ހއ. ކަނޑާލިފިނޮޅު އެ އަތޮޅު ވަށަފަރުގެ ބައެއްގެ ގޮތުގައި ރައީސް ޑރ. މުހައްމަދު މުއިއްޒު ކަނޑައަޅުއްވައިފިއެވެ.
ކަނޑާލިފިނޮޅު އަކީ އެއަތޮޅުގެ ވަށަފަރުގެ ބައެއް ކަމުގައި ކަނޑައެޅުއްވީ ގާނޫނު ނަންބަރު 2010/7 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު) ގެ 134ވަނަ މާއްދާގެ (ހ) އިން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުންނެވެ.
ރައީސް އޮފީހުން ބުނީ ކަނޑާލިފިނޮޅު އެ އަތޮޅު ވަށަފަރުގެ ބައެއްގެ ގޮތުގައި ރައީސް ހަމަޖެއްސެވީ ހއ. ވަށަފަރު ރައްޔިތުންގެ އެދުމުގެ މަތިންކަމަށެވެ.
މި ގަރާރު އެކަށައެޅުމާއެކު، ދިވެހިރާއްޖޭގައި މީހުން ދިރިއުޅޭ ރަށްތައް ކަނޑައެޅުމަށް އެކަށައަޅައިފައިވާ ރައީސުލްޖުމްހޫރިއްޔާގެ ގަރާރު ނަންބަރު 2/2025 (ދިވެހިރާއްޖޭގައި މީހުން ދިރިއުޅޭ ރަށްތައް ކަނޑައެޅުން) ގެ ޖަދުވަލުގައި ހިމަނައިފައިވާ ދިވެހިރާއްޖޭގައި މީހުން ދިރިއުޅޭ ރަށްތަކުގެ ލިސްޓު ވަނީ އަދާހަމަކުރައްވާ ދިވެހި ސަރުކާރުގެ ގެޒެޓުގައި ޝާއިއުކޮށްފައިވާ ކަމަށް ރައީސް އޮފީހުން ބުނެއެވެ.
ކަނޑާލިފިނޮޅުގެ އިތުރުން ރ. އަތޮޅުގެ އުނގުލު އެ އަތޮޅު އުނގޫފާރުގެ ބައެއް ކަމުގައިވެސް ރައީސް މުއިއްޒު ވަނީ ކަނޑައަޅުއްވާފައެވެ. އުނގޫފާރުގެ ރައްޔިތުން އިގްތިސޯދީ މަސައްކަތްކުރުމަށް އެ އަތޮޅު އުނގުލު ހޯދައިދެއްވާނެ ކަމަށް ރައީސް މީގެކުރިން ވިދާޅުވެފައިވެއެވެ.
ރައީސް ވިދާޅުވީ އެ ރައްޔިތުންގެ ހެވާ ލާބައަށްޓަކައި އަދި ރަށުގެ ތަރައްގީއަށް ކުރަން ހުރި ވަރަށް ގިނަކަންކަން އެބަހުރި ކަމަށާއި އެ ރަށަކީ ރަށުގެ ރައްޔިތުންގެ އިތުރަށް އެތައް ރަށެއްގެ ރައްޔިތުން އެކި ހިދުމަތް ހޯދާ ރަށެއް ކަމަށެވެ. އަދި އެއީ ސަރަހައްދީ ތަރައްގީއަށް ބަލާއިރުގައިވެސް އިސްކަން ދޭން ޖެހޭ މުހިއްމު ރަށެއް ކަމަށް ރައީސް ވިދާޅުވިއެވެ.
