އިންތިހާބަށް ސަރުކާރުން އެތައް ނުފޫޒެއް ފޯރުވަމުންދާ ކަމަށާއި، ގޯއްޗާއި ފުލެޓު ބެހުމާއި އެތައް ވަޒީފާއެއް ދެމުން އަންނައިރު އޭސީސީން ސަރުކާރުން ކުރާ ކަންކަމަށް ތަރުހީބު ދެމުން އަންނަކަމުގައި އެމްޑީޕީން ބުނެފިއެވެ.
އެމްޑީޕީގެ ފަރާތުން ހުޅުމާލޭ އުތުރު ދާއިރާގެ ކެންޑިޑޭޓު ފާތިމަތު ޒަހިއްޔާ އަށް ޗިޓު ފޮނުވުމަށްފަހު މިހާރު ކެންސަލްކޮށްފައިވާކަމަށާއި މިއީ ސިޔާސީ ނުފޫޒު އެ މުއައްސަސާއަށް ފޯރާފައިވާ މިންވަރު ދައްކައިދޭކަމެއް ކަމުގައި އެމްޑީޕީން ބުނެފިއެވެ.
އެޕާޓީން ނެރުނު ބަޔާނެއްގައި ބުނީ އިންތިހާބަށް ވަގުތު ކުޑަތަން ވަމުންދާ އިރު، އެކަންކަމާ ގުޅުން ހުރި މުއައްސަސާތަކުން އެކަމަށް ތައްޔާރުވެފައި ނެތް ކަމަށެވެ. އެކަމުގެ ސަބަބުން ދަތިތަކެއް ހުރިކަން ފާހަގަކޮށް އެމްޑީޕީން ބުނީ ފޯމު ސަބްމިޓު ކުރަން އެކަށީގެންވާ މުއްދަތެއް ދީފައިނުވާ ކަމަށެވެ. އިންތިހާބަށް ފޯމު ހުށަހެޅުމަށް އިތުރު 10 ދުވަހުގެ މުއްދަތައް އެދެމުން އެމްޑީޕީން ބުނީ ސަރުކާރު ކެންޑިޑޭޓުންނަށް ފަހިވާ ގޮތަށް އެތައް ކަމެއް ކުރަމުން ދާތަން ފެންނަކަމަށެވެ.
މިއީ މިނިވަން އިންތިހާބަކަށް ޖާގަ ނުދިނުމަށް ކުރާ ކަމެއްގެ ގޮތުގައި ސިފަކޮށް އެމްޑީޕީން ބުނީ މިނިވަން އިންސާފުވެރި އިންތިހާބެއް ކަށަވަރުކޮށް ދިނުމަށް އިލެކްޝަންސް ކޮމިޝަނުން މަސައްކަތް ކުރަންޖެހޭ ކަމަށެވެ.
އެމްޑީޕީއިން މި އިންތިހާބަށް ވާން ޖެހޭ ތައްޔާރީތައް ވަމުން އަންނަކަން ފާހަގަކޮށް އެ ޕާޓީން ބުނީ ކެންޑިޑޭޓުންގެ ފޯމުތައް ހުށަހެޅުމާއި، ކެމްޕޭން ޓީމުތައް އެކުލަވާލުމާއި، ކެންޕެއިން މެނިފެސްޓޯއެއް އެކުލަވާލައި، މުޅި ރާއްޖޭގައި ކެންޑިޑޭޓުންނަށް ޓްރެއިން ދިނުމުގެ މަސައްކަތް ކުރަމުން އަންނަ ކަމަށެވެ. އެމްޑީޕީއަކީ އިންތިހާބުތަކަށް ފަރިތަ އިންތިޒާމު ވެގެން މަސައްކަތް ކުރާ ޕާޓީއެއް ކަމަށާއި އެ ޕާޓީން މި ނުކުންނަނީ ކައުންސިލުތައް ސިޔާސީ ނުފޫޒުން ސަލާމަތް ކުރަންކަމުގައި އެމްޑީޕީން ވަނީ ބުނެފައެވެ.
"އަޅުގަނޑުމެންނަށް ފެންނަނީ ސަރުކާރުން ކައުންސިލްތަކަށް މަލާމަތްކޮށް އެއީ އެއްވެސް ތަނެއް ނޫން ކަމަށް ދައްކާ ބާރު ކަނޑުވާލަން މަސައްކަތް ކުރަމުންދާ މަންޒަރު. އަޅުގަނޑުމެން އެދެނީ އެމްޑީޕީގެ ކެންޑިޑޭޓުން ހޮވުން. ރަށްރަށުގެ ތަރައްގީއަށް އަދި ހެވަށް ވެސް މަސައްކަތް ކުރެވޭނީ އޭރުން. ރަށްރަށުގައި މަސައްކަތް ހުއްޓިފައި ހުރި އިރު ވެސް ޕީއެންސީގެ ކައުންސިލަރުން ރައްޔިތުންގެ ހައްގުގައި ބަސް ބުނާ ތަނެއް ނުފެނޭ." އެމްޑީޕީން ވަނީ ބުނެފައެވެ.
އެމްޑީޕީން ކައުންސިލަރުން ހޮވައި ދިނުމަށް އެދެމުން އެ ޕާޓީންބުނީ މިއީ ބާރުވެރި ކައުންސިލްތަކަކަށް މަގު ފަހިވެގެންދާނެ ކަމެއް ކަމަށެވެ. ޕީއެންސީއަށް ވޯޓު ދީފިނަމަ ރަށްރަށް ހިންގަމުންދާނީ ޕީއެންސީގެ ސްޓިއަރިން ކޮމިޓީތަކުން ކަމަށްވެސް އެމްޑީޕީން ވަނީ ބުނެފައެވެ. އަދި ރަށްރަށުގައި ހިންގާ މަޝްރޫއުތަކަށް ރައްޔިތުންގެ ބަސް ބުނުމުގެ ޖާގަ ނެތްކަން ހާމަކޮށް އެމްޑީޕީން ބުނީ މަޝްރޫއުތައް ސަރުކާރުން ބޭނުންވާ ގޮތަކަށް ކުރަމުން ގެންދާ ކަމަށެވެ.
