މިހާރުގެ ސަރުކާރުން އިގުތިސާދީ ސިޔާސަތުތައް މެނޭޖުކުރަނީ "ބަތްކައްކާ ކުޅޭ" އުސޫލުން މީޒާނެއް އަދި މިސްރާބެއް ނެތި ކަމަށްވިދާޅުވެ، ރައީސް ޑރ. މުހައްމަދު މުއިއްޒުގެ ސަރުކާރު ބަދަލުކޮށް ދިވެހި ރައްޔިތުންނަށް ހެޔޮވެރިކަމެއް ހޯދައިދޭނެ ކަމަށް އިދިކޮޅު އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިރޭ ފެށުނު އެމްޑީޕީގެ ކޮންގްރެސްގެ އިފްތިތާހީ ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު ވަނީ ސަރުކާރުގެ އިގުތިސާދީ އަދި މާލީ ސިޔާސަތުތަކަށް ވަރަށް ބޮޑަށް ފާޑުވިދާޅުވެފައެވެ.
ގައުމުގެ އިގުތިސާދީ ހާލަތަށް އަލިއަޅުވާލައްވަމުން ނަޝީދު ވިދާޅުވީ، އިތުރު އާމްދަނީއެއް ނުހޯދާ ދަރަނި ދައްކަމުންދާތީ ޑޮލަރުގެ ދަތިކަން އިންތިހާއަށް ބޮޑުވެފައިވާ ކަމަށެވެ. އަދި ސަރުކާރުން ޓޫރިޒަމް ދާއިރާއާއި ޑޮލަރު މާރުކުރުމުގެ ގަވާއިދުތަކަށް ކުއްލި ކުއްލިއަށް ބަދަލުތައް ގެންނަވާތީ އެކަމަށް އެމަނިކުފާނު ފާޑުވިދާޅުވިއެވެ.
ރާއްޖެ އަނދަވަޅަކަށް ދިއުމަށް އެމްޑީޕީން ދުލެއް ނުކުރާނެ ކަމަށް ފާހަގަކުރައްވައި ނަޝީދު ވިދާޅުވީ، ރައީސް މުއިއްޒުގެ ސަރުކާރު ބަދަލުކޮށް، ދިވެހި ރައްޔިތުންނަށް ހެޔޮ ވެރިކަމެއް ހޯދައިދިނުމަށް އެމްޑީޕީން ކުރަންޖެހޭ ހުރިހާ މަސައްކަތްތައް ކުރާނެ ކަމަށެވެ.
ނަޝީދު އިތުރަށް ވިދާޅުވީ، ދުނިޔެ ހަނގުރާމައިގެ ތުންފަތް މަތީގައި އޮތްއިރު ރާއްޖޭގެ ސަލާމަތާއި ރައްކާތެރިކަމަށް ވިސްނައިގެން ޖިއޮގްރަފީއަށް ބަލާ އަވައްޓެރި ގައުމުތަކާއި އިންޑިއާއަށް އިސްކަންދޭންޖެހޭ ކަމަށެވެ. ނަމަވެސް ސަރުކާރުގެ ވެރިންނަށް ދުނިޔޭގައި ކަންކަން ހިނގާގޮތް ނޭނގި، ވަކި އަމާޒެއް ނެތި އެކި ދުވަހު އެކި ގައުމުތަކަށް ވަޑައިގަންނަވާ ކަމަށް ނަޝީދު ވަނީ ވިދާޅުވެފައެވެ.
