މާލޭގެ އުތުރު ފަރާތު ބަނދަރު ބޭނުންކުރުމުގައި އާންމުންނަށާއި އުޅަނދުފަހަރަށް ދިމާވަމުންދާ ދަތިތަކަށް ދާއިމީ ހައްލެއް ހޯދައިދިނުމުގެ ގޮތުން، އެ ސަރަހައްދުގެ ޖެޓީތައް ތަރައްގީކުރުމުގެ މަސައްކަތް ފެށުމަށް މިނިސްޓްރީ އޮފް އިންފްރާސްޓްރަކްޗާ، ހައުސިން އެންޑް އާބަން ޑިވެލޮޕްމަންޓުން ނިންމައިފިއެވެ.
މިނިސްޓްރީން ކުރި އިއުލާނެއްގައި ބުނެފައިވަނީ، މި މަޝްރޫއުގެ ދަށުން ޖެޓީތައް ހެދުމުގެ އަމަލީ މަސައްކަތް ފެށުމަށް ޓަކައި، މަސްވެރިންގެ ޕާކު ސަރަހައްދުން ފެށިގެން ނާދީ ގޯޅިއާ ހަމައަށް އަޅާފައިވާ އެންމެހާ އުޅަނދުފަހަރު 2 އޮކްޓޫބަރު 2026 ވާ ހުކުރު ދުވަހުގެ ރޭގަނޑު 11:00 ގެ ކުރިން އެ ސަރަހައްދުން ނަގައި ނިންމަންޖެހޭނެ ކަމަށެވެ.
އަދި އެ ތާރީހުގެ ފަހުން އެ ސަރަހައްދުގެ ފަޅުތެރެއިން ނުނަގާ ހުންނަ އުޅަނދުފަހަރުތައް، މިނިސްޓްރީގެ ފަރާތުން ނަގާނެކަމަށް ވަނީ ބުނެފައެވެ.
މާލޭގެ އުތުރު ފަރާތު ބަނދަރަކީ ރާއްޖޭގެ އެކި އަތޮޅުތަކުން މާލެއަށް މުދަލާއި މީހުން އުފުލާ އޮޑިދޯނިފަހަރާއި، މާލެއާއި ވިލިމާލެ، ތިލަފުށި އަދި ގުޅީފަޅު ދެމެދު ދަތުރުކުރާ އުޅަނދުފަހަރު ބޭނުންކުރާ ސަރަހައްދެކެވެ.
އުތުރު ފަރާތު ބަނދަރުގެ ޖެޓީތައް ތަރައްގީކުރުމުގެ މަސައްކަތަކީ، މާލޭގެ ބޮޑުތަކުރުފާނު މަގު އަލުން ތާރުއަޅާ ފުޅާކޮށް، އިގުތިސާދީ ގޮތުން މާލޭގެ އުތުރު ފަރާތު ސަރަހައްދު މުޅިން ބަދަލުކޮށްލުމަށް ސަރުކާރުން ކުރިއަށްގެންދާ ބޮޑު މަޝްރޫއެކެވެ.
ސަރުކާރުން ވަނީ ބޮޑުތަކުރުފާނު މަގުގެ އުތުރު ފަރާތުގެ ބޮޑު ބައެއް ތާރުއަޅައި ނިންމާފައެވެ. އަދި ސުނާމީ ބިނާއިން ފެށިގެން އެމްޕީއެލްއާ ހަމައަށް މަގު ހެދުމުގެ މަސައްކަތަށް އޮކްޓޫބަރު 3 ގެ ކުރިން ތަކެއްޗާއި އުޅަނދުތައް ނެގުމަށް ވެސް މިނިސްޓްރީން ވަނީ އަންގާފައެވެ.
