ފޯޅަވައްސަކީ ރާއްޖޭގެ ތަނެއް ކަމުގެ ތާރީހީ ވަރަށް ގިނަ ހެކިތައް ފެންނަން އޮތް ކަމަށާއި މޮރިޝަސް އިން ގުޅުން ކަނޑާލިޔަސް، ފޯޅަވަހީގެ ހައްގުވެރި ފަރާތަކީ ރާއްޖެކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުމުގައި ރައީސް ވިދާޅުވީ ފޯޅަވައްސަކީ ތާރީހީ ގޮތުން ބަލާއިރު އެތަށް ގޮތަކުން ރާއްޖެއާ ގުޅިފައިވާ ތަނެއް ކަމަށެވެ. އަދި އެތަނުގެ ހައްގުވެރި ފަރާތާ އެތަން ހަވާލުކުރަންޏާ، ރާއްޖެއަށްވުރެ ހައްގުކަން ބޮޑު ބައެއް ނެތް ކަމަށް ރައީސް ވިދާޅުވިއެވެ. މި މައްސަލައިގައި މިހާރު އިނގިރޭސި ސަރުކާރާއެކު މަޝްވަރާ ކުރަމުން އަންނަކަން ހާމަކުރައްވަމުން ރައީސް ވިދާޅުވީ މިކަމުގައި ބައިނަލްއަގްވާމީ ގޮތުން އޮންނަ މިންގަނޑުތަކާ އެއްގޮތަށް ހުށަހަޅަންޖެހޭ ފަރާތްތަކަށް ހުށަހަޅާނެކަމަށެވެ.
މޮރިޝަސްއިން ރާއްޖެއާއެކު އޮތް ސިޔާސީ ގުޅުން ކަނޑާލުމަކީ ތާކުންތާކު ޖެހޭ ނިންމުމެއް ނޫން ކަމަށް ރައީސް ވިދާޅުވިއެވެ. އަދި މޮރިޝަސްއިން އެނިންމުން ނިންމާފާއިވަނީ، އެއްވެސް މަޝްވަރާއެއް ނެތި ކަމަށާއި، އެ ނިންމުން ނިންމިނަމަވެސް މޮރިޝަސްއަށް ހައްގުނޫން ތަނެއް ހައްގު ނުވާނެކަމަށް ރައީސް ވިދާޅުވިއެވެ.
ޗާގޯސްގެ ރަށްތައް މޮރިޝަސް އަށް ދޫކޮށްލުމަށް ނިންމާފައިވާ ނިންމުން ހުއްޓުވުމަށް، އެކަމާ ދެކޮޅަށް ގާނޫނީ ގޮތުން މަސައްކަތް ކުރުމަށް ތައްޔާރުވަމުން އަންނައިރު ރައީސް ވިދާޅުވީ ރާއްޖެ ކުރިއަށް ދާނީ 'މޯލްޑިވްސް ފަސްޓް ޕޮލިސީ' އާ އެއްގޮތަށް ކަމަށެވެ. އަދި ގެއްލިފައިވާ ކަނޑުގެ ސަރަޙައްދު ހޯދުމުގެ މަސައްކަތަށް ހާއްސަ ކޮމިޓީއެއް އެކުލަވާލާފައިވާ ކަމަށް ރައީސް ވިދާޅުވިއެވެ.
މީގެ ކުރިންވެސް ރައީސް ވަނީ ފޯޅަވައްސަށް އެތައް ގަރުނެއް ކުރިން ދިވެހިން ނަން ދީފައި ވަނިކޮށް ބޭރުގެ އެހެން ގައުމުތަކުން އެކި ނަންނަން ކިޔާ، ޗާގޯސްއަށް އެ ނަން ބަދަލުކުރި ނަމަވެސް އެއީ ރާއްޖޭގެ ތަނެއް ކަމަށް ވިދާޅުވާ ވާހަކަ ތަކުރާރު ކުރައްވާފައެވެ.
