މަތީ ތައުލީމް ހާސިލް ކުރަން ބޭނުންވާ ފަރާތްތަކަށް 1.2 ބިލިއަން ރުފިޔާގެ ލޯނު ދޫކޮށްފައިވާ ކަމަށް މަތީ ތައުލީމާއި ތަމްރީނާ ބެހޭ ވުޒާރާއިން ބުނެފިއެވެ.
އެ ވުޒާރާއިން އާންމުކުރި 2024-2025 ވަނަ އަހަރުގެ ތަފާސް ހިސާބުތައް ދައްކާ ގޮތުން މިހާތަނަށް 1،438 ދަރިވަރަކަށް ލޯނު ދޫކޮށްފައިވާއިރު އޭގެ ތެރެއިން 1،211 ދަރިވަރުން ވަނީ ދަސްވެނިވިފައެވެ. އޭގެ ތެރޭގައި ހިމެނެނީ އަންހެން 541 ދަރިވަރުންނާއި 670 ފިރިހެން ދަރިވަރުންނެވެ.
2025 ވަނަ އަހަރު 548،162،080 ރުފިޔާގެ ލޯނު ދޫކޮށްފައިވާއިރު ޖުމްލަ 1.2 ބިލިއަނަށްވުރެ ގިނަ ރުފިޔާގެ ލޯނު ދޫކޮށްފައިވާ ކަމަށް ތަފާސް ހިސާބުތަކުން ދައްކައެވެ. އަދި މިވަގުތު ރާއްޖެއާއި ރާއްޖެއިން ބޭރު 36 ގައުމެއްގައި ދަރިވަރުން މަތީ ތައުލީމް ހާސިލް ކުރަމުންދެއެއެވެ.
މީގެ އިތުރުން ވެސް 2024 ވަނަ އަހަރާއި 2025 ވަނަ އަހަރު ފުރަތަމަ ޑިގްރީ ޕްރޮގްރާމްގެ ތަފާސްހިސާބުތައް އާންމުކޮށްފައިވާއިރު އެ ދެ އަހަރު ސަރުކާރުން ވަނީ އެ ޕްރޮގްރާމަށް 301 މިލިއަނަށް ވުރެ ގިނަ ރުފިޔާ ހަރަދުކޮށްފައެވެ. އަދި މިދިޔަ ދެ އަހަރު އެ ޕްރޮގްރާމްގައި ބައިވެރިވެ 6،640 ދަރިވަރުން ވަނީ ދަސްވެނިވެފައި ކަމަށް ވެސް ތަފާސްހިސާބުތަކުންދައްކައެވެ. އެއީ 4،370 އަންހެން ދަރިވަރަކާއި 2،270 ފިރިހެން ދަރިވަރެކެވެ. މިދިޔަ އަހަރު ދަސްވެނިވެފައިވަނީ 3،286 ދަރިވަރުންނެވެ.
އަދި ސްކޮލާޝިޕްގެ ގޮތުގައި މިދިޔަ ދެ އަހަރު 411 ދަރިވަރަކަށް 471 މިލިއަނަށް ވުރެ ގިނަ ރުފިޔާ ހަރަދުކޮށްފައި ވެއެވެ. ރާއްޖެއާއި ރާއްޖެއިން ބޭރު 20 ގައުމެއްގައި މަތީ ތައުލީމް ހާސިލް ކުރަމުންދެއެވެ.
