މި ރޯދަ މަހު 'ދަ ޕްރެސް' އިން ކިޔުންތެރިންނަށް މި ދޫކޮށްލަނީ، ދުނިޔޭގެ އެކި ކަންކޮޅުތަކުން ކޮންމެހެން ވެސް ދަތުރުކޮށްލަން ރަނގަޅު ގައުމުތަކާ، އެ ގައުމުތަކުގައިވާ ހާއްސަ ތަންތަނެވެ. ބަލާލާ ހިތްވާ ފަދަ ތާރީހީ ބިނާތަކާ، ވާދީތަކާ، އަޖައިބުން ފުރިގެންވާ އެތައް ޝައުގުވެރި ވާހަކަތަކެވެ.
އެގޮތުން މި ލިޔުމުގައި ވެސް ކިޔުންތެރިންނަށް ގެނެސްދޭން މިއުޅެނީ މިހާރަކަށް އައިސް ދިވެހިންގެ ތެރޭގައި ވަރަށް ބޮޑަށް މަގުބޫލު ވަމުން އަންނަ ގައުމެއް ކަމަށްވާ ވިއެޓްނާމަށެވެ. ރައްޓެހިންނާއެކު ޗުއްޓީ ހޭދަކޮށްލުމުގެ އިތުރުން ކައިވެނިކޮށްގެން 'ހަނީމޫން' ހަދާލަން ދާންވެސް މިއީ ހަމަ އެއްވަނައިގެ ގައުމެކެވެ. ރާއްޖެއާއި 4019 ކިލޯމީޓަރު ދުރުގައި އޮންނަ ވިއެޓްނާމުގައި ފައިސާގެ ގޮތުގައި ބޭނުން ކުރަނީ "ވިއަޓްނެމީޒް ޑޮންގް" އެވެ. 101.6 މިލިއަން މީހުންގެ ބޮޑު އާބާދީއެއް އޮންނަ މި ގައުމުގައި 50 އަށްވުރެ ގިނަ ސިޓީ އޮވެއެވެ.
ގުދުރަތީ ރީތި ކަމާއި ޗާލު އެތައް އިމާރާތްތަކަކުން ޖަރީވެފައިވާ މި ގައުމުގައި އާސާރީ އެތައް ވާހަކަތަކެއް އެކުލެވިގެންވެއެވެ. ދެކުނު އިރުމަތީ އޭޝިއާގައި ހިމެނޭ މި ގައުމަކީ ތަފާތު ރަހަތަކުގެ އަޖުމަ ބަލާލަން ދާންވެސް ރަނގަޅު ގައުމެކެވެ. އެގޮތުން އެ ގައުމަށް ޒިޔާރަތް ކުރާ ފަތުރުވެރިންގެ މެދުގައި އެންމެ ބޮޑު މަގުބޫލު ކަމެއް އުފެދިފައި ވަނީ "ފޯ" ކިޔާ ކާނާގެ ބާވަތަކަށެވެ. ވަކި ވައްތަރެއްގެ ނޫޑްލް ބޭނުންކޮށްގެން ސޫޕް ގޮތަށް ހަދާފައިވާ މި ތަފާތު ކާނާއަކީ އެ ގައުމަށް ޒިޔާރަތް ކުރެވޭ ދުވަހަކުން އިންސާފު ކުރުމަށް ރަނގަޅު ކާނާއަކަށް ވާނެއެވެ. އަދި ހަމަ އެހެންމެ ވިއެޓްނާމުގައި ބިސް އަޅައިން ތައްޔާރު ކުރާ 'އެގް ކޮފީ' އަކީ ވެސް މަގުބޫލު ބުއިމެކެވެ.
މާލެއިން ވިއެޓްނާމުގެ ވެރިކަން ކުރާ ސިޓީ ކަމަށްވާ "ހަނޯއީ" އަށް ދަތުރު ކުރާ ތިން ވަރަކަށް އެއާލައިން އޮވެއެވެ. އެއީ އެއާ އޭޝިއާ، މެލޭޝިއާ އެއާލައިންގެ އިތުރުން ބަޓިކް އެއާލައިނެވެ. އެ ގައުމަށް ދަތުރު ކުރުމުގެ ޓިކެޓު އެކި ދުވަސް ވަރު ތަފާތުއިރު ޑައިރެކްޓު ފްލައިޓްތަކެއް އެގައުމަށް ދަތުރު ނުކުރެއެވެ. އެހެންކަމުން ވިއެޓްނާމަށް ދަތުުރު ކުރެވެނީ މެލޭޝިއާ ނޫންނަމަ ތައިލެންޑު ފަދަ ގައުމަކަށް 'ލޭއޯވާ' ކުރުމަށްފަހުއެވެ. ޓިކެޓު އަގަށް ބަލާނަމަ ދެކޮޅު ޓިކެޓު ގާތްގަނޑަކަށް 400 ޑޮލަރާއި 700 ޑޮލަރާ ދެމެދު އަގެއްގައި ލިބެއެވެ. ނަމަވެސް ދަތުރު ކުރާ ދުވަސްވަރެއްގެ ސަބަބުން ޓިކެޓުގެ އަގަށް ބަދަލު އައުމަކީ އެކަށީގެންވާ ކަމެކެވެ. ދެން ކިޔުންތެރިންނަށް މި ގެނެސްދެނީ އެ ގައުމަށް ދިއުމަށްފަހު ޒިޔާރަތް ކޮށްލަން ހިތްފަސޭހަ ތަންތަނާއި ދަތުރުގައި މަޖާ ކުރުމަށް ކޮށްލާނެ ބައެއް ކަންކަމުގެ ތަފްސީލެވެ.
އެތައް ފަރުބަދަ ތަކަކާއި ރީތި މޫދެއް އެކުލެވިގެންވާ 'ހަ ލޯންގް ބޭ':
އެ ގައުމަށް ދަތުރު ކުރާ އެތައް ހާސް ފަތުރުވެރިންގެ މެދުގައި މަގުބޫލު ކަމެއް ލިބިފައިވާ 'ހަ ލޯންގް ބޭ' އަކީ މޫދުގައި އެކުލެވިގެންވާ ފަރުބަދަތަކާއި އެ ސަރަހައްދުގެ މޫދުގެ ރީތި ކަމުން ނަން މަޝްހޫރު ތަނެކެވެ. ޔުނެސްކޯގެ ވޯލްޑް ހެރިޓޭޖްގެ ގޮތުގައި ލިސްޓު ކުރެވިފައިވާ މި ސަރަހައްދަކީ ޖަންކް ބޯޓް ކްރޫޒް، އާއި ކަޔާކިންގެ އިތުރުން ހޮހަޅަތައް ބަލާލަން ބޭނުންވާ ފަރާތްތަކަށް އެންމެ އެކަށޭނެ ތަނެވެ.
ޖުމްލަ 1،553 ކިލޯމީޓަރު ހުންނަ މި ސަރަހައްދުގައި ހުންނަ ލައިމްސްޓޯން ތަރައްގީވެފައި ވަނީ 500 މިލިއަން އަހަރަށްވުރެ ދިގު މުއްދަތެއްގެ ތެރޭގައި ކަމަށް ތަޖުރިބާ ކާރުން ބުނެއެވެ. މިއީ އޭޝިއާ ސަރަހައްދުގައި ހުންނަ ރީތި ސަރަހައްދުތަކުން އެއް ސަރަހައްދު ކަމަށްވާއިރު ވިއެޓްނާމްގެ ވެރިރަށް ހަނޯއީން އެ ސަރަހައްދަށް ކާރުގައި 2 ގަޑީރާއި 30 މިނެޓުން ދަތުރުކުރެވެއެވެ. އަދި ބަހުގައި ދަތުރު ކުރަން ބޭނުންވާ ފަރާތްތަކަށް އެ ފުރުސަތު ވެސް ހުޅުވާލާފައިވާއިރު ބަހުގައި ދަތުރު ކުރުމަށް 3 ގަޑީރާއި 20 ވަރަކަށް މިނެޓު ހޭދަވެއެވެ.
ހަނި މަގުތަކުގައި ދުއްވާ ރޭލާއި ހިތްގައިމު އެތައް ތަނެއް ތަޖުރިބާ ކޮށްލުމަށް ހަނޯއީ:
ހަނޯއީ އަކީ އެތައް ހިތްގައިމު ތަންތަނާއި ބިނާތައް އެކުލެވޭ އެ ގައުމުގެ ތާރީހާއި ސަގާފަތުން މުއްސަނދިވެފައިވާ އަވަށެކެވެ. އެހެންކަމުން ހަނޯއީގެ މި ސަރަހައްދުތަކަށް ގޮސްލާ ހިތްފަސޭހަ ވަގުތުތަކެއް ކޮށްލުމުމް ނޫނީ ދަތުރު ފުރިހަމަ ވެގެން ނުދާނެކަން ޔަގީނެވެ.
- ރޭލު ދުއްވާ ހަނި މަގު - އެ ގައުމަށް ޒިޔާރަތްކުރާ އެތައް ފަތުރުވެރިންނެއް އެ ތަޖުރިބާއަކަށް އެންމެ އިންތިޒާރު ކުރާ އެއް ކަމަކީ ހަނި މަގަކުން ރޭލު ދުއްވާފައި ދާއިރު ދެ ފަރާތުގައި ހުންނަ ކުދި ކުދި ކެފޭ ތަކުގައި ވަގުތު ހޭދަކޮށް އެ ފެންނަ ހިތްގައިމު މަންޒަރު ތަޖުރިބާ ކޮށްލުމުގެ ތަޖުރިބާއެވެ.
- ވޯޓާ ޕަޕެޓް ޝޯ - އެހެން ގައުމު ތަކުގައި ވެސް ޕަޕެޓް ޝޯއަކީ އާންމު އެއް ހަރަކާތް ނަމަވެސް ވިއެޓްނާމުގައި މިކަން ކުރާ ގޮތް ވަރަށް ތަފާތެވެ. ސްޓޭޖެއް ރަމްޒުކޮށްދޭ ފެން ގަނޑެއްގެ ތެރޭގައި އެ ގައުމުގެ މީހުން ޕަޕެޓް ޝޯ ކުޅޭ އިރު އެ މަންޒަރު ބެލުމަށް ގިނަ ފަތުރުވެރިން ލޯބި ކުރެއެވެ. އެހެން ކަމުން މި ތަފާތު ތަޖުރިބާ ކޮށްލުމުން ދަތުރު އިތުރަށް ފުރިހަމަ ވެގެންދާނެއެވެ.
- އިންސެންސް ވިލެޖް - އިންސެންސް ނުވަތަ ދިވެހިން ބުނާނަމަ ދުންދަނޑި އުފައްދާ މި ތަނަކީ ވެސް ޒިޔާރަތް ކޮށްލާ ފޮޓޯ ނަގާލަން ހިތްގައިމު ތަނެކެވެ. ތަފާތު އެކި ކުލަތަކުން ޖަރީވެފައިވާ މި ތަނުގައި މީގެ އިތުރުން ވެސް ސަގާފީ އެތައް ކަމެއް ކޮށްލުމުގެ ފުރުސަތު ލިބިގެންދެއެވެ. އެގޮތުން ހެޓް ޕެއިންޓިންގް އާއި އެ ގައުމުގެ ސަގާފީ އެތައް މައުލޫމަތެއް ލިބިގެން ދެއެވެ.
ގުދުރަތީ ހިތްގައިމު ކަމުން އާޝޯހު ކުރަނިވި ސާޕާ:
ވިއެޓްނާމުގެ ވެރިރަށް ހަނޯއީން ސާޕާއަށް އެއްގަމުން ވެސް ދަތުރު ކުރެވޭއިރު ބަހުގައި ހައެއްކަ ގަޑީރުން ދެވެއެވެ. ބަހުގެ ޓިކެޓު 11 ޑޮލަރާއި 27 ޑޮލަރުގެ ރޭޓެއްގައި ލިބޭއިރު ޓްރެއިންގައި 8 ގަޑީރެއްހާއިރުން ދަތުރު ކުރެވެއެވެ. އަދި ކާރެއްގައި ދަތުރު ކުރާނަމަ 4 ވަރަކަށް ގަޑީރުގެ ދަތުރެއް ކުރަންޖެހެއެވެ. ދަތުރު ކިތަންމެ ދިގު ނަމަވެސް އެ ސަރަހައްދަށް ދެވުމުން އެ ލިބޭ އުފާވެރިކަމާއި ހިތް ހަމަޖެހުން ދެ ގުނަވެއެވެ.
މި އަވަށުގައި ޒިޔާރަތް ކުރުމަށް އެންމެ ރަނގަޅު ތަންތަނުގެ ތެރޭގައި ގްލާސް ބްރިޖު ހިމެނެއެވެ. ތިރި ފެންނަ ގޮތަށް ބިއްލޫރިން ހަދާފައިވާ މި ބްރިޖަކީ 2000 ކިލޯމީޓަރު އުހުގައި ހަދާފައިވާ ހިތް ގައިމު ތަނެކެވެ. މި ބްރިޖަށް އެރުމަށްފަހު ވަށައިގެންވާ މާހައުލާއި ތިރިން ފެންނަ މަންޒަރު ތަކުން ދަތުރު އިތުރަށް ފުރިހަމަ ކޮށްދެއެވެ.
ހަމަ އެހެންމެ "މޮއާނާ ސަޕާ ޕިއާނޯ" އަކީ މޮއާނާ ސަޕާ ފޮޓޯ ސްޕޮޓްގައި ހުންނަ މަޝްހޫރު އަދި ރީތި ހުދު ޕިއާނޯ ކައިރި ފޮޓޯއެއް ނަގާލަން ޗާލު ސަރަހައްދެކެވެ. މީގެ އިތުރުން ވެސް ސާޕާ ޒިޔާރަތް ކުރެވިދާނެ ތަންތަނުގެ ތެރޭގައި ކޭބަލް ކާރާއި ހަނޑޫ ދަނޑުތަކުގެ ތަޖުރިބާ ކޮށްލުމުގެ އިތުރުން ޗާލު ފެނުގެ ވާދީތައް ވެސް ބަލާލަން ހިތްގައިމެވެ.
ނޯވާ ޑްރީމްސް އެޑްވެންޗާ ވޯލްޑް:
ކުޑަ ކުދިން ގޮވައިގެން ޗުއްޓީ ހޭދަކޮށްލަން ވިއެޓްނާމަށް ދާނަމަ މިތަނަކީ އެއްވަނައިގެ ތަނެކެވެ. ފެނުގެ އެކި ކުޅިވަރުތަކާއި ކާ ތަކެތީގެ ތަފާތު ސްޓޯލް ތަކުގެ އިތުރުން މުނިފޫހި ފިލުވުމަށް މި އެޑްވެންޗާ ވޯލްޑުގައި ތަފާތު އެކި ހަރަކާތްތައް ވަނީ އެކުލަވާލާފައެވެ. ހެނދުނު 9 އިން ހަވީރު 5 އަށް ހުޅުވާފައި ހުންނަ މި އެޑްވެންޗާ ވޯލްޑުގެ އެންޓްރީ ޓިކެޓު އުޅެނީ 13 ޑޮލަރަށެވެ.
މީގެ އިތުރުން ގުދުރަތީ އެތައް ހިތްގައިމު ކަމެއް އެކުލެވޭ ވިއެޓްނާމުގައި ޒިޔާރަތް ކުރާނެ އެތައް ތަނެއް ވެއެވެ. މި ލިޔުމުގައި ހުރިހާ ތަނެއްގެ މައުލޫމާތު ހިމަނާލާފައި ނުވި ނަމަވެސް އާއިލާ އާއެކު ނުވަތަ ރައްޓެހިންނާއެކު ގޮސް ދިރިއުޅުމުގެ ހަލަބޮލި މާހާއުލާ ފެއަށް ޖެހި ހަށިގަނޑު ރިލެކްސް ކޮށްލުމަށް މި ތަންތަނަށް ޒިޔާރަތް ކޮށްލުން ރަނގަޅު ވާނެއެވެ.
