މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ގާނޫނު ބާތިލުކޮށްދިނުމަށް އެދި، މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ހައިކޯޓަށް ދުސްތޫރީ މައްސަލައެއް ހުށަހަޅައިފިއެވެ.
އެމްޖޭއޭއިން ހުށަހެޅި މައްސަލައިގައިވަނީ އެ މައްސަލަ ނިމެންދެން މީޑިއާތަކުގެ މައްޗަށް ފިޔަވަޅު ނޭޅޭ ގޮތަށް ކޮމިޝަނުގެ މައްޗަށް ވަގުތީ އަމުރެއް ނެރެދިނުމަށް އެދިފައެވެ. އެމްޖޭއޭގެ ރައީސް އަހުމަދު ނާއިފް ވިދާޅުވީ އެ ގާނޫނަކީ ރާއްޖޭން ބައިވެރިވެފައި ހުރި ބައިނަލްއަގުވާމީ މުއާހަދާތަކާއި ރާއްޖޭގެ ގާނޫނުއަސާސީއާ ހިލާފަށް އެކުލަވާލާފައި އޮތް ގާނޫނެއް ކަމަށެވެ.
މީގެ އިތުރުން އެމްޖޭއޭއިން ބުނީ މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ގާނޫނު ބާތިލުކުރަން ހައި ކޯޓުގައި އެދުނީ އެ ގާނޫނު ގާނޫނުއަސާސީގެ ގިނަ މާއްދާތަކާ ހިލާފުވުމުން ކަމަށެވެ. އަދި އެ ގާނޫނަކީ އެތަކެއް ހައްގުތަކެއް ނިގުޅައިގަންނަ ގާނޫނެއްކަމަށް އެމްޖޭއޭއިން ވަނީ ބުނެފައެވެ.
އިތުރަށް އެމްޖޭއޭއިން ބުނީ އެ ގާނޫނުގައި މަނާ ކަންކަން ކަމަށް ކަނޑައަޅާފައިވާ ކަންކަމަަކީ ވަކި މާނަކުރުމެއް އަދި ހުދޫދެއް ބަޔާންނުކޮށް ކަނޑައަޅާފައިވާ ކަންކަން ކަމަށެވެ. އެހެންކަމުން ގާނޫނުއަސާސީން ކަށަވަރުކޮށްދީފައިވާ ގާނޫނުގެ ރައްކާތެރިކަމާއި ގާނޫނުން ލިބިދޭ މަންފާތައް ހަމަހަމަކަމާއެކު ލިބުމުގެ ހައްގަށް ހުރަސް އެޅޭކަމަށް ވަނީ ބުނެފައެވެ.
އެ ގާނޫނު ފާސްކުރުމުގައި ރައްޔިތުންގެ މަޖިލީހުން އަމަލުކޮށްފައިވަނީ އިޖުރާއަތުތަކާ ހިލާފަށްކަން ފާހަގަކޮށް ކޯޓަށް ހުށަހެޅި މައްސަލައިގައިވަނީ މިއީ ގާނޫނުއަސާސީން ކަށަވަރުކޮށްދީފައިވާ ހިޔާލުފާޅުކުރުމުގެ މިނިވަންކަމާ، މައުލޫމާތު ހޯދުމާއި މައުލޫމާތު ދިނުމުގެ މިނިވަންކަމަށް ހުރަސް އެޅޭ ގާނޫނެއްކަމަށެވެ. އަދި މި ގާނޫނުގެ ސަބަބުން މަސައްކަތްކުރުމުގެ ހައްގަށް ވެސް ހުރަސްއެޅޭކަމަށް ވަނީ ބުނެފައެވެ.
