"މާދަމާ ދޭނީ... މާދަމާ އެއީ އެކުދިންނަށް 20 އަހަރު ފުރޭ ދުވަސް..." ޒިބާން އަތުގައި އޮތް ފަށް ފޮއްޓަށްލާ ފޮށީގެ މަތިޖަހާލިއެވެ.
*** *** *** *** *** ***
މިސްކިތުން ހޫދު ފޭބީ އިޝާން ނަމާދުކޮށްގެންނެވެ. ޖީބުގައި އޮތް ފޯނު ނަގާ އޭގެ ޑިސްޕްލޭއަށް ހޫދު ބަލާލީ ކުޑައިރު ކޮޅެއް ކުރިން އެ ފޯނު ވައިބްރޭޓް ވީކަން ހަނދާން ވުމުންނެވެ. ފޯނަށް އައިސްފައިވާ މެސެޖް ހުޅުވާލި އިރު ހޫދުގެ މޫނުމައްޗަށް ލުއި ހިނިތުންވުމެއް ވެރިވިއެވެ. ޝީން ކޮށްފައިވާ މެސެޖަށް ޖަވާބުދެމުން ހޫދު މަގުގެ ދެކޮޅަށް ބަލާލިއެވެ. މެސެޖް ފޮނުވާލުމަށްފަހު އިސްތަށިގަނޑުގައި އަތް ހާކާލަމުން ޝީންމެން ގެއާ ދިމާއަށް ދިއުމަށް ހޫދު އަވަސްވެގަތެވެ.
ޝީންމެންގޭ ހުންނަ މަގަށް އަޅާލިތަނާ ހޫދުގެ ފޯނު ވައިބްރޭޓްވުން އަތުގައި އޮތް ފޯނުގެ ސްކްރީނަށް ބަލާލީ އެއީ ޝީންގެ މެސެޖެއްކަން ޔަގީންވެ ހުރެއެވެ. "ކޮން އިރަކުން އަންނަނީ.. އައިމް ރެޑީ.." މެސެޖް ކިޔާލުމަށްފަހު މިހާރު ހޫދު މިހުރީ ޝީންމެންގެ ކައިރީ ކަމަށް ބުނަމުން ފަރިތަކަމާއެކީ މެސެޖެއް ޓައިޕްކޮށްލުމަށްފަހު މެސެޖް ފޮނުވާލަމުން ހޫދު އިސްއުފުލާލިއެވެ.
ލިބުނު ހައިރާންކަމާއެކީ ހޫދުގެ ފިޔަވަޅު މަޑުޖެހުނެވެ. ޝީންމެންގޭ ވަށާ ފާރުމަތިން ބަނޑުއަޅުވާލައިގެން އެގޭތެރެއަށް ބޯ ދިއްކޮށްގެން އޮތް އަންހެން މީހާ ފެނުމުންނެވެ. އެ އަންހެންމީހާ އެގޭ ކައިރީ ފާރައަށް އައިސްއުޅުމުގެ ބޭނުމަކީ ކޮބައިކަން ހޫދު ދެނެގަންނަން ބޭނުންވިއެވެ. މީ އެގޭ ކައިރިން މި މީހާ ފެނުނު ފުރަތަމަ ފަހަރެއް ނޫނެވެ.
މަޑު ހިނގުމެއްގައި ކުރިއަށް ފިޔަވަޅު އަޅަމުން ދިޔަ ހޫދުގެ ހިތުގައި އެތައް ސުވާލުތަކެއް ފުނިޖެހެމުން ދިޔައީ ކީއްވެ ކަމެއް ނޭނގެއެވެ. އެގެއާ ގާތްވަމުން ދިޔަވަރަކަށް އޭނާގެ ހިތް އަވަސްވަމުން ދިޔައެވެ. އެ އަންހެންމީހާގެ ކަޅި އަމާޒުވެފައި ވަނީ އެގޭ ގޯތިތެރެއާ ދިމާއަށެވެ. ހޫދު ބޯ އަރިކޮށްލަމުން ގޯތިތެރެއާ ދިމާއަށް ބަލާލީ ދެބުމަ ގޮށްޖަހާލަމުންނެވެ.
ރޯނުގައި ހިއްކަން އަޅުވާފައިވާ ހެދުންތައް ނަގަން އުޅުނު އިރު ދޭތެރެއަކުން ގޭގެ ބިއްދޮށްފަރާތުގައިވާ ގަސްތަކާ ދިމާއަށް މަންޝާ ބަލާލައެވެ. މަންޝާގެ އަވަސް ހަރަކާތްތައް ފެންނަ މީހަކަށް އޭނާ ހުރީ ބިރުގެންފައި ކަން އެނގޭނެއެވެ. ހެދުންތައް ހިފައިގެން މަންޝާ ގެއަށް ވަންނަން ދިޔައިރު އެއަންހެންމީހާ ހުރި ހިސާބަށް ހޫދަށް އާދެވިއްޖެއެވެ.
މީހެއްގެ ހިލަންވުމުން އެ އަންހެންމީހާ ހޫދު ހުރި ދިމާއަށް ބަލާލުމަށްފަހު ތެޅިގަތެވެ. މޫނު ނިވާކޮށްފައިވާ އެ އަންހެންމީހާގެ ފަރާތުން ފެނުނު ކަންތައްތަކުން އެއީ ރަނގަޅު ނިޔަތެއްގައި އެތަނަށް އައިސް ހުރި މީހެއްކަމާ މެދު ޝައްކު އުފެދުނެވެ. ހޫދަށް ފުރަގަސް ދިނުމަށްފަހު އެމީހާ ކުރިއަށް އެޅި ފިޔަވަޅު ހުއްޓުމަކަށް އައީ އޭނާގެ ހެދުމަށް ވާންވުމުންނެވެ. މޭގައި އަތްއަޅައިގެން ހުރެ އޭނާގެ ދިގު އެސްފިޔަތައް ތަޅުވާލަމުން ދެލޯ މަރާލީ އޭނާގެ ހިތުގައި އަށަގަންނަމުން ދިޔަ ހާސްކަމަށް ލުއެއް ލިބޭތޯއެވެ. އެ އަންހެންމީހާގެ ހެދުމުން ދޫކޮށްލާނެ އިރެއްގެ އިންތިޒާރުގައި އޭނާ މަޑުކޮށްލެވުނެވެ.
"ކާކު..." ހޫދު ކުރިއަށް ޖެހެމުން ސުވާލުކޮށްލީ އޭނާގެ ފިރިހެންވަންތަ ބަރު އަޑުންނެވެ. އަންހެންމީހާ ކުރިއަށް ފިޔަވަޅެއް އަޅަން މަސައްކަތް ކުރި ނަމަވެސް އޭނާގެ ހެދުމަށް ވާންވެފައިވުމުން ހުރި ފިޔަވަޅުމަތީ ހުއްޓިގެން ހުރީއެވެ. އަންހެންމީހާގެ ފަރާތުން ޖަވާބެއް ނުލިބުމުން އަނެއްކާވެސް ހޫދު ވާހަކަ ދެއްކިއެވެ. "ތީކާކު؟.. މިގޭ ދޮށުގަ ކީއްކުރަނީ... ކާކު ތި ހޯދަނީ؟.."
ހޫދުގެ ސުވާލުތަކަށް އެ އަންހެންމީހާގެ ފަރާތުން ޖަވާބެއް ނުލިބުނެވެ. އެގޭ ތެރެއިން ބޭރަށް ނިކުތް ޝީން ވާހަކަ ދައްކާ އަޑަށް ހޫދު ގެއާ ދިމާއަށް އެނބުރިލިއެވެ. "ހޫދު.. ހާދަ ފާސްޓޭ... ސްޓޭޖް ކައިރިއަށް ދޯ ދާނީ..." ކޮނޑުގައި އަޅާފައިވާ އަތްދަބަސް ރަނގަޅު ކުރަމުން ބޭރަށް ނިކުތުމަށްފަހު ހޫދާ ދިމާއަށް ޝީން ބަލާލީ ހިނިތުންވަމުންނެވެ.
އެއްފަރާތެއްގައި ހުރި އަންހެންމީހާ ފެނުމުން ޝީން އެމީހާއާ ދިމާއަށް ބޯއަރިކޮށްލަމުން ބަލާލިއެވެ. "ސަލްމައްތަ ތަ؟.. ޝާޔާ ހޯދަންތަ ތިއައީ.. ޝާޔާ ވީ މާމަގޭގަ.."
އެއަންހެން މީހާ ބޯ ޖަހާލަމުން ހޫދާ ދިމާއަށް އެނބުރިލީ އޭނާގެ ހެދުމުން ދޫކޮށްލާތޯއެވެ. ޝީންމެންގޭގެ ކައިރީގައި ހައްދާފައިވާ ގަހުގެ ގޮފިކޮޅެއްގައި އޭނާގެ ހެދުން އަޅައިގެންފައިވާތަން ފެނުމުން އޭނާ ހެދުމަށް ދަމާލިއެވެ. ހެދުން އެތަނުން ވަކިކޮށްލުމަށްފަހު ހޫދާ ދިމާއަށް އޭނާ ބަލާލިއެވެ. އެއަށްފަހު ފަސްއެނބުރި އޭނާ ކުރިއަށް ހިނގައިގަތީ އެމީހުން ސުވާލުތަކަށް އޭނާއަށް ޖަވާބު ނުދެވޭނެކަން އެނގޭތީއެވެ.
އެ އަންހެންމީހާ ދިޔަ ދިމާއަށް ބަލަން ހޫދަށް ހުރެވުނީ ކީއްވެކަމެއް ނޭނގުނެވެ. އިސްއޮބާލައިގެން ހުރެ އެ މަގު ހުރި ސީދަަލަށް އެ އަންހެންމީހާ ދިޔަ ދިމާއަށް ބަލަން ހުރި ހޫދަށް ސިހުމެއް ލިބުނީ އޭނާގެ ގައިގާ ޝީން ޖެހިގަތުމުންނެވެ.
"ހިނގާ ދާން..." ޝީންއާ އެކީ ސްޓޭޖް ހުރި ދިމާއަށް ދާން ހޫދު ހިނގައިގަތްއިރު ވެސް އޭނާގެ ޒަމީރަށް އުނދަގޫ ކުރަމުން ދިޔައީ އެ ގޮތްނޭނގޭ އަންހެންމީހާގެ އަމަލުތައް ހުރިގޮތުންނެވެ. "އެއީ ކާކު.. ވަރަށް ގިނައިން މިގެ ކައިރިން ފެންނަ މީހެއް އެއީ..." އެ އަންހެން މީހާއާ ބެހޭ މައުލޫމާތު ހޯދަން ބޭނުންވެފައި ވުމުން ހޫދު ސުވާލުކޮށްލިއެވެ.
"އެއީތަ.. އެއީ ސަލްމައްތަ؟.. ޝާޔާގެ ޤުރުއާން މިސް.. މިހިސާބަށް އާދެވިއްޖިއްޔާ ޝާޔާއާ ވާހަކަ ނުދައްކާ ނޫނީ ނުދާނެ. ވަރަށް ރަނގަޅު ޓީޗަރެއް އެއީ.." އެއަންހެން މީހާއަށް ތައުރީފްގެ ބަސްތައް އޮއްސަމުން ދިޔަ ޝީންގެ ވާހަކައަށް ސަމާލުކަންދީގެން ހޫދު ހުރި ނަމަވެސް އޭނާއަށް ޝީން ދެއްކި ވާހަކަ ގަބޫލު ކުރެވޭ ގޮތެއް ނުވިއެވެ. އެއަންހެންމީހާ ފެނިވެފައިވާ ކޮންމެ ފަހަރަކުވެސް އޭނާގެ ނަޒަރު ހުސްވެފައިވަނީ މަންޝާއާ ދިމާއަށްކަން ހޫދަށް އެނގެއެވެ. ޝީން އާއި ހޫދުގެ ދެމެދުގައި އެކި ވާހަކަތައް ހިއްސާ ކުރެވެމުންދިޔައިރު މަންޝާއާ ބެހޭގޮތުން ހޫދު ސުވާލުކޮށް މައުލޫމާތު އޮޅުން ފިލުވަމުން ދިޔައެވެ.
*** *** *** *** *** ***
އަލަމާރީގެ ދޮރުފަތް ހުޅުވާލުމަށްފަހު ކޮނޑުގައި އަޅުވާފައިވާ އަންނައުނުތަކަށް ނަޒަރު ހިންގާލަމުން ރިޔާޒް ބަލާލީ އެނދުގައި އޮށޯވެގެން އޮތް މީރާގެ މޫނަށެވެ. ފޯނުގެ ސްކްރީނަށް މިރާގެ ކަޅި އަމާޒްކޮށްލައިގެން އޮތް އިރު އޭނާގެ މޫނުމަތިން ހާމަވަމުން ދިޔައީ އުފާވެރިކަމެވެ. ރިޔާޒް ބަލަން ހުރިކަން އެނގުމުން ތެދެވުމަށްފަހު ރިޔާޒާ ދިމާއަށް މީރާ ބަލާލިއެވެ. "ކިހިނެއްވީ... ހުރިހާ ޓީޝާޓެއް އިސްތިރިކޮށްފަ ހުންނާނީ... މަންމަމެން އީދު މުބާރިކް ކިޔާފަ ދެންމެ މެސެޖްކޮށްފަ.. ރިޔާޒަށް ވަަރަށް ގަދައަށް މަންމަ ސަލާމްބުނި..."
އަލަމާރި ތެެރޭހުރި ޓީޝާޓްތަކުގައި އަތް ހާކާލަމުން އޭގެތެރެއިން އަޅިކުލައިގެ ޓީޝާޓެއް ނެގުމަށްފަހު ކޮނޑުން ޓީޝާޓް ވަކިކޮށްލަމުން ރިޔާޒް ވާހަކަ ދެއްކީ ހިނިތުންވަމުންނެވެ. "ކޮބާ މުނާޒް؟.. އަދި އެސޮރު ގެއަކަށް ނާދޭ ދޯ..."
މުނާޒްގެ ނަންބަރު ފޯނުގަ ޑައަލްކޮށްލަމުން މީރާ ހޫން ލައްވާލިއެވެ. އެކޮޅުން މުނާޒް ފޯނު ނެގުމުން މީރާ ކަންފަތުގައި ފޯނު ޖަހާލިއެވެ. ބެލްކަންޏާ ދިމާއަށް ހިނގައިގަތީ ލައިގެން ހުރި ހެދުމަށް ދަމާލަމުންނެވެ. "ދަރިފުޅާ ކޮންއިރަކު ގެއަށް އަންނަނީ... އެހާ ލަސްނުކުރައްޗޭ... އާން..."
ޓީޝާޓްލުމަށްފަހު އެނދުމަތީ އޮތް ރިޔާޒްގެ ފޯނަށް ބަލާލީ އެ ފޯނަށް މެސެޖެއް އައިސްފިކަން އެނގުމުންނެވެ. މެސެޖް ކިޔާލުމަށްފަހު ޖިންސު ޖީބަށް ވޮލެޓާ ފޯނު ޖަހާލަމުން ބެލްކަނި ކައިރިއަށް އޭނާ ދިޔާއީ އޭނާގެ ލޯބިވާ އަންހެނުން ގާތަށެވެ. ބެލްކަނިން ބޭރު ބަލަން ހުރި މީރާގެ އުނަގަނޑުގައި ހިފާލަމުން ރިޔާޒްގެ ހަށިގަނޑާ ގާތަށް އޭނާ ދަމާލިއެވެ. މީރާ އައިސް ރިޔާޒްގެ ގައިގާ ލައްވެލިއެވެ. އޭނާގެ ފަންއިސްތަށިގަނޑުގައި ފިރުމާލަމުން ރިޔާޒް އެ އިސްތަށިގަނޑުން ވަސްބަލާލިއެވެ.
މީރާ މަޑުމަޑުން ރިޔާޒާ ކުރިމަތިލަމުން ވާހަކަ ދެއްކިއެވެ. "މުނާޒް މިރޭ ޢީދު ޝޯވް ބަލަން ދާ ވާހަކަ ބުނި.. މަބުނިން އެހާ ލަސްނުކޮށް ގެއަށް އަންނައްޗޭ.. ކޮންތާކަށް ދާން ތިއުޅެނީ..." ރިޔާޒް ލައިގެން ހުރި ޓީޝާޓުގައި އަތް ހާކާލަމުން ރިޔާޒްގެ މޫނަށް މީރާ ބަލާލިއެވެ. އެމޫނުގައި ދެއަތުން ހިފާ ރިޔާޒްގެ މޫނާ ކައިރިކޮށްލުމުން ލަދުރަކި ގޮތަކަށް މީރާ ދެލޯ މަރާލިއެވެ.
"މިދަނީ އަސްރާ ކައިރިއަށް... އަހަރެން އަންނަންވާ އިރަށް މީރާ ރީތިވެބަލަ.. ދުއްވާލަން ދާން..." މީރާގެ ނިތްކުރިއަށް ބޮސްދިނުމަށްފަހު ރިޔާޒް މިސްރާބުޖެހީ އެ އެޕާޓްމަންޓުން ނިކުންނާށެވެ. ރިޔާޒް ދިޔަ ދިމާއަށް ބަލަން ހުރުމަށްފަހު ބެލްކަނިން ބޭރަށް މީރާ ބަލާލިއެވެ. ރިޔާޒަކީ އޭނާ އުންމީދު ކުރިކަހަލަ ރަނގަޅު ފިރިއެކަށް ވުމުން އޭނާއަށް ހިތްހަމަޖެހުމެއް ލިބުނެވެ.
*** *** *** *** *** ***
ކެފޭތެރެއަށް ވަދެގެން ދިޔައިރު އެތާ ތެރޭ މީހުން މަދުކަން ފާހަގަ ރިޔާޒަށް ވިއެވެ. އެއް ފަރާތެއްގައި ހުރި މޭޒު ދޮށުގައި އިށީދެގެންހުރި އަސްރާރް ފެނުމުން އޭނާ ކައިރިއަށް ރިޔާޒް ފިޔަވަޅު އަވަސްކޮށްލިއެވެ. "އަސްރާ.. ކިހިނެއްތަ؟..." ހުސްކޮށްހުރި ގޮނޑިއެއްގައި އިށީންނަމުން ރިޔާޒް ވާހަކަ ދެއްކިއެވެ. ދެލޮލުގައި އަޅާފައިވާ އަވި އައިނު ރަނގަޅު ކޮށްލަމުން އަސްރާރް ކުރިއަށް އަތް ދިއްކޮށްލީ ރިޔާޒާ ސަލާމްކޮށްލާށެވެ. އަސްރާރްގެ އަތުގައި ހިފާލަމުން ރިޔާޒް ސަލާމްކޮށްލިއެވެ.
"އަސްރާ އެކަނިތަ އައީ..." އަސްރާރްއަކީ ލޮލަށް ނުފެންނަ މީހަކަށްވުމުން އޭނާ އެކަނި އެތަނަށް އައި ގޮތް އެނގެން ބޭނުންވެގެން ރިޔާޒް ސުވާލުކޮށްލީ ނިތައް ރޫގިނަކޮށްލަމުންނެވެ. ވަށައިގެން ކެފޭ ތެރެއަށް ބަލާލުމަށްފަހު އެއްފަރާތެއްގައި ހުރި ވެއިޓަރަށް އިޝާރާތްކޮށްލަމުން މޭޒުމަތީ އޮތް ސިނގިރޭޓް ފޮށިން ސިނގިރޭޓެއް ނަގާ ރޯކޮށްލިއެވެ.
"އަހަރެންގެ ރައްޓެއްސެއް ގެނެސް މިތަނަށް ލާފަ އެ ދިޔައީ... ހޫމް.. ކިހިނެއްވީއޭ ތަ؟... މަންޝާގެ ޚަބަރެއް ނުވޭތަ؟.."
އަސްރާރް ވާހަކަ ދައްކަމުން މޭޒުމަތީ އޭނާގެ އަތް ހަރަކާތްކޮށްލިއެވެ. މޭޒުމަތީ ހުރި ފެންފުޅި އަތުގައި ޖެހުމުން އޭގެ މަތިނަގާ އަނގަޔަށް ފެންފޮދެއް އަޅާލުމަށްފަހު އޭނާގެ ލޮލުގައި އަޅާފައިވާ އަވިއައިނު ނަގާ މޭޒުމަތީ ބޭއްވިއެވެ. ރިޔާޒް ހުރި ދިމާއަށް ވުރެ ތަންކޮޅެއް ދުރަށް އޭނާގެ ކަޅި އަމާޒްވެފައިވީ ނަމަވެސް އަސްރާރް އިންތިޒާރު ކުރަމުން ދިޔައީ ރިޔާޒްގެ ފަރާތުން ލިބޭނެ ޖަވާބަކަށް ކަން އޭނާއަށް އެނގުނެވެ.
"މަންޝާގެ މަންމަ އަހަންނަށް ވަރަށް ގުޅާ.. ބުނި މަންޝާއަށް އަޒީމް އަނިޔާ ކުރަނީއޭ ވެސް.. އަހަރެންގެ ހިތް ގަބޫލެއް ނުކުރޭ އަޒީމް އެވަރުގެ ކަމެއް ކޮށްފާނެއެކޭ... އެކަމަކު މީހެއްގެ ގޮތެއް ވެސް ނޭނގޭނެދޯ..." މޭޒު ކައިރިއަށް ވެއިޓަރު މީހާ އައުމުން ރިޔާޒްގެ ވާހަކަ މެދުކަނޑާލިއެވެ. ދެމީހުންނަށް ކަޅު ކޮފީއެއް ގެނެސް ދިނުމަށް އެދުމުން ވެއިޓަރު ބޯ ޖަހާލުމަށްފަހު ކައުންޓަރާ ދިމާއަށް ހިނގައިގަތެވެ. އަސްރާރް ފުން ނޭވާއެއް ބޭރުކޮށްލަމުން ވާހަކަ ދައްކަން އަނގަހުޅުވާލިއެވެ.
"ތިހެން ބުނީމަ މިހަނދާންވީ... އެނގޭތަ މަށަށް އަޒީމް ގުޅިއޭ... އެކަމަކު އެއީ ތަންކޮޅެއް ކުރިން..."
*** *** *** *** *** ***
"އަހަންނަށް ވަރަށް ބޮޑު ކަމެއް ކޮށްދީބަލަ.. އަސްރާ ބުނި އަދަދަކަށް ފައިސާ ވެސް ދީފާނަން.. ހެޔޮނުވާނެ..." ފޯނުން ވާހަކަ ދައްކަމުން ދިޔައިރު އަޒީމްގެ ނިތްކުރިން ދާތިކީގެ އަސަރު ފާޅުވަމުން ދިޔައެވެ. މުޅިމީހާގެ މޫނުމަތިން އޮއްދާ ހިއްލަމުން ދިޔައިރު އަޒީމް ހާސްވެފައިވާ މިންވަރު އޭނާގެ މޫނުމަތިން ދޭހަ ވިއެވެ.
ފޯނުން ވާހަކަ ދައްކަމުން އަސްރާރް އެއްފަރާތަކަށް ޖެހިލީ އަޒީމް ދައްކަމުން ދިޔަ ވާހަކައަށް ސަމާލުކަން ދެމުންނެވެ. މަޑު ހިނގުމެއްގައި ގޮސް ދޮރުގައި އަތް ޖެހުމުން ތަޅު ހޯދަން އަތް ހަރަކާތްކޮށްލިއެވެ. އަސްރާރަށް ވެގެން އުޅޭ ގޮތް ކިޔައިދީބަލާށޭ ބުނެލީ އެޕޯލޯ ތަޅުގައި ހިފާ އަނބުރާލަމުންނެވެ.
"މަންޝާއަށް ގޮތްތަކެއް ވަނީ ކަންނޭނގެ... އޭނާ ރޮއެ ހަދާތީ އަހަންނަށް ހުވަފެނުން ފެންނަނީ.. އަހަރެން ކޮންމެ ރެއަކު ބޭރަށް ނުކުމެ އޭނާގެ ކޮޓަރި ދޮރުކައިރީ ހުންނަން.. އެކަމަކު މަށަކަށް އެއްވެސް އަޑެއް ނީވޭ... ހެނދުނު ގޭގައި މަސައްކަތް ކުރަން އުޅޭއިރު އޭނާގެ ގައިން ނޫފައިގެންފަ ހުންނަ ތަންތަންވެސް ފެނޭ.. ދެލޯ ކައިރިވަޅުވަދެފަ ހުންނަނީ.. ހީވަނީ އެތައްދުވަހެއް ވަންދެން ނުނިދާ ހުންނަ ހެން... މީހަކާ އަނގައިން ބުނެ ވާހަކަ ދައްކަނީ މަދު ފަހަރަކު... އަހަރެން މަންޝާ ދެކެ ވަރަށް ލޯބިވޭ.. އަޅެ އޭނާއަށް ވާގޮތެއް މަށަށް ބަލާދީބަލަ..."
ވެގެން އުޅޭ ގޮތް އެއްފައްޗަކަށް ކިޔައިދިނުމުން އަސްރާ ފުން ނޭވާއެއް ބޭރުކޮށްލިއެވެ. ބޭރަށް ނިކުމެ ގޭގެ ދޮރު ލައްޕާލުމަށްފަހު މަޑު ހިނގުމެއްގައި އެގޭ ގޯޅިތެރެއަށް އަސްރާރް ނިކުތީ އެއީ އޭނާ އުޅެ ފަރިތަ ތަނަކަށް ވާތީއެވެ. ގޭގެ ގޯޅިގަނޑުތެރޭ ހުރި ޖޯލިފަތީގައި ފައި ޖެހުމުން އަސްރާރްގެ ފިޔަވަޅު މަޑުކޮށްލިއެވެ. އަދި މަޑުމަޑުން ޖޯލީގައި އިށީނުމަށްފަހު އަޒީމް ދައްކަމުން ދިޔަ ވާހަކަތައް އޭނާ އަޑުއަހަން އޮތީ ފުން ވިސްނުމެއްގައެވެ.
*** *** *** *** *** ***
"އަސްލު އަހަރެން ވަރަށް ބޭނުންވި އެހީވާން.. އެ ދުވަސްކޮޅު އަހަރެން އޮތީ ދެރަށެއްގެ ކުއްޖެއް ރަނގަޅުކޮށްދޭން ކިޔަވާ ގޮތަށް... އެހެންވެ ބުނިން ހަމަޖެހިގެން މަ ގުޅާނަމޭ.." ކޮފީތަށި މަޑުމަޑުން ވަތުތަށިމަތީ ބަހައްޓަމުން ގޮނޑީގައި އަސްރާރް ލެނގިލިއެވެ.
"އެހެންވީމަ އެބަ އެނގޭ ދޯ އެއީ އަޒީމް ކުރާކަމެއް ނޫންކަން..." ވިސްނާލަން އިނދެފައި ރިޔާޒް ވާހަކަ ދެއްކީ ވެގެންއުޅޭ ގޮތެއް އޭނާއަށް ވެސް ނުވިސްނޭތީއެެވެ.
"އަދި އޭގެ ކުރިން ފަހަރަކު ވެސް ގުޅި.. އެކަމަކު އެފަހަރު އޭނާ ދެއްކީ މުޅިން އެހެންވާހަކައެއް..."
*** *** *** *** *** ***
"އަސްރާ.. އަހަރެން މިފޮތްތައް ކިޔާ ވަރަކަށް ބޯ ސަކަރާތްވަނީ... މިކޮޅުގައި އުޅޭ ފަންޑިތަހަދާ މީހަކަށް މި ފޮތްތައް އަހަރެން ދައްކައިފިން... އޭނަ ބުނީ ހަށިރައްކަލަށް ހަދާފަ އަޅާ ތަވީދެއް އިން. އެ ތަވީދު އަޅާއިގެން ހުރެއްޖިއްޔާ އެއްވެސް ގެއްލުމެއް އެމީހަކަށް ނުލިބޭނެޔޯ... އަހަރެންގެ ބައްޕަ އެދުވަހު އަހަރެން ގައިގަވެސް ތަވީދު އެޅުވި.. ބައްޕަގެ އަތުގަ ތަވީދު އަޅައިދިނީ އަހަރެންގެ މަންމަ... ދެން އެރޭ އެމީހުން އެ ފަންގޭތެރޭ ކިޔަވަންގޮސް ތިއްބާ އަހަރެންގެ ދެލޮލުން ދެކުނިން އަލިފާން ގުޅައެއް އެތަނަށް އައި ގޮތް.. އަދި އެތަނުގައި ހުޅުހިފި މަންޒަރު.. އެންމެން ސަލާމަތްވި އެކަމަކު އަހަރެންގެ ބައްޕަ...." އަލި ތައްކާނު މަރުވި ދުވަހުގެ އެ ބިރުވެރި ހާދިޘާ ހަނދާންކުރަމުން އަޒީމް ފޯނުން އެވާހަކަތައް ހިއްސާކުރަމުން ދިޔައީ އަސްރާރްއާއެވެ.
"އެންމެން ތިއްބާ ހަމައެކަނި އަޒީމްގެ ބައްޕައަށް އަނިޔާއެއް ލިބުނީމަ... ތިކަމުގައި ވަރަށް ބޮޑު މައްސަލައެއް އެބައުޅޭ... ތިކަން ބަލާލެވިދާނެ.. އެކަމަކު ތިކަން ކުރަން މަށަށް ޖެހޭނީ އައްޑޫއަށް ދާން..." އަސްރާރުގެ ވާހަކަ މެދުކެނޑުމުން އަޒީމް ފުން ނޭވާއެއް ބޭރުކޮށްލިއެވެ.
"އަހަރެން މިކޮޅުން މީހަކާ ވާހަކަ ދައްކައިގެން ކަންތައްވެފަ އޮތްގޮތް ބަލާނަން.. ކަމެއް ގޯސްވަންޏާ އަހަރެން ޚަބަރެއް ވާނަން..." އަޒީމްގެ ނިންމުން ހާމަކުރުމުން އަސްރާރް އެކަމާ ދެކޮޅެއް ނަހަދައެވެ.
*** *** *** *** *** ***
ތި ބުނި ކަންތަކާ މަންޝާއަށް ވަމުންދޯ ގޮތާ ގުޅުމެއް އޮވެދާނެހެން ހީވޭތަ؟.." ސިނގިރޭޓް ބުރި އަޅިކެނޑީ ތެރެއަށް ނިއްވާލުމަށްފަހު ނިތްކުރީގައި އެއްއަތް ވިއްދާލަމުން ރިޔާޒަށް ހީވިހީވުން އަސްރާރާ ހިއްސާކުރިއެވެ.
"ހޫންން.. ވެދާނެ.. އެއީ އެކަންތައް ބަލަން އޭނަ ސިހުރުގެ ބޭނުންހިފައިފިއްޔާ އެކަމުގެ އަނިޔާއެއް މަންޝާއަށް ލިބުމަކީވެސް އެކަށީގެންވާކަމެއް... ޖިންނިން މެދުވެރިކޮށް ކުރެވޭ ކަންތައްތަކުގައި އެމީހުންގެ އެދުމެއް ނެތި ކަމެއް ނުކޮށްދޭނެ... ތިވާނީ އަޒީމް ވަރުގަދަ ޑީލެއް ހެދީކަމަށް..." އަސްރާރްގެ ވިސްނުންހުރި ގޮތް ހާމަކުރުމުން ރިޔާޒް ދެއަތަށް ބޯ ހޫރާލިއެވެ.
"މަ އޭރުވެސް ބުނިން އެ ފޮތްތައް ހާވާނެކަމެއް ނެތޭ... ސިހުރު ފޮތްބޮނޑި ހާވައިގެން ކުރާނެ ފައިދާއެއް ނޯންނާނޭ.. އަޒީމަކީވެސް މަބުންޏަކަސް ބުނާގޮތެއް ހަދާ މީހެއް ނޫން... އަޅެ އަޒީމަށް ގުޅާބަލަ.. މަންޝާއާ ދޭތެރޭ މިހާރު އޭނަ ބުނާއެއްޗެއް ބަލާލަން..." އަޒީމްގެ އެދުމަށް އަސްރާރް ބޯޖަހާލަމުން ޖީބުގައި އަތް ޖައްސާލީ އޭނާގެ ފޯނު ނަގާށެވެ. އޭނާ ގެންގުޅޭ އައި ފޯނު ނެގުމަށްފަހު އޭގައި އިނގިލިން ޓަޗްކޮށްލަމުން ކަންފަތާ ފޯނު ގާތްކޮށްލީ ފޯނުން ދެމުންދިޔަ އިރުޝާދުތައް އަޑުއަހާށެވެ.
"އަޒީމް އެންމެ ފަހުން ގުޅީ ކޮންއިރަކު..." ރިޔާޒް ހިތް އަވަސްވެފައިވީ ނަމަވެސް އޭނާ ބޭނުންވީ ހަަމަޖެހޭށެވެ.
"ދެ ހަފްތާ ކުރި އެއީ.. ޝްޝް.. ވާހަކަ ނުދައްކައްޗޭ.. އެބަ ރިންގްވޭ..." ކަންފާތާ ފޯނު ގާތްކޮށްލަމުން އަސްރާރް ބުނި ޖުމްލައިން ރިޔާޒް މަޑުކޮށްގެން އިނީ އެދެމެދުގައި ދެކެވޭ ވާހަކަތައް އަޑުއަހާ ހިތުންނެވެ.
(ނުނިމޭ)
