ލަތީފާގެ އަތުގައި ހިފައިގެން ޝާކިރު ބޭރަށް ދާން ހިނގައިގަތެވެ. ސީމާއަށް ފަރުވާދެމުންދިޔަ ކޮޓަރިއާ ދިމާއަށް ލަތީފާ ބަލާލިއެވެ. އެތާ ތެރޭ ދެކެވޭ ވާހަކަތަކެއްގެ ސަބަބުން އޭނާ ފަލީހަތްވެދާނެތީ ޖެހިލުން ވިއެވެ.
ބޭރުގައި ހުރި ފަތްޖެހި އެނދުގައި އެ ދެމަފިރިން އިށީނދެގެން ތިބި އިރު އެދެމީހުންގެ ސިކުނޑި ތެރޭގައި ވެސް އެނބުރެމުން ދިޔައީ އެއް ހިޔާލެކެވެ. ސީމާގެ ހާލަތެވެ. ގަޑިއެއްހާ އިރު ފަހުން ގޭތެރެއިން މީހެއްގެ ހިލަން ވީހެން ހީވުމުން ޝާކިރު ފަތްޖެހި އެނދުން ތެދުވެ ގޭތެރެއަށް ވަންނަން ދާން ހިނގައިގަތެވެ. ދޮރާ ހަމައަށް ދެވުނު އިރު އިބްޒީމާއާ އެކު ޟިރާރު އެތަނުން ނިކުތެވެ.
"ކޮބާ ސީމާ... މިހާރު ކިހިނެއް؟.." ޝާކިރު ސުވާލުކޮށްލަމުން ފަސްއެނބުރި ލަތީފާއާ ދިމާއަށް ބަލާލިއެވެ. ލަތީފާވެސް ފަތްޖެހި އެނދުން ތެދުވެ އެމީހުން ގާތަށް ދާން ހިނގައިގަތެވެ.
"އެމަންޖެއަށް ނިދިފަ އޮތީ.. އިރާދަކުރެއްވިއްޔާ ހުރިހާ ކަމެއްވެސް ދެން ދާނީ ރަނގަޅުވަމުން... އެކަމަކު އަދި ދެރޭ ކިޔަވަން ޖެހޭނެ.. އޭރުން މުޅިން މިކަންތަކުން ސަލާމަތްވެވޭނީ..." ޟިރާރު ވާހަކަ ދައްކަމުން ވަކިވަކިން ޝާކިރާއި ލަތީފާގެ މޫނަށް ބަލާލިއެވެ."
އެމަންޖެއަށް މިއެއްޗެއް އަވަލައިގެން އެ އުޅެނީ ކީއްވެޔޯލަ..." ޝާކިރު އޮޅުންފިލުވަން ބޭނުންވެފައިވާ ސުވާލުކޮށްލުމުން ލަތީފާގެ ސިކުނޑިއަށް ހީވީ ޕިނެއް ހެރުނު ހެންނެވެ. ފައިން ފެށިގެން މައްޗަށް ތުރުތުރެއް އަރައިގެން ދިޔައެވެ.
ފުން ނަޒަރަކުން ލަތީފާއާ ދިމާއަށް ޟިރާރު ބަލާލި އިރު އެބެލުމުގައި ތަފާތުކަމެއް ހުރިކަން ލަތީފާއަށް ދެނެގަންނަން އެނގުނެވެ. ޟިރާރު ބުނަން އުޅޭ އެއްޗަކާއި ލަތީފާއާ ގުޅުމެއްވާކަން އެނގުމުން އޭނާގެ ހިތް ތެޅިފޮޅެމުން ދިޔައެވެ. "ސީމާއަށް ވަލުތެރެއިން އަވަލައިގެން އުޅޭ އެއްޗެއްމީ... ތިން ރޭގެ މަސައްކަތުން މިކަންތައް ރަނގަޅުކޮށްދޭނަން... ސީމާ އަރާމުކުރުން ވަރަށް މުހިއްމުވާނެ... ދެން ދިޔައީ... އަހަރެންވެސް މިދަނީ ދެން ނިދަން..."
ސީމާއަށް ވެފައިވާ ގޮތުގެ ކުރު ތަފްސީލެއް ދިނުމަށްފަހު ޟިރާރު ގެއަށް ދާން ހިނގައިގަތެވެ. އިތުރަށް އެކަމާބެހޭ ސުވާލުކުރަން ބޭނުންވެފައި ހުރި ނަމަވެސް ޝާކިރު މިވަގުތު އިތުރު ވާހަކަތަކެއް ދައްކާކަށް ބޭނުމެއް ނުވިއެވެ. އެމީހުން ކޮށްދިން ކަންތަކަށް ޝުކުރު އަދާ ކުރުމަށްފަހު އެމީހުން އެތަނުން ފޮނުވާލިއެވެ.
ޟިރާރު އެގެއިން ނުކުމެގެން ދަމުން ލަތީފާއާ ދިމާއަށް ފަހުފަހަރަށް ބަލާލިއެވެ. ލަތީފާ އެ ހުރި ފިޔަވަޅުމަތީ ޟިރާރުމެން ދިޔަ ދިމާއަށް ބަލަން ހުރެވުނެވެ. އަނެއްކާ ޟިރާރަށް ކަމެއް އެނގުނީ ބާއޭ އޭނާގެ ހިތަށް އެރުމުން ހިތުގައި ބިރުވެރިކަމެއް އަށަގަތެވެ.
*** *** *** *** *** ***
ހިނގަމުން ހިނގަމުން ވަކި ހިސާބަކަށް ދެވުނު އިރު ލަތީފާއަށް ނޭވާލާން އުނދަގޫވިއެވެ. ބަނޑުގެ އެއްފަޅިއަށް ތަދެއް އެރުމުން އުނަގަނޑުގައި އަތް ވިއްދާލަމުން ކައިރީ ހުރި ފާރުގައި އަނެއް އަތް ވިއްދާލީ ހަމައަށް ނޭވާލެވޭތޯއެވެ. ފުންކޮށް ނޭވާލާން މަސައްކަތް ކުރަމުން ލަތީފާ ބަލާލީ ކުރިމަތިން ފެންނަން ހުރި ގެއާ ދިމާއަށެވެ. އެއީ ޟިރާރުމެން ގޯތިކަން އެނގުމުން ބުރުގަލުގެ ކަނުން މޫނުމަތީގައި ހިއްލާފައިވާ ދާތިކިތައް ފޮހެލުމަށްފަހު އެގެއަށް ވަނުމަށް މިސްރާބު ޖެހިއެވެ. މައިދޮރާ އަރާ ހަމަވުމުން ގޭތެރެއަށް ނަޒަރު ހިންގާލީ މީހަކު ފެންނަން ހުރިތޯއެވެ.
"އައްސަލާމްއަލައިކުމް.." ލަތީފާ މަޑުމަޑުން ގޮވާލިއެވެ. މީހެއްގެ ހިލަމެއް ނުވުމުން ކުރިއަށް ވުރެ ބާރަށް ގޮވާލިއެވެ. ގޭތެރެއިން އަންހެނަކު ސަލާމް ބަލައިގެން އަޑު އިވުނެވެ. ލަތީފާ ހަމަޖެހެން މަސައްކަތްކުރަމުން އެމީހާ ގާތު ބުނާނެ އެއްޗަކާ ދޭތެރޭ ވިސްނާލިއެވެ. މެދު އުމުރުގެ އަންހެނަކު އެދިމާއަށް އަންނަތަން ފެނުމުން އެއީ ޟީރާރުގެ އަންހެނުންކަމަށް ވެދާނޭ ލަތީފާގެ ހިތަށް އެރިއެވެ. ލުއި ހިނިތުންވުމަކާއެކު ލަތީފާ ކައިރިއަށް އައިސް ހުއްޓުނީ އާމިނާއެވެ.
"ޟިރާރު އުޅުއްވަނީ މިގޭގަތޯ؟..." ލަތީފާގެ ހިތް އަވަސްވެފައިވީ ނަމަވެސް ހަމަޖެހެން މަސައްކަތް ކުރަމުން އާމިނާ ގާތު މަޑުމަޑުން އަހާލިއެވެ.
"އާދޭ އެތެރެއަށް.. މި ގޮވާލަނީ... ސައިބޯން ހުރީ..." ފެންޑާތެރޭ ހުރި އުނދޯއްޔަށް އިޝާރާތްކޮށްލަމުން އާމިނަ ގޭތެރެއަށް ވަދެގެން ދިޔައީ ޟިރާރަށް ގޮވަމުންނެވެ. ލަތީފާ އެ އުނދޯލީގައި އިށީނދެ ގޭތެރެއަށް ނަޒަރު ހިންގާލިއެވެ.
ކުޑައިރުކޮޅެއް ފަހުން ޟިރާރު ފެންޑާތެރެއަށް ވަދެއްޖެއެވެ. އުނދޯލީގައި އިށީނދެގެން އިން ލަތީފާއަށް ކޮޅަށް ތެދުވެވުނީ ބޭއިޚްތިޔާރުގައެވެ. ލަތީފާ ފެނުމާއެކު ޟިރާރު ފަހަތް ބަލާލިއެވެ. އާމިނަ ހުރި ހިސާބެއް ބެލުމުގެ ބޭނުމުގައެވެ. ލަތީފާ ކައިރިއަށް ހުއްޓެމުން މިތާ ކީއްކުރަނީތޯ އޭނާ އަހާލީ ވައިއަޑުން އެހެންމީހަކަށް ނީވޭނެ ހެންނެވެ.
"އަޅުގަނޑު ވާހަކައެއް އަހާލަން ބޭނުން... ޟީރާރު އެމަންޖެ ކީކޭތަ ބުނީ؟..." ލަތީފާ ކުރި ސުވާލަށް ޖަވާބު ދޭން މީ އެންމެ ރަނގަޅު ތަނެއް ނޫންކަން ޟިރާރަށް އެނގެއެވެ. އެހެންކަމުން މިރޭ އިރާކޮޅު ލަތީފާއާ އެކަހެރިކޮށް ވެލިގަނޑު ސަރަހައްދުން ބައްދަލުވާނަން ކަމަށް ބުނަމުން ޟިރާރު މަސައްކަތްކުރީ ލަތީފާ އަވަހަށް އެތަނުން ފޮނުވާލާށެވެ. ގެއިން ނިކުމެ ފަސްއެނބުރި ޟިރާރާ ދިމާއަށް ލަތީފާ ބަލާލިއެވެ.
ބޯ ޖަހާލަމުން ހާސްނުވާށޭ ޟިރާރު ބުނެލުމުން ލަތީފާއަށް ކޮންމެވެސް ވަރެއްގެ ހިތްހަމަޖެހުމެއް ލިބުނެވެ. މިރޭ ޟިރާރާ ބައްދަލު ކުރެވިގެން ނޫނީ ލަތީފާގެ ހިތަށް ތަސައްލީއެއް ނުލިބޭނެކަން އޭނާއަށް އެނގެއެވެ.
*** *** *** *** *** ***
އިޝާ ނަމާދަށްފަހު ބާބަކިއުއަށް ބޭނުންވާނެ ހުރިހާ ސާމާނުތަކެއް ގަނެ ތައްޔާރުވުމުގައި އެންމެން އުޅުނެވެ. ހުރިހާ ސާމާނުތަކެއް ހަމަކުރުމަށްފަހު އެންމެން އެކީ މިސްރާބުޖެހީ ބާބަކިއު ހަދަން ހާއްސަކޮށްފައިވާ ސަރަހައްދަށެވެ. އެ ސަރަހައްދުގައި މިރޭ އިތުރު ބަޔަކު ނެތުމުން އެމީހުންނަށް ކޮންމެވެސް ވަރެއްގެ ހިތްހަމަޖެހުމެއް ލިބުނެވެ. އެމީހުންގެ ސަކަރާތާ މަޖަލުގެ ސަބަބުން އެހެން ބަޔަކަށް އުނދަގޫ ނުވާނެތީއެވެ.
ނާށިތައް ފުންޏަކަށް ބަހައްޓައިގެން އޭގައި އަލިފާން ރޯކުރަން ފިރިހެން ކުދިންތައް އުޅުނު އިރު އަންހެންކުދިންތައް އުޅުނީ ކުކުޅުފައިތައް ނޮޅައި އޭގައި ޅިއަ އަޅާށެވެ. އެކިކަހަލަ މަޖާ ވާހަކަތައް ދައްކާ ހީސަމާސާ ކުރަމުން ދިޔައިރު ދޭތެރެއަކުން ރާއިދަށް ގަސްތަކާ ދިމާއަށް ބަލާލެވެއެވެ. އެތަނުން މީހެއްގެ ހިޔަންޏެއް ވާހެން އޭނާއަށް ހީވާތީއެވެ.
*** *** *** *** *** ***
"މެހެކް... އެމީހުންނަށް ފެނިދާނޭ..." މެހެކްގެ އަތުގައި ހިފާ ގަސްތަކުގެ ތެރެއަށް އޭނާ ދަމައިގަންނަމުން ޒޯއީ ވާހަކަ ދެއްކިއެވެ."
އަޅެ އަހަރެން ބޭނުން އޭނާއާ ބައްދަލުކުރަން... ހެޔޮނުވާނެ.." މެހެކް ބޮޑާ ހާކަމުން ދިޔައީ ރާއިދްއާ ވާހަކަދައްކާލާ ހިތުންނެވެ.
"އެކަމަކު މީ ރަނގަޅު ވަގުތެއް ނޫން.. އެތާ އެހެރީ އޭނާ އެކަންޏެއް ނޫން.. އެތައް ބަޔަކު ތިބި ތަނަކަށް ގޮސްގެން އަހަރެމެންނަކީ ކޮންބައެއްކަން އެނގިއްޖިއްޔާ ކަޑަ ވާނެ..." ޒޯއީ ދައްކަމުން ދިޔަ ވާހަކަ ގަބޫލު ކުރިކަމުގައި ވިޔަސް އެންމެ ފަހަރަކު ނަމަވެސް ރާއިދާ ބައްދަލުކުރަން ބޭނުންވެފައި ހުރި މެހެކްގެ ހިތް ރޮމުން ދިޔައެވެ. ރާއިދް އެކަހެރިވާނެ ވަގުތެއްގެ އިންތިޒާރުގައި ވަގުތު ގުނަމުން ދިޔައިރު ޒޯއީ ހުރީ ފޫހިވެފައެވެ.
"އަހަރެން އެބަ އަންނަން... މެހެކް އެކަނި އެހެން ތާކަށް ނުދާތި.. އިނގޭ..." ޒޯއީ މިހެން ބުނުމަށްފަހު އޭނާގެ ކަރުގައި އަޅާފައިވާ ފުލުގައި ހިފާ ބާރުކޮށްލިއެވެ. އަދި ވަލުތެރެއިން ބެރެބެދިގަސް ކައިރިއަށް ދާން ޒޯއީ މިސްރާބުޖެހީ ހުދު ކޮތަރެއްގެ ސިފައަށް ބަދަލުވެގެންނެވެ. ޒޯއީގެ ފިޔަގަނޑު ތަޅުވާލި އަޑަށް އެދިމާއަށް މެހެކް ބަލާލަމުން ހިނިތުންވެލިއެވެ.
*** *** *** *** *** ***
ބާބަކިއު ސަރަހައްދުގައި ތިބިއިރު ލަވަކިޔާ މަޖާކުރަމުން ގޮސް ދެން އެމީހުން ފެށީ "ޓްރުތް އޯ ޑެއާ" ކިޔާ ގޭމެއް ކުޅޭށެވެ. މިގޭމް ކުޅޭ އިރު އެންމެން ތިބެނީ ބުރެއް ހެން ވަށާލައިގެންނެވެ. ބުރުގެ މެދުގައި ހުރަހަށް ފުޅިއެއް ބާއްވައިގެން އަނބުރާއިރު އެ ފުޅީގެ މަތިގަނޑުވާ ކޮޅު ދިމާވާ މީހާއަށް ސުވާލެއް ނޫނީ މަސައްކަތެއް ހަވާލު ކުރެއެވެ.
ގޭމް ކުޅުމުގެ ތެރޭގައި އެކި ސުވާލުތައް ކުރަމުން ދިޔައެވެ. އެގޮތުން ހޫދުއާ ކުރި ސުވާލުން އޭނާ ގަބުވިއެވެ. އެ ސުވާލުކުރީ ޝީންއެވެ. "ދުވަހަކުވެސް އަހަރެންނަށް ދޮގެއް ހެދިންތަ؟.."
އެންމެންގެ ނަޒަރު ހުއްޓިފައި ވަނީ ހޫދުގެ މޫނަށެވެ. ހޫދު ދޭނެ ޖަވާބެއްގެ އިންތިޒާރުގައި އެންމެން ތިބުމުން ހޫދުގެ ހިތް އަވަސްވެ ހާސްވާ ގޮތްވިއެވެ.
"ކޮންކަމަކާ ތި ވިސްނަނީ..." ޝީން އަނެއްކާ ސުވާލު ކުރުމުން ހޫދު އިސް އުފުލާލަމުން ޝީންއާ ހަތަރުކަޅި ހަމަކޮށްލިއެވެ.
"މިވިސްނަނީ.. ދޮގެއް ހެދުނުތޯ؟..." ހޫދު މިހެން ބުނުމުން ޝީން ހަށަންބަނދެލަމުން ދެލޯ ހަނިކޮށްލިއެވެ.
"އާން.. ދޮގެއް ހެދިން...." ހޫދު ޖަވާބުދިނުމުން އެންމެން އެއްފަހަރާ ހިމޭންވިއެވެ. ޝީން އެތަނުން ދުރަށް ދާން ހިނގައިގަތީ އޭނާގެ ހިތަށް ކޮންމެވެސް ވަރަކަށް އުނދަގޫ ވުމުންނެވެ. ހޫދު ދޮގެއް ހެދީއޭ ބުނުމުން ޝީން ހިތުގައި ޖެހުނީއެވެ. އެންމެން ކުރިމަތީ ހުރެ ރޯން ޝީން ބޭނުންނުވީއެވެ. ޝީންގެ ފަހަތުން ހޫދު ހިނގައިގަތެވެ. އޭރު ޝީން ގަސްތަކާ ދިމާއަށް ދުއްވައިގެންފިއެވެ.
"އެދެމީހުން ބަހައްޓާފަ އަނެއްކާވެސް ތިފުޅި އަނބުރާ..." އެތާ ހުރި އަންހެން ކުއްޖެއްގެ އެދުމަށް އެ ފުޅި ރާއިދް އަނބުރާލިއެވެ. ފުޅި އެނބުރެމުންގޮސް އެފުޅި މިފަހަރު ހުއްޓުނީ ރާއިދާ ދިމާއަށެވެ.
"މިފަހަރު ޑެއާ އެއް ދޯ..." އެތަނުން އަންހެންކުއްޖެއް އެހެން ބުނަމުން އަތްޖަހާލިއެވެ. ރާއިދަށް ރަނގަޅު މަސައްކަތެއް ހަވާލުކުރަން ވިސްނައިގެން ހުރި ކިނާން ހޭން ފެށިއެވެ.
"ފަތާފަގޮސް ހެރެތެރެއަށް އަރާ.. އެތަނުން ވެލި މިކޮތަޅަށް އަޅައިގެން އާދޭ..." މޫދާ ދިމާއަށް އިޝާރާތްކުރަމުން ކިނާން އެހެން ބުނުމުން މޭފުއްޕާލާފަ ރާއިދް އިން ތަނުން ތެދުވެ ލައިގެން ހުރި ޓީޝާޓް ބޭލިއެވެ.
"ތީ އެއްވެސް ކަމެއް ނޫނެއްނު..."
އެންމެން އެކީ ތިބީ ރާއިދް މޫދަށް އެރެން ދިޔަ ދިމާއަށް ބަލާށެވެ. އެތަނުން އެއް އަންހެން ކުއްޖަކު ފޯނު ހިފައިގެން މޫދާ ދިމާއަށް މިސްރާބުޖެހިއެވެ. ކިނާން ދިން ކޮތަޅު ޖީބަށްލުމަށްފަހު އެއްގަމުގައި ތިބި ރައްޓެހިންނާ ދިމާއަށް ރާއިދް ބަލާލިއެވެ. މޫދުގެ ތެރެއަށް ޑައިވެއް ޖަހާލުމުން އެންމެން އެއްފަހަރާ އަތް ޖަހާލިއެވެ. ރާއިދަކީ ވަރަށްމޮޅަށް ފަތަން ދަންނަ ކުއްޖަކަށް ވާތީ އެމީހުން ހަވާލުކުރި މަސައްކަތަކީ މާ އުނދަގޫ ކަމަކަށް ނުވިއެވެ. ހެރެތެރެއާ ހުޅުދޫއާ ދެމެދުގައިވާ ކަނޑަކީ ކޮންމެވެސް ވަރަކަށް އޮއެބާރު ތަނެއް ނަމަވެސް އޭނާ އެތަނުން ފަތާފައި ގޮސް ހެރެތެރެއަށް އެރީ އެއްވެސް ޖެހިލުމެއް ނެތިއެވެ.
ތޮށިގަނޑު ކައިރިއަށް ފޯނު ހިފައިގެން ދިޔަ އަންހެން ކުއްޖާ ވީޑިއޯ ކުރަމުން ދިޔައެވެ. ހެރެތެރެއަށް އަރާ ރާއިދް ކޮތަޅަށް ވެލިއަޅަން ފެށުމުން އޭނާ ވީޑިއޯ އޮފްކޮށްލިއެވެ. އަދި ދުވެފައި ކިނާންމެން ކައިރިއަށް އައެވެ. އެންމެން ވީޑިއޯ ބެލުމަށްފަހު އަވަހަށް ފުޅި އަނބުރާލިއެވެ.
ހެރެތެރެއާ ހުޅުދޫއާ ދެމެދުގައި އަޅާފައިވާ ބްރިޖް ބަލަހައްޓަން ހުރި ވޮޗަރު ގޮނޑުދޮށާ ދިމާއަށް ބަލާލީ މީހެއްގެ ހިލަން ވީހެން ހީވުމުންނެވެ. ގޮނޑުދޮށުގައި ހުރި ރާއިދް ފެނުމުން އެމީހާ އަތް ހަނާ އަޅަމުން ކީއްކުރާ މީހެއްތޯ ސުވާލުކޮށްލީ ހަރު އަޑުންނެވެ. ގަންނާކުރެއްވި ބިރުން ވެލިކޮތަޅު ލައިގެންހުރި ސޯޓުގެ ޖީބަށްލުމަށްފަހު މޫދަށް އެރި ހުޅުދޫއަށް ދާން ރާއިދު ފަތައިގަތެވެ.
ފަތާފައި ތަންކޮޅަކަށް ދެވުނުތަނާ ރާއިދް އަކުނިވަޔަށް ދަމައިގަތެވެ. ފަޔަށް އެއްވެސް ހަރަކާތެއް ގެނެވޭ ގޮތެއްނުވުމުން އަތުން ބަކަތަޅަން ފެށިއެވެ. ނަމަވެސް ރާއިދަށް ފެތޭ ގޮތެއް ނުވިއެވެ. ފެންމަތީ އޮވެވޭ ގޮތެއް ވެސް ނުވިއެވެ. ލޮނުގަނޑު ތެރޭ ސަލާމަތްވާން އަތް ތަޅުވާލަމުން ކިނާނަށް ގޮވާލަން އަނގަހުޅުވާލި ނަމަވެސް އަނގަ ފުރިގެން ދިޔައީ ލޮނުންނެވެ. އެއްގަމުގައި ތިބި އޭނާގެ އެކުވެރިންނަށް ހިލަމެއް ނުވެއެވެ. އެމީހުން ތިބީ އެ ކުޅިވަރަށް ގޮސް ހުސްވެފައެވެ. ރާއިދުގެ ހަރަކާތް މަޑުވަމުން ގޮސް އޭނާ ގެނބެން ފެށިއެވެ.
ނޭވާ ހިފަހައްޓައިގެން ހުންނަންޖެހުމުން އޭނާގެ ދެލޯ ބޮޑުކޮށްލީ އަދި އާ ހިތްވަރެއްލާށެވެ. އެވަގުތު މުރަކަތަކުގެ ތެރެއިން ރާއިދާ ދިމާއަށް އަންނަމުންދިޔަ ބޯވައެއް ޒާތުގެ އެތި ފެނުމުން ބޭއިޚްތިޔާރުގައި އަނގަ ހުޅުވާލެވުނެވެ. އަނގަޔަށް އެޅިގެން ދިޔަ ލޯނުތަކުގެ ސަބަބުން އަނގައިން ނިކުތް ނޭވާއާ އެކީ ބޮކިތަކެއް އެރިއެވެ. އެއީ ބޯވައެއް ނޫނެވެ. އެއީ މާމެއިޑެކެވެ. ނިގޫ ގަނޑު ރީތި ބައްޓަމަކަށް ތަޅުވަމުން ބާރު ސްޕީޑެއްގައި އޭނާއައީ ރާއިދާ ދިމާއަށެވެ. އޭނާގެ ދިގު އިސްތަށިގަނޑުގެ ފޯލިތައް ފެންނައިރު ބޯވައެއްގެ ފައިތަކަކާ ވައްތަރީއެވެ. އެދޮން މޫނު ގާތްވަމުން ދިޔައިރު މޫނުގައި ކޮންމެވެސް ވަރަކަށް ހުޅުނބު ހުރިކަންވެސް ދޭހަވިއެވެ.
ރާއިދްގެ ޙަބަރު ހުސްވެ ދެލޯ މެރުމާއެކީ ގައިން ވަރުދޫވެ މީހާ އަޑިއަށް ދާ ސްޕީޑް އަވަސްވިއެވެ. ފަތާފައި އައިސް ރާއިދްގެ އަތުކުރީގައި މެހެކްއަށް ހިފުމާއެކީ އޭނާގެ ބާރުގަދަ އަތުން ރާއިދްގެ ހަށިގަނޑު ދަމައިގަތެވެ. އޭނާ ގޮވައިންގެން އެއްގަމަށް އަރަން އަވަސްވެގަތެވެ. ހުޅުދޫ ތޮށިގަނޑު ބޭރުގައި ހުރިގާތަކު މަތީ ރާއިދް ބޭއްވުމަށްފަހު މެހެކް އޭނާއާ ގާތްވެލިއެވެ. މޫނު މައްޗަށް ވެއްޓިފައިވާ އިސްތަށިތައް އެއްކައިރި ކޮށްލަމުން ރާއިދްގެ މޫނުގައި ފިރުމާލިއެވެ.
ރާއިދްގެ މޫނާ ގާތްވަމުން ދިޔަވަރަކަށް މެހެކްގެ ހިތުގެ ވިންދު އަވަސްވަމުން ދިޔައެވެ. ރާއިދުގެ ތުންފަތުގައި ބޮސްދެމުން މެހެކް ދެލޯ މަރާލިއެވެ. ހަމައެއާ އެކު ކެއްސަމުން ކެއްސަމުން ރާއިދް ލޯހުޅުވާލިއެވެ. ތުންފަތުގައި އަތް ޖައްސާލަމުން އޭނާ ވިސްނާލިއެވެ. ދެންމެ އެކުރެވުނު އިހްސާސާ މެދު ހިތުގައި ވަހުމެއް އުފެނުނެވެ. ރާއިދްކައިރީ މީހަކު ނެތުމުން އޭނާ އަޖައިބު ވިއެވެ. ހިލަމަތިން ތެދުވި އިރުވެސް ރާއިދްގެ ހަށިގަނޑަށް ލޮޑުކަމެއް ވެރިވެފައި ވިއެވެ. ހެރެތެރޭގެ ރީތި ގޮނޑުދޮށާ ދިމާއަށް ރާއިދް ބަލާލިއެވެ. އެވަގުތު ލޮނުގަނޑުމަތި ބޮޑު ނިގުލެއް ޖަހާލިތަން ފެނުމުންނެވެ.
ރާއިދްއަށް ކަނޑުއަޑިން އެސިފަ ކުރެވުނު ފެނު ޕަރީއަކީ ބިލާހެއް ނޫނެވެ. އެއީ ހަގީގަތުގައި ވެސް އުޅޭ ބައެއްކަން އޭނާއަށް ކަށަވަރުވިއެވެ. އެއްގަމަށް އަރައިގެން ދިޔަ ރާއިދްގެ ސިކުނޑީގައި އެބުރެމުން ދިޔައީ އެ ހިޔާލުތަކެވެ. ކަނޑުތެރެއަށް އޭނާ ގެނބެމުން ދިޔައިރު އޭނާއަށް ފެނުނު މަންޒަރެވެ. ރޭގަނޑުގެ ވަގުތަކަށް ވުމުން ފެންނަ އެއްޗެއް ކިތަންމެ އަނދިރިވިޔަސް އޭނާއަށް ފެނުނު ފެނުޕަރީގެ ހަށިގަނޑުގައި ވިދުމެއް ވިއެވެ. އޭނާގެ ގައިގާވާ ހުޅުނބުތަކުން އަޅަމުން ދިޔަ ދަޅައިން ރާއިދްއަށް ފެނުނު މަންޒަރު ވަރަށްވެސް ސާފެވެ.
ބާބަކިއު ހަދާ ސަރަހައްދަށް ގޮސް ރާއިދް ހުއްޓުނު އިރު އެންމެން އުޅުނީ ކާށެވެ. "ހާދަ ލަސްވީ..." ތައްޓަކަށް ކުކުޅުފައެއް ލައިގެން އައިސް ރާއިދް ކުރިމައްޗަށް ހުއްޓެމުން ކިނާން އަހާލިއެވެ.
"އައި ސޯ އަ މާމެއިޑް" ވައިއަޑުން ރާއިދް ބުނި ޖުމްލައިން ކިނާން ގާތަށް ހިނިއައެވެ. އަޑުޣޭ ނެތްތަނަށް އޭނާ ހޭންފެށުމުން ބާބަކިއު ހަދަން ދެން ތިބި ބައެއް މީހުންވެސް ހޭން ފެށިއެވެ. ކިނާންގެ ހިނިގަނޑު ކޮންޓްރޯލް ވާ ގޮތެއް ނުވިއެވެ. އެމީހުންނަށް ވެގެން އުޅޭ ގޮތް ނޭނގޭއިރު ކިނާންމެންގެ ހުނުމުގައި ބައިވެރިވާތީ ކިނާނަށް އެއީ އަދި މާ މަޖާކަމަކަށް ވިއެވެ.
*** *** *** *** *** ***
ޟިރާރްގެ އެދުމަށް ލަތީފާ އައިސް މަޑުކޮށްލީ އުސްފަސްގަނޑޭ ކިޔޭ ސަރަހައްދުގައިވާ ޖިފުޓިގެ ކައިރީގައެވެ. މަގުގެ ދެކޮޅު ބަލަމުން ދިޔައިރު ލަތީފާގެ މޫނުމަތިން ފެންނަމުން ދިޔައީ ހާސްކަމެވެ. ޝާކިރު ކައިރީ ނުބުނެ ވަގުވަގަށް ނީކުމެގެން އަންނަން ޖެހުމުން ލަތީފާ ހުރީ ބިރުންނެވެ. މީހެއްގެ ހިލަމެއް ނުވާ އެހިސާބުގައި ހުންނަން ޖެހުމުން ލަތީފާ ޖެހިލުންވިއެވެ. އަނދިރިކަމުން ފުރިފައިވާ އެ ސަރަހައްދުގައި ހަނދުވަރުގެ އަލިކަން ފިޔަވާ އިތުރު އަލިކަމެއް ނެތެވެ.
އިންތިޒާރު ނިމުން އައިސްފިކަން ލަތީފާއަށް އިހްސާސްވީ މާދުރުން އެދިމާއަށް ހިނގާފައި އަންނަ ޟިރާރު ފެނުމުންނެވެ. ވާގި ނެތިފައިވާ އަތް ހުރަހަށް މޭދަށުގައި ވިއްދައިގެން ހުރެ އޭނާ ހިނގާފައި އައީ ޒާތަކަށެވެ. ހިމުން ދޮންވެލިގަނޑުގެ ތެރެއަށް ފައިތިލަ ގެނބޭތީ ހިނގުމުގައި ކަންނެތް ގޮތެއް ހުއްޓެވެ.
ޟިރާރް އައުމާއެކު ކެތްމަދުވެފައިވާ ލަތީފާ އޭނާ ކުރަން ބޭނުންވެފައިވާ ސުވާލު ހާމަކުރިއެވެ. "ސީމާ ވަރުގަދަ އެއްޗެކޭ ބުނީ ދޯ.. ދޮގު ނުހަދާ މަށަށް ކިޔައިދީބަލަ؟..." ދެއަތް ދެއަތާ މޮޑެމުން ދިޔައިރު އޭނާ ހުރީ ހާސްވެ ކަންބޮޑުވެފައިކަން ޟިރާރަށް ދޭހަވިއެވެ.
ލަތީފާގެ އުނަގަނޑުގައި އަތް ޖައްސާލަމުން ޟިރާރު ގާތްވާން މަސައްކަތްކުރަމުން އޭނާގެ ބަސްތައް އަމާޒުކޮށްލީ އޭނާގެ އަމިއްލަ އެދުމެއް ފުއްދުމުގެ ބޭނުމުގައެވެ. "ކޮންކަމަކާ ހާސްވަނީ.. އަހަންނަށް އެނގޭ... އެ ކަންތައް ލަތީފާގެ ފިރިމީހާއަށް ސިއްރުކޮށްދީފާނަން.. އެއީ ކީ މާބޮޑުކަމެއް ނޫން... އަހަންނަށްވެސް އިނގޭ އެކަންތައް ޝާކިރުގެ ކަންފަތާ ހަމައަށް ވާސިލްކުރާކަށް ހުދު ލަތީފާވެސް ބޭނުމެއް ނުވާނެކަން...."
ޟިރާރުގެ ބީހުންތަކުން ލަތީފާއަށް އުނދަގޫވަމުން ދިޔަނަމަވެސް ލަތީފާގެ ހަށިގަނޑަށް ހަރަކާތެއް ނުގެނެސް ގަބުއަރާފައި ހުރީ ޟިރާރުގެ ބަސްތަކުންނާ އަމަލުތަކުން އިންޒާރެއް އަންނަން އުޅޭކަން އޭނާއަށް އިހްސާސްވުމުންނެވެ. ބަހެއް ނުބުނެ ލަތީފާ އެހެން ހުރިއިރު އޭނާގެ ދެލޯ ކަރުނުން ތެމުނެވެ.
"ކީއްވެ އެއްޗެކޭ ނުބުނެ ތިހުރީ... ގަބޫލު ނުކުރެވެނީތަ؟.." ލަތީފާގެ މޫނާ ދިމާއަށް ވަށްކަޅިން ބަލާލަމުން ޟީރާރު ވާހަކަ ދެއްކީ ލަތީފާގެ ފަރާތުން ޖަވާބެއް ނުލިބުމުންނެވެ. "ލަތީފާ ކުރިކަމަކުން އެމަންޖެއަށް އެހެން އެވަނީ... ނޫންތަ؟..."
ކުއްލިއަކަށް ތެޅިގަންނަމުން ޟިރާރާ ދިމާއަށް ލަތީފާ ބަލާލީ ހައިރާންވެފައި ހުރެއެވެ. ނުލަފާ ޒާތަކަށް އެއްމިޔަކަނަކަށް ހިނިއައިސްފައި ހުރި ޟިރާރު އެއްބުމަ އަރުވާލުމުން ލަތީފާ ދެއަތަށް ބޯ ހޫރުވާލިއެވެ. އޭނާގެ އަނގައިގާ ތަޅެއް ލެވިފައިވާ ކަހަލައެވެ. ވާހަކަ ދައްކަން ބޭނުންވި ނަމަވެސް އޭނާއަށް ވާހަކަ ދެއްކޭ ގޮތެއް ނުވިއެވެ.
"ލަތީފާ ބޭނުންވީ މުއްސަނދިކަމާއި އަރާމް ދިރިއުޅުން... ކަލޭގެ ތި އަންހެން ދަރި މީހަކާ ދެވަން ކަލޭ އަޒުމް ކަނޑައަޅައިގެން ނެގިހާ ފައިސާއަށް ފަހުވެސް ސީމާ އެމީހާއާ ކައިވެނިކުރަން އިންކާރުކުރުމުން ކަލޭ ފަންޑިތައިގެ ބޭނުން ހިފީއެއްނު... އަމިއްލަ ދަރި ވިއްކާލީ... އެވަރުން ނުވެ އެމީހާއާ ހިތާވޭތޯ ހެދި ފަންޑިތައިން އެކުއްޖާ އެ ހިބަ ކުރެވުނީ މާރިދަކާ... ތާހިރެއްނު..." ޟިރާރުގެ އަނގައިން ނިކުތީ ތެދު ވާހަކަތަކެކެވެ. އެވާހަކަތައް އަޑުއަހަން ލަތީފާއަށް އުނދަގޫވިއެވެ. ދެއަތަށް ބޯހޫރުވަމުން އޭނާ ނޫނެކޭ ކިޔާ ރޯން ފެށިއެވެ.
(ނުނިމޭ)
