ދަރިވަރުން ދުވަސް ފަށަން ވާނީ ފަތިސް ނަމާދުން ކަމަށާއި، އެކަން އެގޮތަށް ކުރުމަށް ރައީސް ޑރ. މުހައްމަދު މުއިއްޒު އިލްތިމާސް ކުރައްވައިފިއެވެ.
ޝަހީދު އަލީ ސްކޫލް ހުޅުވުމަށް މިއަދު އެ ސްކޫލުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ މިއަދަކީ ދިރާސީ އާ އަހަރުގެ ކިޔެވުން ފަށާ ދުވަސްކަމުން ދަރިވަރުންނާއި، ޕްރިންސިޕަލުން އަދި ޓީޗަރުންނަށް މަރުހަބާ ދަންނަވާ ކަމަށެވެ.
ތައުލީމީ ހަޔާތަކީ ގައުމާއި، މުޖުތަމައަށް ބޭނުންތެރި ދުވަސްތަކަކަށް ހަދަންވާނެ ކަމަށާއި ހަޔާތުގެ ކޮންމެ ދުވަހެއް އަދި ކޮންމެ ވަގުތެއްވެސް ހޭދަކުރަން ވާނީ އިސްލާމްދީނާ އެއްގޮތަށް ކަމަށް އެ މަނިކުފާނު ވިދާޅުވިއެވެ.
އެ މަނިކުފާނު ވިދާޅުވީ އިސްލާމްދީނުގައި ކަންކަން ބަޔާންކޮށްފައިވަނީ މާތް މަގުސަދުތަކެއްގައި ކަމަށެވެ. އެ ކަންކަމަކީ ހަމައެކަނި ފޮތެއްގައި ލިޔެވިފައި ހުންނަން ޖެހޭ ކަންކަމެއް ނޫން ކަމަށާއި، ދީނުގެ ކަންކަން އޮންނަނީ އަމަލީ ގޮތުން ކޮންމެ ދުވަހަކު އެކަމެއް ކުރުމަށްކަމަށް ރައީސް ވިދާޅުވެފައިވެއެވެ.
ސްކޫލް ނިންމައި ކުރިއަށްދާން ބަލާއިރު ދަރިވަރުންގެ ބިންގާ އެޅިފައިވަނީ ރަނގަޅަށް ނޫން ކަމަށްވަންޏާ ކުރިއަރައިގެން ދިޔުމަށް ދަތިތަކެއް ދިމާވާނެކަމަށް ރައީސް ވިދާޅުވިއެވެ. ދަރިވަރުންގެ ތައުލީމީ ހަޔާތުގައި ރަނގަޅު ބިންގަލެއް އެޅުމަކީ ޓީޗަރުންނާއި މައިންބަފައިންގެ ޒިންމާއެއް ކަމަށާއި، ސަރުކާރުން އެކަމަށް ބޭނުންވާ ވަސީލަތްތައް ފޯރުކޮށްދޭނެކަމަށް ރައީސް ވިދާޅުވިއެވެ.
ސަރުކާރުން މަސައްކަތް ކުރާނީ މާލެއާއި، އެއްފެންވަރުގެ ތައުލީމެއް ރަށްރަށުން ލިބޭނެ ގޮތް ހަދައިދިނުމަށްކަމަށް ވެސް ރައީސް ވިދާޅުވިއެވެ.
