މި ރޯދަ މަހު 'ދަ ޕްރެސް' އިން ކިޔުންތެރިންނަށް މި ދޫކޮށްލަނީ، ދުނިޔޭގެ އެކި ކަންކޮޅުތަކުން ކޮންމެހެން ވެސް ދަތުރުކޮށްލަން ރަނގަޅު ގައުމުތަކާ، އެ ގައުމުތަކުގައިވާ ހާއްސަ ތަންތަނެވެ. ބަލާލާ ހިތްވާ ފަދަ ތާރީހީ ބިނާތަކާ، ވާދީތަކާ، އަޖައިބުން ފުރިގެންވާ އެތައް ޝައުގުވެރި ވާހަކަތަކެވެ.
އެގޮތުން މި ލިޔުމުގައި ވެސް ކިޔުންތެރިންނަށް މި ގެނެސް ދެނީ އޭޝިއާއަށް ނިސްބަތްވާ ކަޒަކިސްތާނަށެވެ. ބައެއް ދިވެހިންނަށް މި ނަމަކީ މާ ފަރިތަ ނަމަކަށް ނުވެދާނެއެވެ. ނަމަވެސް މިއީ މިހާރަކަށް އައިސް ދިވެހިން ދަތުރު ކުރުމަށް ލޯބި ކުރާ ގައުމު ތެރޭގައި ހިމެނޭ ގައުމެކޭ ބުނުމުން ދޮގަކަށް ނުވާނެއެވެ. ރާއްޖެއާއި 4،400 ކިލޯމީޓަރު ދުރުގައި އޮންނަ މި ގައުމުގައި 20 މިލިއަނެއްހާ މީހުން އުޅޭ ދިރިއުޅޭއިރު އެ ގައުމުގެ ބަހުރުވައެއްގެ ގޮތުގައި ބޭނުން ކުރަމުންދަނީ 'ކަޒަކް' އަދި ރަޝިއާ ބަހެވެ. މިއީ ތެލާއި ގޭހާއި ޔޫރޭނިއަމް އާއި ކޯލް އަދި ރަނުން މުއްސަނދި ގައުމެކެވެ.
އެ ގައުމުގެ 70 ޕަސެންޓު މީހުންނަކީ މުސްލިމުން ކަމަށްވާއިރު ފައިސާގެ ގޮތުގައި ގެންގުޅެނީ 'ޓެންގް' އެވެ. ރާއްޖެއިން އެ ގައުމަށް ދަތުރު ކުރަން ބޭނުންނަމަ އަސްޓަނާ އެއާލައިނުން ޑައިރެކްޓް ފްލައިޓްތައް ދަތުރު ކުރާއިރު ޑައިރެކްޓުކޮށް ދަތުރު ކުރާނަމަ 6-7 ގަޑީރެއް ހާއިރުން ދެވެއެވެ. އަދި ބޭނުންނަމަ 'ލޭއޯވާ' ކުރުމަށްފަހު ވެސް ދަތުރު ކުރެވެއެވެ.
ލޭއޯވާކޮށް ދަތުރު ކުރާނަމަ، ފްލައި ދުބާއީ، އިންޑިގޯ އަދި ސްރީލަންކަން އެއާލައިންސް ހިޔާރު ކުރެވިދާނެއެވެ. އެހެން ގައުމަށް ލޭއޯވާ ކުރާނަމަ 9-11 ގަޑީރެއްހާއިރު ހޭދަ ކުރަން ޖެހޭނެއެވެ. ޓިކެޓުގެ އަގު އާންމު ގޮތެއްގައި 400-700 އާއި ޑޮލަރުގެ ދެމެދު އުޅޭއިރު ދަތުރު ކުރާ ދުވަސްވަރެއްގެ ސަބަބުން ޓިކެޓުގެ އަގަށް ބަދަލު އައުމަކީ އެކަށީގެންވާ ކަމެކެވެ. ދެން މި ގެނެސްދެނީ އެ ގައުމަށް ދަތުރު ކުރުމަށްފަހު ޒިޔާރަތް ކޮށްލަން ހިތްގައިމު ތަންތަނެވެ.
އަލްމާޓީގެ ފަރުބަދަ ތަކުގެ ވަށައިގެންވާ ލޭކް:
އަލްމާޓީ އަވަށާއި 15 ކިލޯމީޓަރު ދުރުގައި އޮންނަ އުސް ފަރުބަދަތަކުގެ މެދުގައިވާ ހިތްގައިމު ރީތި ނޫ ކުލައިގެ ކުޅިއަށް ދީފައިވާ ނަމަކީ 'އަލްމާޓީ ލޭކް' އެވެ. 2،500 މީޓަރުގެ ބޮޑު މި ކުޅިއަކީ އެ ގައުމަށް ޒިޔާރަތް ކުރާ ފަތުރުވެރިންގެ މެދުގައި ވެސް ބޮޑު މަގުބޫލު ކަމެއް ލިބިފައިވާ ސަރަހައްދެެކެވެ.
ހަނަފަސް ތަނެއްގެ ގުދުރަތީ ރީތިކަން ތަޖުރިބާ ކޮށްލުމަށް 'ޗެރިން ކެންޔަން':
ކަޒަކިސްތާނުގެ އަލްމަޓީ ރީޖަންގައި އޮންނަ ޗަރިން ނޭޝަނަލް ޕާކުގައި އޮންނަ ޗަރިން ކެންޔަން އަކީ ޗައިނާގެ ބޯޑަރު ކައިރީގައި އޮންނަ ސަރަހައްދެކެވެ. އަލްމަޓީގެ އިރުން 200 ކިލޯމީޓަރު (124 މޭލު) ދުރުގައި އޮންނަ މި ސަރަހައްދު އުފެދިފައި ވަނީ އެތައް މިލިއަން އަހަރެއް ވަންދެން ޖެހުނު ވައިގެ ސަބަބުންނެވެ. މިތަން މަޝްހޫރު ވެފައި ވަނީ މަޝްހޫރުވެފައި ވަނީ ރަތް ހިލަ ފަރުބަދަތަކާއި ޓަވަރުތަކާއި ފަރުބަދަތަކުގެ ސަބަބުންނެވެ.
ކޭބަލް ކާރުގެ ތަޖުރިބާ ކޮށްލުމަށް 'ޕާކް ކޮކް ޓޯބޭ':
'ޕާކް ކޮކް ޓޯބޭ' އަކީ ކަޒަކިސްތާނުގެ އަލްމަޓީ އާއި ފެންނަ ފަރުބަދައެއްގެ މަތީގައި އޮންނަ މަޝްހޫރު ރެކްރިއޭޝަނަލް ޕާކެކެވެ. މި ސަރަހައްދުގައި ކޭބަލް ކާރާއި 'ފާސްޓް ކޯސްޓާ'ގެ ތަޖުރިބާ ވެސް ކޮށްލެވޭނެއެވެ. އެފަދަ ތަޖުރިބާއެއް ކޮށްލަން ބޭނުންވާ ފަރާތްތަކަށް މި ތަނަކީ އެންމެ ފުރިހަމަ ތަނަށް ވާނެކަން ޔަގީނެވެ.
ސްކޭޓްކޮށް ސްނޯ ތަޖުރިބާ ކޮށްލަން ބޭނުންވާ ނަމަ 'މެޑިއު ސްކޭޓިން ރިންކް އެންޑް ސްކީ ރިސޯޓް':
މެޑިއު އަލްޕައިން ސްޕޯޓްސް ކޮމްޕްލެކްސް ހުންނަނީ ކަނޑުގެ ލޮނުގަނޑުން 1691 މީޓަރު އުސްމިނުގައި، އައިލް އަލަޓާއު ކެނިޔަންގައެވެ. މިއީ ދުނިޔޭގެ އެންމެ އުސް އައިސް ސްކޭޓިން ރިންކް އެވެ. ކުޅިވަރަށް ލޯބި ކުރާ ފަރާތްތަކުގެ އިތުރުން ރައްޓެހިންނާއެކު އާ ތަޖުރިބާއެއް ކޮށްލަން ބޭނުން ނަމަ މި ސްކައި ރިސޯޓަށް ޒިޔާރަތްކޮށްލަން ރަނގަޅު ވާނެއެވެ.
ތާރީހާއ ސަގާފަތް ފުރިހަމައަށް ތަޖުރިބާ ކޮށްލުމަށް ކަޒަކިސްތާނުގެ ގައުމީ ދާރުލްއާސާރު:
ކަޒަކިސްތާނުގެ ގައުމީ ދާރުލްއާސާރު ހުންނަނީ އަސްތާނާގައެވެ. 2014 ވަނަ އަހަރު ބިނާކުރި މި ދާރުލްއާސާރުއަކީ މެދުތެރޭ އޭޝިއާގެ އެންމެ ބޮޑު ދާރުލްއާސާރެވެ. ނޫ ކުލައިގެ ބިއްލޫރި އަދި ހުދު މާބްލް އިން ހަދާފައިވާ މި ދާރުލް އާސާރުގައި ކަޒަކިސްތާނުގެ އޭރާއި މިހާރުގެ ތާރީހާއި ސަގާފަތް ދައްކުވައިދެއެވެ. މި ދާރުލް އާސާރުގައި އަގުހުރި ހަޒާނާތައް އެކުލެވޭއިރު އާސާރުގެ އެކްސްޓީރިއާ ޑިޒައިންގެ ސަބަބުން ގިނަ ބައެއްގެ ސަމާލުކަން ވަނީ ލިބިފަ އެވެ.
އެހެންކަމުން ކަޒަކިސްތާނަށް އާއިލާ ނުވަތަ ރައްޓެހިންނާއެކު ދަތުރު ކުރާނަމަ މި ހިތްގައިމު ތަންތަނަށް ޒިޔާރަތް ކުރުމުން ދަތުރު އިތުރަށް ފުރިހަމަ ވެގެންދާނެ ކަމާމެދު އެއްވެސް ޝައްކެއް ނުކުރަމެވެ. މީގެ އިތުރުން ވެސް ފިންޏާއި ސްނޯ ތަޖުރިބާ ކޮށްލުމަށް ކެތް މަދުވެފައިވާ ފަރާތްތަކަށް ވެސް މިއީ ޒިޔާރަތް ކޮށްލަން ރަނގަޅު ގައުމަކަށް ވާނެއެވެ.
