ކުޑަކުދިންގެ ވިޔަފާރި ކޮށް އެކުދިންގެ ފަރަތުން ޖިންސީ ޣަރީޒާ ފުއްދަމުން ދިޔަ ބިލިއަނަރު ޖެފްރީ އެޕްސްޓީން އާ ގާތް ގުޅުމެއް ބޭއްވި ކުރީގެ ރައީސް މުހައްމަދު ވަހީދު، ރައީސް މުހައްމަދު މުއިއްޒުގެ ސްޕެޝަލް އެންވޯއީގެ މަގާމުން އިސްތިފާދެއްވުމަށް އެންގެވި ކަމަށް ރައީސް މުއިއްޒު ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، ނޫސްވެރިއަކު ކުރި ސުވާލަށް ޖަވާބުދެއްވަމުން ރައީސް ވިދާޅުވީ ޖެފެރީ އެޕްސްޓީން އާއި ޑރ. ވަހީދުގެ ވާހަކަ އެގުނު ހިސާބުން، ސްޕެޝަލް އެންވޯއީ މަގާމުން އިސްތިއުފާ ދެއްވުމަށް އެދިފައިވާނެ ކަމަށެވެ.
ސްޕެޝަލް އެންވޯއި އޮފް ދަ ޕްރެޒިޑެންޓްގެ މަގާމަށް މެއި 26، 2025 ވަނަ ދުވަހު އައްޔަންކުރެއްވި ވަހީދު އިސްތިއުފާދެއްވީ ކުޑަކުދިންނާ ބެހި، ވިޔަފާރިކޮށް އެތައް ޖަރީމާއެއް ހިންގި ބިލިއަނަރު ޖެފްރީ އެޕްސްޓީން ފައިލްސް ގައި ވަހީދުގެ ގާތް ގުޅުމުގެ ވާހަކަތައް ތިލަވުމާ ގުޅިގެން ފެބްރުއަރީ 3 ވަނަ ދުވަހުއެވެ.
ވަހީދުގެ އިސްތިއުފާ ދެއްވި ދުވަހު އެ މަނިކުފާނުގެ އޮފީހުން ނެރުނު ބަޔާނެއްގައި ބުނީ އެ މަނިކުފާނު އެޕްސްޓީންއާ އެކު ބޭއްވެވި އެއްވެސް ބައްދަލުވުމަކީ އިޖުތިމާއީ ބައްދަލުމެއް ނޫން ކަމަށެވެ. އަދި އެޕްސްޓީންއާ އެކު ސިޔާސީ ޕާޓީއެއް ނުވަތަ ނުރަސްމީ ބައްދަލުވުމެއް ނުބާއްވަވާ ކަމަށާއި އެ ބައްދަލުވުންތަކަކީ މަގާމުގެ ހައިސިއްޔަތުން، އެހެން އޮފިޝަލުންނާ ވެސް އެކުގައި ބޭއްވެވި ބައްދަލުވުން ތަކެއް ކަމަށެވެ.
ރާއްޖޭގެ ރައީސް ކަމުގެ އިތުރުން، ނައިބު ރައީސްކަން ވެސް ކުރައްވާފައިވާ ވަހީދު، ޖެފްރީ އެޕްސްޓީން އާއި ބައްދަލު ކުރައްވަމުން ގެންދެވި އިރު، ކުރައްވާފައި ވާ އިތުރު މުއާމަލާތްތަކަށް ބަލާއިރު، ރާއްޖޭގައި ޕްރިވެޓް އައިލޭންޑެއް ހަދަން މަސައްކަތް ކުރުމާއި، ދިވެހި ދައުލަތުގެ ސިއްކަ ޖެހި ލިޔުން (ވަހީދުގެ ދަތުރު ތާވަލެއް) ހިއްސާކޮށްފައި ވާކަންވެސް އެނގެއެވެ.
