ކާބަފައިގެ ޒަމާނުއްސުރެ ދިވެހިންނަކީ މަސްވެރިކަމުން ނަފާ ހޯދައި ކައިބޮއެ އުޅެމުން އަންނަ ބައެކެވެ. މިހާރު ވެސް އާމްދަނީ ލިބޭ މަސައްކަތެއްގެ ގޮތުގައި މަސްވެރިކަން ކުރާ ދިވެހިން ގިނައެވެ. މަސްވެރިކަމުގެ ސިނާއަތުގައި އުޅޭ މީހުން އިތުރުވާ އިރު އެ މަސައްކަތަށް ބޭނުންވާ ބައެއް ސާމާނަކީ ވެސް ވަރަށް ޑިމާންޑް އޮންނާނެ އެއްޗެކެވެ.
އެ ގޮތުން މަސް ބޭނުމަށް ބޭނުންކުރާ ބުޅިއަކީ ވަރަށް ޑިމާންޑް އޮތް އަދި އާމްދަނީ ލިބޭ މަސައްކަތެއްގެ ގޮތުގައި ބުޅި ޖެހުމަކީ ކުރަން ރަނގަޅު މަސައްކަތެކެވެ. ނަމަވެސް މި މަސައްކަތް ކޮށް އުޅޭ މީހުން މަދު އިރު، މި މަސައްކަތް ކުރާ އަންހެނުން ވަކިން ހާއްސަކޮށް މަދެވެ.
ރޯދަ މަހަށް ހާއްސަށްކޮށް ގެނެސްދޭ މީހުން ސެގްމެންޓްގައި މިއަދު މި ގެނެސްދެނީ ބުޅި ޖެހުމުގެ މަސައްކަތް ދިގު މުއްދަތަކަށް ކުރަމުން އަންނަ އެފަދަ ހީވާގި ހުނަރުވެރި އަންހެނެއްގެ ވާހަކައެވެ.
އއ. އުޅަހުގައި ބުޅި ޖެހުމުގެ މަސައްކަތް ކުރާ މާރިޔާ ހަސަން މި މަސައްކަތް ކުރަން ފެށި ގޮތް ހިއްސާ ކުރަމުން ބުނީ، އޭނާގެ ފިރިމީހާގެ ބައްޕަގެ އޭރު މަސް ދޯންޏެއް އޮންނަ ކަމަށާއި އެ ދޯންޏަށް ބޭނުންވާ ބުޅި ހަދަން ފިރިމީހާ އޭރު ފެށި ކަމަށެވެ. އޭރު ފިރިމީހާ މި މަސައްކަތް ކުރި އިރު ފިރިމީހާއަށް އެހީތެރިވުމުގެ ގޮތުން މާރިޔާ ވެސް މި މަސައްކަތް ދަސްކޮށްގެން މަސައްކަތް ކުރަން ފެށީއެވެ. ނަމަވެސް ފަހުން އޭނާގެ ފިރިމީހާގެ ސިއްހީ ހާލަތު ތަން ނުދޭތީ އެ މަސައްކަތް މައިގަނޑު ގޮތެއްގައި މިހާރު ކުރަމުން އަންނަނީ މާރިޔާއެވެ.
މާލޭގެ ފިހާރަތަކަށް މާރިޔާ ހަދާ ބުޅިތައް ސަޕްލައިކޮށް ވިއްކަމުން އަންނަ އިރު، ދިރިއުޅުމުގެ ކަންކަމުގައި ބުޅި ޖަހައިގެން ލިބޭ އާމްދަނީން އެ އާއިލާއަށް ހަމަޖެހިގެން އުޅެވޭ ވަރުވެއެވެ. ދިރިއުޅުމުގައި ޒަރޫރީ ބޭނުންތަކާއި ފިރިމީހާގެ ސިއްހީ ހާލަތާ ގުޅިގެން ވެސް ރާއްޖެއިން ބޭރަށް ކޮންމެ އަހަރު ބޭސް ފަރުވާ އަށް އެ އާއިލާ ދާ އިރު، ބޭސްފަރުވާއަށް ވެސް އެއްވެސް މީހެއްގެ އެހީއެއް ހޯދުމަކާ ނުލައި ލިބޭ އާމްދަނީން ހަރަދުތައް ކުރެވޭ ކަމަށް މާރިޔާ ބުނެއެވެ. އެހެންކަމުން މި މަސައްކަތަކީ ވަރަށް ރަނގަޅު އާމްދަނީއެއް ލިބޭ މަސައްކަތެއް ކަން މާރިޔާ ފާހަގަކުރެއެވެ.
ވިޔަފާރި އުސޫލުން މި މަސައްކަތް ކުރަން ފެށި ގޮތް ހިއްސާ ކުރަމުން މާރިޔާ ބުނީ، އެ ދެމަފިރިންގެ ހަ ދަރިން ތިބި އިރު ދޮއްޓަށް ތިބި ހަތަރު ކުދިން ރަނގަޅު ތައުލީމެއް ދިނުމަށް މާލެއަށް ބަދަލު ކުރަން ޖެހުނު ކަމަށެވެ. ނަމަވެސް އޭރު ފިރިމީހާ މަހަށް ގޮސްގެން ލިބެމުން ދިޔަ އާމްދަނީން ހަތަރު ކުދިން ކިޔަވަން މާލެއަށް ފޮނުވައިގެން އަތްމަތި ދަތިވާ ހިސާބަށް ދިޔަ ކަމަށެވެ. އެހެންކަމުން އިތުރު އާމްދަނީއެއް ހޯދުމަށް ބުޅިޖެހުމުގެ މަސައްކަތް ކުރުމުގެ ހިޔާލު އައިސް އެ މަސައްކަތް ފެށީއެވެ.
މި މަސައްކަތް ކުރާތާ 30 އަށް ވުރެ ގިނަ އަހަރު ވެފައިވާ އިރު، މާރިޔާއަށް ދިމާވި އެންމެ ބޮޑު ގޮންޖެހުމާ ކުރިމަތިލާން ޖެހުނީ ކޮވިޑްގެ ދުވަސްވަރު ކަމަށް އޭނާ ބުނެއެވެ. އެ ގޮތުން އެ ދުވަސްވަރު ތިމަރަ ލިބުން ދަތިވެގެން ދިޔުމުން ބުޅީގެ ސްޓޮކް މަދުވި ކަމަށާއި ނަމަވެސް ކޮވިޑް ދުވަސްވަރު ވެސް މަސައްކަތް ހުއްޓާ ނުލައި ކުރިއަށް ގެންދެވުނު ކަމަށް އޭނާ ބުނެއެވެ.
އޭނާ މި މަސައްކަތް ދަސްކުރީ ފިރިމީހާ ބުޅި ޖަހާތަން ބަަލައިގެންނެވެ. އެ ދެމަފިރިންނަކީ ބުޅި ޖަހަން ދަސްކުރަން ކޯހެއް ހެދި ބައެއް ނޫނެވެ. ފިރިމީހާގެ އިރުޝާދާ އެއްގޮތަށް ބުޅި ޖަހަން އޭރު ދަސްކުރި އިރު ފިރިމީހާ އަބަދުވެސް ކައިރީގައި ބުނެދޭން ހުރެއެވެ. ނަމަވެސް މިހާރު އޭނާގެ ފިރިމީހާ ގާތުގައި ނެތަސް އެކަނިމާ އެކަނި ވެސް ބުޅި ޖެހުމުގެ ކަންކަން އޭނާއަށް ކުރެވޭ ކަމަށް މާރިޔާ ބުނެއެވެ.
ބުޅި ވިއްކަން މާކެޓް ހޯދުމަށް ކުރި މަސައްކަތް ހިއްސާކުރަމުން މާރިޔާ ބުނީ، މާލޭގެ ވިޔަފާރިވެރިންނާ ގުޅައިގެން އެމީހުންގެ ފިހާރަތަކުގައި މާރިޔާ ހަދާ ބުޅި ވިއްކަން ލާން އެދުނީ ކަމަށެވެ. މާލޭގެ އިތުރުން ވެސް އއ އަތޮޅުގެ ބޭރުން ދުރު ރަށްރަށުންގެ މާރިޔާ ހަދާ ބުޅި ގަތުމަށް އެކި މީހުން އޯޑަރު ކުރާ ކަަމަށް އޭނާ ބުނެއެވެ. އެ ގޮތުން ދާދި ފަހުން ވެސް އިހަވަންދޫއަށް ބޮޑު އޯޑަރެއް ތައްޔާރުކޮށް ފޮނުވާފައިވާ ކަން ފާހަގަކުރިއެވެ.
މާރިޔާ އަކީ ބުޅި ޖެހުމުގެ ކުރިން އާމްދަނީ ހޯދުމަށް ކުދި ގުޅަ އާއި ކުޅި ރޮއްޓާއި މާގުޅަ އާއި މަސް މިރުސް ފަދަ ތަކެތި ތައްޔާރުކޮށްގެން ވިއްކި މީހެކެވެ. އެ މަސައްކަތަށް ވުރެ ބުޅި ޖަހައިގެން ލިބޭ އާމްދަނީ ބޮޑު ކަމަށް މާރިޔާ ބުނެއެވެ. އެހެންކަމުން ގޭގައި ތިބޭ އަންހެނުންނަށް މިއީ ކުރެވިދާނެ ރަނގަޅު އާމްދަނިއެއް ލިބޭނެ މަސައްކަތެއްގެ ގޮތުގައި މާރިޔާ ފާހަގަކުރެއެވެ.
ކުރިން ކުރި މަސައްކަތަށް ބަލާއިރު އެއީ ބަދިގޭގައި އުނދުން ކައިރީ ގިނަ ވަގުތު ހޭދަކޮށްގެން ކުރާ މަސައްކަތެއް ކަމުން ހަޑިކޮށް ހުންނަ ވަގުތު އަންނާނެ ކަމަށް އޭނާ ބުނެއެވެ. ބުޅި ޖެހުމަކީ އިންތާ އިނދެގެން، މީހާ ހަޑި ނުވެ ކުރެވޭ މަސައްކަތަކަށް ވުމުން އެކަމުގައި ފަސޭހަތަކެއް ހުރި ކަމަށް އޭނާ ދެކެއެވެ. ބުޅި ޖަހަން އިނދެފައި ނަމާދުކޮށްލާން ދާން ވިޔަސް ތެދުވެގެން ގޮސް ވުޟޫކޮށްލައިގެން ނަމާދަށް ދާންވީ ކަމަށް އޭނާ ބުނެއެވެ.
ބުޅި ޖެހުމުގެ މަސައްކަތަކީ އަންހެނުންނަށް ކުރެވޭނެ މަސައްކަތެއް ކަން މާރިޔާ މި ވަނީ ސާބިތުކޮށް ދީފައެވެ. މާރިޔާ ބުނާ ގޮތުގައި އާމްދަނީ ހޯދުމަށް މިއީ ވަރަށް ރަނގަޅު މަސައްކަތެއް ކަމަށާއި މި މަސައްކަތަކީ ގޭގައި ތިބޭ އަންހެންވެރިން ދަސްކޮށްގެން ކުރަން ވަރަށް ރަނގަޅު މަސައްކަތެއް ކަމަށެވެ.
ގޭގައި ތިބޭ އެކަނިވެރި މައިންނާއި އަދި ވަޒީފާއަށް ނުދާ މީހުންނަށް އޭނާ ދޭނެ ނަސޭހަތަކީ އަމިއްލަ މަސައްކަތެއްކޮށް އާމްދަނީ ހޯދުމަކީ އަމިއްލަ މީހާއަށް ވަރަށް ބޮޑު ހިތްވަރަަކަށް ވާނެ ކަމެއް ކަމަށެވެ. މަސައްކަތެއް ކޮށްގެން ލިބޭ ފައިސާއިން ދިރިއުޅުން އާރާސްތުކޮށް ކުރިއަށް ދިއުމަކީ ހިތްހަމަޖެހުން ވެސް ލިބިގެން ދާނެ ކަމެއް ކަމަށް މާރިޔާ ބުނެއެވެ.
