މިއަހަރުގެ ހާފިޒުންގެ ދަސްވެނިވުމުގެ ރަސްމިއްޔާތަކީ މިހާތަނަށް އެންމެ ގިނަ އަދަދަކަށް ހާފިޒުން ދަސްވެނިވެގެންދިޔަ ރަސްމިއްޔާތުކަމަށް އިސްލާމިކް މިނިސްޓަރު، ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓަރު މިހެން ވިދާޅުވެފައިވަނީ ރޭ ބޭއްވި މިއަހަރުގެ ހާފިޒުންގެ ދަސްވެނިވުމުގެ ރަސްމިއްޔާތުގައި ވާހަކަ ދައްކަވަމުންނެވެ.
ރޭގެ ރަސްމިއްޔާތުގައި 31 ހާފިޒުން ވަނީ ދަސްވެނިވެފައެވެ.
ކީރިތި ޤުރްއާނުގެ އިލްމު ފެތުރުމަށް 2025 ވަނަ އަހަރު 19،569،733.79 ރުފިޔާ ހަރަދުކޮށްފައި ވެއެވެ. މިކަމަށް ރިއާޔަތްކުރައްވާ މިނިސްޓަރުު ވިދާޅުވީ ކީރިތި ޤުރުއާނަށް ހިދުމަތް ކުރުމާއި، ކީރިތި ޤުރުއާން ހިތުދަސް ކުރުމުގެ ކަންތައްތައް މުޅި ރާއްޖެއަށް ފެތުރުމުގައި ދިވެހިރާއްޖެ ދެކެމުން މިދަނީ ވަރަށް ހެޔޮ ދުވަސްތަކެއްކަމަށެވެ.
މިނިސްޓަރު އިތުރަށް ވިދާޅުވީ ދިވެހިރާއްޖޭގައި ހާފިޒުން އަދަދު މިހާރު 301 އަށް އަރާފައިވާކަމަށެވެ. އަދި އަމާޒަކީ މި 5 އަހަރުގެ ތެރޭގައި ހާފިޒުންގެ އަދަދު 500 އާއި ހަމައަށް ގެންދިއުމަށް މަސައްކަތް ކުރުންކަމަށް މިނިސްޓަރު ފާހަގަ ކުރެއްވިއެވެ.
މީގެއިތުރުން، ރާއްޖޭގެ މީހުން ދިރިއުޅޭ ކޮންމެ ރަށެއްގައި ކީރިތި ޤުރުއާނާ ބެހޭ ގައުމީ މަރުކަޒުގެ ގޮތްޕެއް ހެދުމަކީ ސަރުކާރުގެ އަމާޒެއް ކަމަށް ފާހަގަކުރަައްވައި، މިއަހަރު 50 ގޮފި އުފެއްދުމަށް މަސައްކަތް ކުރެވެމުންދާކަމަށް މިނިސްޓަރު ވިދާޅުވިއެވެ. އަދި މީގެ ތެރެއިން 6 ގޮފި ރަޖިސްޓްރީކުރެވިފައި ވާއިރު، 34 ގޮފި ރަޖިސްޓްރީ ކުރުމުގެ މަސައްކަތް ކުރެވެމުންދާކަމަށްވެސް މިނިސްޓަރު ފާހަގަ ކުރެއްވިއެވެ.
މިނިސްޓަރު ވިދާޅުވީ ކުރިއަށް އޮތް ޖީލުތަކަށް އިސްލާމީ ރިސާލަތު ވާސިލްކޮށްދިނުމަށްޓަކައި އަދުގެ ޒުވާން ޖީލު ހާފިޒުންގެ ގޮތުގައި އަދި އިމާމުންގެ ގޮތުގައި، ތެދުވަން ޖެހޭކަމަށެވެ. އަދި ގައުމު ބިނާކުރުމުގައި، ގައުމު ތާއަބަދަށް އިސްލާމީ ގައުމެއްގެ ގޮތުގައި ދެމެހެއްޓުމަށްޓަކައި ހާފިޒުން ބިނާ ކުރަން ޖެހޭކަމަށްވެސް މިނިސްޓަރު ފާހަގަކުރެއްވިއެވެ.
ރާއްޖޭގައި މިހާރު 1873 ދަރިވަރުން އަންނަނީ ޤުރުއާން ހިތުދަސް ކުރަމުންނެވެ. އެންމެ ގިނަ އަދަދަކަށް ދަރިވަރުން ހިފްޒު ކުރަމުން އަންނަނީ ކީރިތި ޤުރުއާނާއި ބެހޭ ގައުމީ މަރުކަޒުގައެވެ.
ރޭ ބޭއްވި ހާއްސަ ރަސްމިއްޔާތުގައި ހާފިޒުންނަށް ރައީސުލްޖުމުހޫރިއްޔާ ދެއްވާ މެޑައްޔާއި އިނާމު 50 ހާފިޒުންނަށް ލިބިފައިވެއެވެ. ހާފިޒުން ދަސްވެނިވުމުގެ ގޮތުން ބާއްވާ ހަފްލާއަކީ މިކަމަށް ހިތްވަރުދިނުމުގެ ގޮތުންނާއި ޤުރުއާން މަތިވެރިވެރިކުރުމުގެ ގޮތުން 1447 ވަނަ އަހަރުން ފެށިގެން ބާއްވަން ނިންމި ހަފްލާއެކެވެ.
