބްރާހީމް ވިދާޅުވެއްޖެއެވެ.
މިނިސްޓާ މިހެން ވިދާޅުވެފައިވަނީ މިއަދު ބޭއްވި ނޫސްވެރިންގެ ބައްދަލުވުމުގައެވެ.
އެގޮތުން މިނިސްޓާ ވިދާޅުވީ، ދިވެހި ގައުމިއްޔަތު ދިރުވާ އާލާ ކުރުމުގެ ދުވަހަކީ މާދަމާ ކަމަށާއި، އަދި މިދުވަސް ފާހަގަ ކުރުމަށް ވާން ޖެހޭ ތައްޔާރީތައް ވަމުންދާކަަމަށެވެ. އެގޮތުން މިދުވަސް ފާހަގަ ކުރުމުގެ ގޮތުން ވަރަށް ހާއްސަ ފިނިބުރެއް މާދަމާ ހަވީރު ބޭއްވުމަށް ހަމަޖެހިފައިވާކަމަށެވެ. މިނިސްޓާ ވިދާޅުވީ ދިވެހި ގައުމިއްޔަތު ދިރުވާ އާލާ ކުރުމުގެ ދުވަސް ފާހަގަ ކުރަން ބާއްވާ ހާއްސަ ފިނިބުރަކީ މާލެ ވަށާ އޮންނަ އާއިލީ ފިނިބުރެއްކަމަށެވެ.
މި ހަރަކާތުގައި އެކި ވުޒާރާ ތަކުންނާ ކުންފުނި ތަކުންނާ އެކި މުއައްސަސާ ތަކުން ބައިވުމަށް ހަމަޖެހިފައިވާއިރު، ދިވެހިންގެ އެއްބައިވަންތަކަމުގެ ރޫހު އާލާކޮށް ދިވެހިންގެ ގުޅުންތެރިކަން އިތުރުކުރަމަށް އާންމުންގެ ބައިވެރިވުމަށް މިނިސްޓާ ވަނީ ދައުވަތު ދެއްވާފައެވެ.
މިނިސްޓްރީގެ ކުރިއަށް ރޭވިފަ ހުރި ހަރަކާތްތަކަށް އަލިއަޅުވާލައި މިނިސްޓާ ވިދާޅުވީ މިމަހު ދިވެހި ބަހުގެ އެކަޑެމީ އިން ކުރިއަށްގެންދާ ޅެން ހަދަން ދަސްކޮށްދޭ ކޯހަކާއި ތަރިކަ ދިރާސާ ކުރާ ރަސްމީ މަރުކަޒުން ތަރިކައިގެ ރަސްމީ ޕޯޓަލް އިފްތިތާހް ކުރުމަށް ރޭވިފައިވާކަމަށެވެ. އަދި އަންނަ މަހު ތަރިކައިގެ ދާއިރާއިން ބައިނަލް އަގުވާމީ ކޮންފަރެންސެއް ބޭއްވުމަށް ހަމަޖެހިފައިވާއިރު، ދިވެހި ގައުމިއްޔަތުގެ އިސްވަރުންގެ ހަރަކާތްތަކުގެ ތެރެއިން އައްސިދަ ނަކަތުގެ ސިންތާ އާއި ބުރުނު ނަކަތުގެ ސިންތާ ކުރިއަށްގެންދިއުމަށް ރޭވިފައިވާކަމަށެވެ.
މީގެއިތުރުން އަންނަ މަހު ދިވެހި ބަހުގެ އެކަޑެމީއިން އަތުލިޔުމުގެ މުބާރަތަކާއި، ދިވެހި ބަހުގެ ދުވަސް ފާހަގަ ކުރުމާއި ދުނިޔޭގެ ޅެންވެރިންގެ ދުވަސް ފާހަގަ ކުރުމުގެ ގޮތުން އެކި ހަރަކާތްތައް ރޭވިފައިވާކަމަށެވެ. ހަމަ މިއާއެކު، މަޒުމޫނު ލިޔުމާއި، ކުރުވާހަކަ ލިޔުމާއި ވާހަކަ ދެއްކުމަށް ކުދިން ތަމްރީނު ކުރުމުގެ ހަރަކާތްތަކެއް މިނިސްޓްރީގެ ފަރާތުން އޭޕްރީލް މަހު ކުރިއަށް ގެންދެވޭނެކަމަށްވެސް މިނިސްޓާ ވިދާޅުވިއެވެ.
