ބޭ އޮފް ބެންގާލްގައި އުފެދިފައިވާ ތޫފާން "އަކްވާން" އިތުރަށް ބާރުގަދަވަމުންދާތީ، އިންޑިއާގެ އިރުމަތީ އައްސޭރިފަށުގެ ސަރަހައްދުތަކުގައި ދިރިއުޅޭ ފަރާތްތަކުން ސަމާލުވުމަށް މޫސުމާ ބެހޭ އިދާރާއިން އަންގައިފިއެވެ.

އިންޑިއާގެ މޫސުމާ ބެހޭ އިދާރާ (އައިއެމްޑީ) އިން މިއަދު ބުނީ، ދެކުނާ ހުޅަނގު މެދުތެރޭ ބޭ އޮފް ބެންގާލްގައި އުފެދިފައިވާ މި ތޫފާން ހުޅަނގު-އުތުރަށް ދަތުރުކޮށް، ބާރުގަދަ ތޫފާނަކަށް ބަދަލުވެފައިވާކަމަށެވެ. އަދި ނޮވެމްބަރު 19 ވަނަ ދުވަހާ ހަމައަށް މި ތޫފާން ވަރަށް ބާރުގަދަ ތޫފާނަކަށް ބަދަލުވާނެ ކަމަށް އެ އިދާރާއިން ލަފާކުރެވެއެވެ.

މި ތޫފާން ނޮވެމްބަރު 20 ވަނަ ދުވަހުގެ މެންދުރުގެ ވަގުތެއްގައި އަންދްރަ ޕްރަދޭޝް އަދި ޔަނާމްގެ އައްސޭރިފަށަށް (ނެލޯރާއި ޓޫނީއާ ދެމެދުގެ ސަރަހައްދަކަށް) އަރާނެ ކަމަށް އައިއެމްޑީން ލަފާކުރެއެވެ. ތޫފާން އަރާ ވަގުތު ގަޑިއަކު 120 ކިލޯމީޓަރާއި 130 ކިލޯމީޓަރާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު 145 ކިލޯމީޓަރަށް ވައިގަދަވާނެ ކަމަށްވެސް ލަފާކޮށްފައިވެއެވެ.

މި ތޫފާނުގެ އަސަރު އަންދްރަ ޕްރަދޭޝްގެ އިތުރުން އިންޑިއާގެ އެހެން ބައެއް ސްޓޭޓްތަކަށްވެސް ކުރާނެއެވެ. އެގޮތުން ޓަމިލްނާޑޫ، ޕުޑުޗެރީ އަދި ކަރައިކަލްއަށް ނޮވެމްބަރު 17 އިން 19 އަށް ބޯކޮށް ވާރޭވެހޭނެ ކަމަށް ލަފާކޮށްފައިވާއިރު އަންދްރަ ޕްރަދޭޝްގެ އައްސޭރިފަށް ނޮވެމްބަރު 19 އިން ފެށިގެން އާދަޔާ ހިލާފަށް ބޯކޮށް ވާރޭވެހޭނެކަމަށް އައިއެމްޑީން ވަނީ ލަފާކޮށްފައެވެ.

މީގެ އިތުރުން ދެކުނު އޮޑިޝާއަށް ނޮވެމްބަރު 19 އަދި 20 ވަނަ ދުވަހު ވަރަށް ބޯކޮށް ވާރޭވެހޭނެ ކަމަށް ވަނީ ލަފާކޮށްފައެވެ. އަދި ގަންޖެޓިކް ވެސްޓް ބެންގާލް، ތެލަންގާނާ އަދި ޖާރްކަންޑަށްވެސް ކުރިއަށް އޮތް ދުވަސްތަކުގައި ވާރޭވެހޭނެ ކަމަށް މޫސުމާ ބެހޭ އިދާރާއިން ބުނެއެވެ.

މި ތޫފާނާ ގުޅިގެން ކަނޑުތައް ވަރަށް ބޮޑަށް ގަދަވާނެތީ، މަސްވެރިން ކަނޑަށް ނުނިކުތުމަށާ، މިހާރު ކަނޑުމަތީގައި ތިބި މަސްވެރިން އަވަހަށް އައްސޭރިއަށް އައުމަށް އައިއެމްޑީން ވަނީ އިލްތިމާސްކޮށްފައެވެ. އަދި އައްސޭރިފަށުގެ ސަރަހައްދުތަކުގައި ދިރިއުޅޭ ރައްޔިތުން މޫސުމާ ބެހޭ ރަސްމީ އިދާރާތަކުން ދޭ އިރުޝާދުތަކަށް ސަމާލުވުމަށްވެސް ވަނީ އަންގާފައެވެ.