ކުރިއަށް އޮތް 2028 ވަނަ އަހަރުގެ ރިޔާސީ އިންތިހާބުގައި އިދިކޮޅު އެމްޑީޕީގެ ޓިކެޓް ހޯއްދެވުމަށްޓަކައި އެ ޕާޓީގެ ޕްރައިމަރީގައި ވާދަކުރައްވާނެކަން ކުރީގެ ނައިބު ރައީސް ފައިސަލް ނަސީމް މިއަދު ރަސްމީކޮށް އިއުލާން ކުރައްވައިފިއެވެ.
ރާއްޖެ ޓީވީގެ "ފަށާއިރު" ޕްރޮގްރާމްގައި ވާހަކަފުޅު ދައްކަވަމުން ފައިސަލް ވިދާޅުވީ، ޕްރައިމަރީގައި ވާދަކުރައްވަން ނިންމެވީ ކުރީގެ ރައީސް އިބްރާހިމް މުހައްމަދު ސޯލިހް (އިބޫ) އާއެކު މަޝްވަރާ ކުރެއްވުމަށްފަހު، އެމަނިކުފާނުގެ ބޮޑު އެއްބާރުލުމަކާއި ތާއީދާއެކުގައި ކަމަށެވެ. އަދި ވޭތުވެދިޔަ ދުވަސްތަކުގައި ކުރެއްވި މަސައްކަތަކީ ސިޔާސީ މަސްރަހު ދިރާސާކުރުން ކަމަށްވެސް އޭނާ ފާހަގަކުރެއްވިއެވެ.
އިބޫއަށް ތައުރީފު ކުރައްވަމުން ފައިސަލް ވިދާޅުވީ، އިބޫއަކީ ނިމިދިޔަ އެމްޑީޕީގެ ސަރުކާރުގައި ރައްޔިތުންނަށް ވަރަށް ގިނަ ހިދުމަތްތަކެއް ކޮށްދެއްވި ބޭފުޅެއް ކަމަށް ގިނަ ބަޔަކު ގަބޫލުކުރާ ކަމަށެވެ. އަދި ކުރިއަށް އޮތް މަސައްކަތަކީ އުނދަގޫ މަސައްކަތެއް ކަމަށާއި، ބޭނުންވަނީ ރޭގަނޑާއި ދުވާލު ހުއްޓުމެއް ނެތި ވަރުގަދައަށް މަސައްކަތް ކުރެވޭނެ ޓީމެއް ކަމަށްވެސް ވިދާޅުވިއެވެ.
މި ޕްރޮގްރާމްގައި ފައިސަލްގެ ރަނިންމޭޓެއްގެ ގޮތުގައި ކަނޑައަޅުއްވާފައިވަނީ މާލޭގެ މިހާރުގެ މޭޔަރު އާދަމް އާޒިމް ކަން ވަނީ ހާމަކުރައްވާފައެވެ. ޕްރޮގްރާމްގައި ބައިވެރިވެވަޑައިގެން މޭޔަރު އާޒިމް ވިދާޅުވީ، ފައިސަލްގެ ދައުވަތު ގަބޫލުކުރައްވައި، އޭނާގެ ނައިބު ރައީސެއްގެ ގޮތުގައި ކުރިއަށްދާން ތައްޔާރަށް ހުންނެވި ކަމަށެވެ. އަދި އެމްޑީޕީގެ ވެރިކަމެއްގައި ޕާޓީގެ ރައީސާއި ނައިބު ރައީސް ގުޅިގެން މަސައްކަތް ކުރެއްވުމަކީ މުހިންމު ކަމެއް ކަމަށް އާޒިމް ފާހަގަކުރެއްވިއެވެ.
