ދިވެހިރާއްޖޭގެ ތަރައްގީގެ ދަތުރުގައި ޗައިނާއަކީ އަބަދުވެސް ސާބިތުކަމާއެކު ދެމިއޮތް މުހިންމު ބައިވެރިއެއް ކަމަށާއި، ދެ ގައުމުގެ އެއްބާރުލުމުގެ ސަބަބުން ދިވެހި ރައްޔިތުންނަށް ފައިދާހުރި އެތައް ފުރުސަތުތަކެއް ފަހިވަމުންދާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ޕީޕަލްސް ރިޕަބްލިކް އޮފް ޗައިނާ އުފެދުނުތާ 77 އަހަރު ފުރުމުގެ މުނާސަބަތުގައި، "އެކްސް" ގައި މިއަދު ހިއްސާ ކުރެއްވި މެސެޖެއްގައެވެ. މި މުނާސަބަތުގެ ހެޔޮއެދުމާއި ތަހުނިޔާ، ޗައިނާގެ ރައީސް ޝީ ޖިންޕިން އަށާއި، އެ ގައުމުގެ ސަރުކާރަށާއި ރައްޔިތުންނަށް އެމަނިކުފާނު ވަނީ އަރިސްކުރައްވާފައެވެ.
ރައީސް މުއިއްޒު ވިދާޅުވީ، ދެ ގައުމުގެ ދެމެދުގައި އޮތީ އެއް ގައުމު އަނެއް ގައުމަށް ކުރާ އިހްތިރާމާއި އިތުބާރުގެ އިތުރުން، ތަރައްގީ އާއި ފާގަތިކަމަށް ގެންގުޅޭ އެއްގޮތް ވިސްނުމެއްގެ މައްޗަށް ބިނާވެފައިވާ ފުން އަދި ދެމެހެއްޓެނިވި އެކުވެރިކަމެއް ކަމަށެވެ. އަދި ޗައިނާގެ އެހީތެރިކަމާއެކު ކުރިއަށްދާ މަޝްރޫއުތަކަކީ ރާއްޖޭގެ ކުރިއެރުމަށް ނުހަނު ބޭނުންތެރި ކަންކަން ކަމުގައި ފާހަގަކުރެއްވިއެވެ.
މީގެއިތުރުން، ކުރިމަގަށް އަމާޒުހިފައި، ދެ ގައުމުގެ ދެމެދުގައި އޮތް "ކޮމްޕްރިހެންސިވް ސްޓްރެޓެޖިކް ކޯޕަރޭޓިވް ޕާޓްނާޝިޕް" އިތުރަށް ހަރުދަނާކޮށް، ދޭދޭ ގުޅުން އާ އުސްމިންތަކަކަށް ގެންދިއުމަށް ދިވެހި ސަރުކާރުން އަބަދުވެސް މަސައްކަތް ކުރާނެ ކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާގެ މެސެޖު ނިންމަވާލައްވަމުން ވަނީ، ރާއްޖެއާއި ޗައިނާގެ ރައްޔިތުންގެ މެދުގައި އޮތް ގާތް ގުޅުން އިތުރަށް ބަދަހިވެ، އެކުވެރި ޗައިނާއަށް އަބަދުވެސް ފާގަތިކަމާއި ކުރިއެރުން ލިބުމަށް އެދިވަޑައިގެންފައެވެ.
