އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ވައިޓް ހައުސްއަށް ވަނުން މަނާކުރުމާ ގުޅިގެން، އެމެރިކާގެ މަޝްހޫރު ތިން މީޑިއާއަކުން ސަރުކާރާ ދެކޮޅަށް ދައުވާކޮށްފިއެވެ.
ވޮޝިންޓަންގައި ހުންނަ އެމެރިކާގެ ޑިސްޓްރިކްޓް ކޯޓަށް ހޯމަ ދުވަހު މި ދައުވާ ހުށަހެޅީ ސީއެންއެން، އެމްއެސް ނައު އަދި ޕޮލިޓިކޯ އިންނެވެ. މި މީޑިއާތަކުން ކޯޓުގައި އެދިފައިވަނީ ޓްރަމްޕްގެ ނިންމެވުމަކީ ގާނޫނުއަސާސީއާ ހިލާފު ނިންމެވުމެއް ކަމަށް ކަނޑައަޅައިދިނުމަށާއި، އެ ނިންމުން ތަންފީޒުކުރުން ހުއްޓުވައިދިނުމަށެވެ.
މި ތިން މީޑިއާއަށް ވައިޓް ހައުސްއަށް ނުވަދެވޭނެކަން ޓްރަމްޕް އިއުލާންކުރެއްވީ ހުކުރު ދުވަހުއެވެ. އެ ނިންމެވުމަށްފަހު، ހޮނިހިރު ދުވަހު އެ އިދާރާއަށް ވަނުމަށް އެ މީޑިއާތަކުގެ ނޫސްވެރިންނަށް ވަނީ ހުރަސްއަޅާފައެވެ. ޓްރަމްޕް ވިދާޅުވި ގޮތުގައި މި ފިޔަވަޅު އެޅުއްވީ އެ މީޑިއާތަކުން އޭނާގެ ޓީމާ ގުޅޭގޮތުން ދޮގު ވާހަކަތައް ލިޔަމުންދާތީއެވެ.
މި މައްސަލައާ ގުޅިގެން ސީއެންއެން، އެމްއެސް ނައު އަދި ޕޮލިޓިކޯ އިން ނެރުނު ގުޅިފައިވާ ބަޔާނެއްގައި ބުނެފައިވަނީ، މީޑިއާތަކުން ގެނެސްދޭންވީ ކޮން ހަބަރެއްކަން ކަނޑައެޅުމުގެ ބާރު ސަރުކާރަށް ނޯންނާނެ ކަމުގެ އުސޫލު ދިފާއުކުރުމަށް ގާނޫނީ ފިޔަވަޅު އަޅަން ނިންމީ ކަމަށެވެ. އަދި އެއްވެސް އިންޒާރަކާ ނުލައި ނޫސްވެރިންގެ ހުއްދަތައް ބާތިލުކުރީ އެ މީޑިއާތަކުން ގެނެސްދޭ ހަބަރުތަކާ މެދު ސަރުކާރުން ހިތްހަމަނުޖެހޭތީ ކަމަށްވެސް އެ ބަޔާނުގައި ފާހަގަކޮށްފައިވެއެވެ.
މި ދައުވާއާ ގުޅިގެން ޓްރަމްޕް ވަނީ އޭނާގެ 'ޓްރުތު ސޯޝަލް' ޕްލެޓްފޯމްގައި އެ މީޑިއާތަކަށް ވަރަށް ބޮޑަށް ފާޑުވިދާޅުވެފައެވެ. ޓްރަމްޕް ވިދާޅުވި ގޮތުގައި އެ ނޫސްތަކަކީ ފެންވަރު ދަށް އަދި ކޮރަޕްޓް ނޫސްތަކެކެވެ. އަދި ގައުމީ ސަލާމަތަށް ނުރައްކާވާ ފަދަ ދޮގު ހަބަރުތައް ފަތުރާ ބަޔަކަށް ދުނިޔޭގެ އެންމެ މުހިންމު އޮފީހަށް ވަނުމުގެ ފުރުސަތު ދީގެން ނުވާނެ ކަމަށްވެސް އޭނާ ވިދާޅުވިއެވެ. މީގެ އިތުރުން، މި މައްސަލަ އިސްތިއުނާފު ކުރައްވާނެ ކަމަށްވެސް ޓްރަމްޕް ވިދާޅުވެފައިވެއެވެ.
މި މައްސަލައާ ގުޅިގެން އެމެރިކާގެ ބޮޑެތި ޓީވީ ނެޓްވޯކްތަކުން ވަނީ ވައިޓް ހައުސްގެ 'ޕޫލް ކަވަރޭޖް' ގައި ބައިވެރިވުން ހުއްޓާލާފައެވެ. ޕޫލް ކަވަރޭޖަކީ ހަރަދު ކުޑަކުރުމުގެ ގޮތުން މީޑިއާތައް ގުޅިގެން ރައީސްގެ ހަރަކާތްތައް ކަވަރުކޮށް، އެ މައުލޫމާތު އެކަކު އަނެކަކާ ހިއްސާކުރުމަށް އޮންނަ އިންތިޒާމެކެވެ. ފޮކްސް ނިއުސްގެ ވޮޝިންޓަން ބިއުރޯ ޗީފް ބްރަޔަން ބޯޓަން ފޮނުއްވި އީމެއިލްއެއްގައި ބުނެފައިވަނީ، އދ.ގެ އާންމު މަޖިލީހަށް ޓްރަމްޕް ނިއުޔޯކަށް ކުރައްވާ ދަތުރުފުޅު ޓީވީ ޕޫލުން ކަވަރު ނުކުރާނެ ކަމަށެވެ. މި ނިންމުން ނިންމީ ސީއެންއެން އަށް އެ މަސައްކަތުގައި ބައިވެރިވުމަށް ވައިޓް ހައުސްއިން ހުރަސްއެޅުމާ ގުޅިގެންނެވެ.
ސީއެންއެން އަކީ ވައިޓް ހައުސްގެ ޕޫލްގައި ހިމެނޭ ފަސް ނެޓްވޯކްގެ ތެރެއިން އެއް ނެޓްވޯކެވެ. ހޯމަ ދުވަހު ވައިޓް ހައުސްގައި ހުންނަ ސީއެންއެންގެ ބޫތު ހުރީ ބަންދުކޮށްފައެވެ. އޭގެ ބަދަލުގައި އެ ނެޓްވޯކްގެ ޓީމުން ލައިވް ކަވަރޭޖް ގެނެސްދިނީ ވައިޓް ހައުސްގެ ސަރަހައްދުން ބޭރުގައި ތިބެގެންނެވެ.
އޭބީސީ، ސީބީއެސް، ސީއެންއެން، ފޮކްސް ނިއުސް އަދި އެންބީސީ އިން ނެރުނު ގުޅިފައިވާ ބަޔާނެއްގައި ބުނެފައިވަނީ، ސަރުކާރާ ގުޅޭ ސައްހަ މައުލޫމާތު ލިބުމަކީ އާންމުންނަށް ވަރަށް މުހިންމު ކަމެއް ކަމަށެވެ. އަދި މީޑިއާއަކުން ގެނެސްދޭ ހަބަރަކާ މެދު ހިތްހަމަނުޖެހިގެން އެއްވެސް ސަރުކާރަކުން މީޑިއާތަކަށް ހުރަސްއަޅައިގެން ނުވާނެ ކަމަށްވެސް އެ ބަޔާނުގައި ފާހަގަކޮށްފައިވެއެވެ.
މި ނެޓްވޯކްތަކުގެ އިތުރުން، ނިއުޔޯކް ޓައިމްސް އަދި ވޮޝިންޓަން ޕޯސްޓުންވެސް ވަނީ ޓްރަމްޕްގެ ހަރަކާތްތަކުގެ ފޮޓޯތައް ހިއްސާނުކުރަން ނިންމާފައެވެ. ވައިޓް ހައުސްގެ މީޑިއާ ސްލޮޓް ހުސްކޮށް އޮތުމުން، ޓްރަމްޕްގެ ނިއުޔޯކް ދަތުރުފުޅުގައި ދެވަނަ ކްރޫއެއްގެ ގޮތުގައި ހަރަކާތްތެރިވީ ކޮންޒަވޭޓިވް ޓީވީ ޗެނަލެއް ކަމަށްވާ 'ރިއަލް އެމެރިކާސް ވޮއިސް' އިންނެވެ.
ހޯމަ ދުވަހު ޓްރަމްޕް ވަނީ ނިއުޔޯކްގެ މޭޔަރު ޒޯހްރާން މަމްދާނީއާ ބައްދަލުކުރައްވާފައެވެ. އެ ބައްދަލުވުމަށްފަހު ބޭއްވި ނޫސްވެރިންގެ ބައްދަލުވުމުގައި މަމްދާނީ ވިދާޅުވީ، ހުރިހާ ނޫސްވެރިންނަށްވެސް ފުރުސަތު އޮންނަން ޖެހޭނެ ކަމަށް ގަބޫލުކުރައްވާ ކަމަށާއި އެކަން ރައީސަށް ދަންނަވާފައިވާނެ ކަމަށެވެ. ނަމަވެސް ޓްރަމްޕް ވަނީ މީޑިއާތަކުން ބޮއިކޮޓް ކުރާނެ ކަމަށް ބުނި ނަމަވެސް އެކަން ނުކުރާ ކަމަށް ވިދާޅުވެ، މީޑިއާތަކަށް ފާޑުކިޔުން ކުރިއަށް ގެންދަވާފައެވެ.
މި މައްސަލަތަކުގެ ތެރޭގައި، ހޯމަ ދުވަހުގެ ރޭ ވައިޓް ހައުސްއިން ވަނީ އެ އިދާރާގެ ވެބްސައިޓުގައި 'ޓްރަމްޕް ޓީވީ' ގެ ނަމުގައި ސްޓްރީމިން ޗެނަލެއް ލޯންޗުކޮށްފައެވެ. މި ޗެނަލުން ފުރަތަމަ ދައްކާފައިވަނީ ޖުލައި މަހު މައުންޓް ރަޝްމޯރ އަށް ޓްރަމްޕް ކުރެއްވި ޒިޔާރަތެއްގެ މަންޒަރުތަކެވެ.
ސީއެންއެން، ޕޮލިޓިކޯ އަދި އެމްއެސް ނައު އަށް ފިޔަވަޅު އެޅުއްވި ވަކި ސަބަބެއް ޓްރަމްޕް ފުރަތަމަ ހާމަނުކުރެއްވި ނަމަވެސް، ފަހުން ވިދާޅުވީ އެއީ ފާއިތުވި އަހަރުތަކުގައި އެ މީޑިއާތަކުން ގެނެސްދީފައިވާ ހަބަރުތަކާ ގުޅިގެން އެޅި ފިޔަވަޅެއް ކަމަށެވެ. އަދި ކުރިއަށް އޮތް ތަނުގައި އިތުރު މީޑިއާތަކަށްވެސް މިފަދަ ފިޔަވަޅުތައް އައުމަކީ އެކަށީގެންވާ ކަމެއް ކަމަށް އޭނާ ވިދާޅުވިއެވެ. ނޫސްވެރިއަކު ކުރި ސުވާލަކަށް ޖަވާބުދެއްވަމުން ޓްރަމްޕް ވިދާޅުވީ ނިއުޔޯކް ޓައިމްސް އަދި ވޮޝިންޓަން ޕޯސްޓަކީވެސް ދޮގު ހަބަރު ފަތުރާ މީޑިއާތައް ކަމަށެވެ.
މި އަހަރުގެ ފެބްރުއަރީ މަހު ވައިޓް ހައުސްއިން ވަނީ ޕްރެސް ޕޫލްގެ ކޮންޓްރޯލް ސަރުކާރުގެ ދަށަށް ގެނެސްފައެވެ. އޭގެ ކުރިން އެއް ގަރުނަށް ވުރެ ގިނަ ދުވަހު އެކަން ބަލަހައްޓަމުން އައީ ވައިޓް ހައުސް ކޮރެސްޕޮންޑެންޓްސް އެސޯސިއޭޝަނުންނެވެ. ހަމަ އެ މަހު، އެސޯސިއޭޓެޑް ޕްރެސް (އޭޕީ) ގެ ނޫސްވެރިންނަށްވެސް ވައިޓް ހައުސްގެ ބައެއް ސަރަހައްދުތަކަށް ވަނުން ވަނީ މަނާކޮށްފައެވެ. އެ ފިޔަވަޅު އެޅީ އެ މީޑިއާއިން 'ގަލްފް އޮފް އެމެރިކާ' ގެ ބަދަލުގައި 'ގަލްފް އޮފް މެކްސިކޯ' ބޭނުންކުރުމާ ގުޅިގެންނެވެ. އެ މައްސަލައިގައި އޭޕީން ކޮށްފައިވާ ދައުވާގެ ޝަރީއަތް އަދިވެސް ދަނީ ކުރިއަށެވެ.
މީގެ ކުރިން 2009 ވަނަ އަހަރު އޮބާމާގެ ސަރުކާރުންވެސް ފޮކްސް ނިއުސް އަށް ފިޔަވަޅު އަޅަން މަސައްކަތްކުރިއެވެ. ނަމަވެސް އެހެން ނެޓްވޯކްތަކުން އެކަމާ ދެކޮޅު ހެދުމުން ފަހުން ވަނީ ފޮކްސް ނިއުސް އަށް ފުރުސަތު ދީފައެވެ. ޓްރަމްޕްގެ ސަރުކާރުން މީގެ ކުރިންވެސް ނިއުޔޯކް ޓައިމްސް، ވޯލް ސްޓްރީޓް ޖާނަލް އަދި ބީބީސީ ފަދަ މީޑިއާތަކާ ދެކޮޅަށް ގާނޫނީ ފިޔަވަޅު އަޅާފައިވެއެވެ. މީގެ ތެރެއިން ބައެއް މައްސަލަތައް ކޯޓުން ބޭރުގައި ނިންމާފައިވާއިރު، ބީބީސީއާ ދެކޮޅަށް ކޮށްފައިވާ ދައުވާގެ މައްސަލަ އަދިވެސް ކޯޓުގައި އެބައޮތެވެ.
