ރާއްޖެ އާއި އިންޑިއާ ދެމެދު އޮތް ގުޅުމަކީ ދެ ގައުމުގެ ރައްޔިތުންގެ ލާބަ އާއި މަންފާއަށްޓަކައި ބިނާވެފައިވާ ތާރީހީ، ވަރުގަދަ ޒަމާންވީ ގުޅުމެއް ކަމަށާއި އިންޑިއާ އިން އަބަދުވެސް ރާއްޖެއަށް އެހީތެރިވާ ކަމަށް ފޮރިން މިނިސްޓަރު ޑރ. އަބްދުﷲ ހަލީލް ވިދާޅުވެއްޖެއެވެ.
ހަލީލް މިފަދައިން ވިދާޅުވެފައިވަނީ އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި ސޯޝަލް ސެންޓަރުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުންނެވެ.
ހަލީލް ވިދާޅުވީ ދެ ގައުމުގެ ދެމެދުގައި އޮތް އެކުވެރިކަމަކީ ހަމައެކަނި ތާރީހީ ފަތްފުށްތަކުން ފެންނަން އޮތް ގުޅުމެއް ނޫން ކަމަށާއި، އެއީ އަމަލީ ގޮތުން ރާއްޖޭގެ ތަރައްގީއާއި ދިވެހިންގެ ދިރިއުޅުމާ ގުޅިފައިވާ ބަދަހި ގުޅުމެއް ކަމަށެވެ.
މިނިސްޓަރު ހަލީލް ވަނީ އިންޑިއާގެ ރައީސް ދުރޯޕަދީ މުރްމޫއަށާއި ބޮޑުވަޒީރު ނަރެންދުރަ މޯދީގެ އިތުރުން އެ ގައުމުގެ އެންމެހާ ރައްޔިތުންނަށް ޖުމްހޫރީ ދުވަހުގެ ތަހުނިޔާއާއި ހެޔޮއެދުންތައް ރައީސް ޑރ. މުހައްމަދު މުއިއްޒުގެ ނަންފުޅުގައި ފޮނުއްވައިފައެވެ.
ހަލީލްގެ ވާހަކައިގައި އިންޑިއާއިން ރާއްޖެއަށް ފޯރުކޮށްދޭ ތަފާތު އެހީތެރިކަން ފާހަގަކުރައްވައި ވިދާޅުވީ، އިންޑިއާއަކީ ކޮންމެ ދަނޑިވަޅެއްގައިވެސް ރާއްޖެއަށް އެހީގެ އަތެއް ދިއްކޮށްލާ ގާތް އެކުވެރިއެއް ކަމަށެވެ. ހާއްސަކޮށް ރާއްޖޭގެ އިޖުތިމާއީ އަދި އިގްތިސާދީ ދާއިރާތަކަށް އެ ގައުމުން ވެދޭ އެހީތެރިކަން ހަލީލް ވަނީ ފާހަގަކުރައްވާފައެވެ.
މި ރަސްމިއްޔާތުގައި ދިވެހި ސަރުކާރުގެ އިސްވެރިންގެ އިތުރުން، އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރާއި، ބޭރު ގައުމުތަކުގެ ޑިޕްލޮމެޓިކް މިޝަންތަކުގެ އިސްވެރިން ބައިވެރިވެވަޑައިގެންނެވިއެވެ.
މީގެ އިތުރުން ކުރީގެ ރައީސް މުހައްމަދު ނަޝީދާއި، ކުރީގެ ރައީސް އިބްރާހިމް މުހައްމަދު ސޯލިހާއި، މާލޭގެ މޭޔަރު އާދަމް އާޒިމްގެ އިތުރުން ތިނަދޫ ސިޓީގެ މޭޔަރު ސައުދު އަލީއާއި ކުރީގެ ވަޒީރުންނާއި ދައުލަތުގެ މަތީ މަގާމުތަކުގައި ތިއްބެވި ބޭފުޅުން ވަނީ ބައިވެރިވެވަޑައިގެންފައެވެ.
