މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން މިއަދު ތައާރަފުކުރި "މޯލްޑިވްސް ގެސްޓް އިންފޮމޭޝަން ސިސްޓަމް" (އެމްޖީއައިއެސް) އަކީ ރާއްޖެއަށް އަންނަ ފަތުރުވެރިންގެ މައުލޫމާތު އެއް ވިއުގައަކުން ލިބި، ދައުލަތުގެ މާލީ އިދާރާތަކާ ގުޅުވައިދޭ ވަރަށް މުހިންމު ވަސީލަތެއް ކަމަށް މިނިސްޓާ އޮފް ފިނޭންސް އެންޑް ޕަބްލިކް އެންޓަޕްރައިޒަސް ހަސަން ޒަރީރު ވިދާޅުވެއްޖެއެވެ.
ފިނޭންސް މިނިސްޓަރު މިހެން ވިދާޅުވީ މީރާއިން މި ސިސްޓަމް ތައާރަފުކުރުމަށްޓަކައި ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
އެމްޖީއައިއެސް އަކީ ރާއްޖެއަށް ޒިޔާރަތްކުރާ ފަތުރުވެރިންގެ މައުލޫމާތު އެއްވިއުގައަކުން ގުޅާލައި، ދައުލަތުގެ މާލީ އިދާރާތަކާ ސީދާ ގުޅުވައިދޭ މަރުކަޒީ ނިޒާމެކެވެ. މިކަމާ ގުޅޭގޮތުން ވާހަކަފުޅު ދައްކަވަމުން މިނިސްޓަރު ވިދާޅުވީ، ފަތުރުވެރިކަމަކީ ރާއްޖޭގެ އިޤްތިޞާދުގެ މައި ސިނާއަތަށް ވުމާއެކު، މި ދާއިރާގެ މައުލޫމާތަކީ ސަރުކާރާއި ދައުލަތުގެ ގިނަ އިދާރާތަކަކުން ބޭނުންކުރަމުން އަންނަ މުހިންމު މައުލޫމާތުތަކެއް ކަމަށެވެ. އަދި އަލަށް ތައާރަފުކުރެވުނު މި ސިސްޓަމްގެ ސަބަބުން މި މައުލޫމާތުތައް ބަލަހައްޓާ ދައުލަތުގެ ކަމާބެހޭ މުއައްސަސާތަކުން ކުރާ މަސައްކަތްތަކަށް ބޮޑު ލުޔެއް ލިބިގެންދާނެ ކަމަށް މިނިސްޓަރު ފާހަގަކުރެއްވިއެވެ.
މިނިސްޓަރުގެ ވާހަކަފުޅުގައި، މި ސިސްޓަމް ތައާރަފުކުރުމަކީ ޒަމާނީ ޓެކްނޮލޮޖީގެ އެހީގައި ދައުލަތް ހިންގުން ހަރުދަނާކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ "މޯލްޑިވްސް 2.0" ގެ ޑިޖިޓަލް ތަޞައްވުރުގެ ދަށުން ހާސިލުކުރެވުނު މުހިންމު ލަނޑުދަނޑިއެއްކަން ފާހަގަކުރެއްވިއެވެ. މީގެ އިތުރުން މީރާގެ ޑިޖިޓަލް ޓްރާންސްފޯމޭޝަން ރޯޑްމެޕްގައި ހިމެނޭ ރިޕޯޓިން އޮޓޮމޭޓްކުރުމުގެ ލަނޑުދަނޑި ހާސިލުކުރުމަށް އެމް.ޖީ.އައި.އެސް އަކީ ލިބުނު ބޮޑު ކުރިއެރުމެއްކަން ފާހަގަކުރައްވައި، މި ސިސްޓަމްގެ ސަބަބުން މީރާގެ މަސައްކަތްތަކަށްވެސް ކުރިއެރުންތައް އަންނަތަން ފެނިގެންދާނެ ކަމަށް ވިދާޅުވިއެވެ. އަދި މީރާއަކީ "އެފޯޓްލެސް" ނުވަތަ ލުއިފަސޭހަ ޓެކްސް ނިޒާމެއް ގާއިމުކުރުމަށް މަސައްކަތްކުރާ މުއައްސަސާއެއްގެ ގޮތުގައި ދެމިއޮތުމަށާއި، ޑިޖިޓަލައިޒޭޝަންގެ މަސައްކަތުގައި މީރާ ވާންވާނީ އެންމެ ކުރީގައި އޮންނަ މުއައްސަސާއަށް ކަމުގައި މިނިސްޓަރު އިލްތިމާސްކުރެއްވިއެވެ.
މީގެ އިތުރުން، މި ސިސްޓަމްގެ ސަބަބުން ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތަކަށް ބޮޑެތި ފައިދާތަކެއް ކުރާނެކަން ފާހަގަކުރައްވައި މިނިސްޓަރު ވިދާޅުވީ، ޚާއްޞަކޮށް އަމިއްލަ ޕްރޮޕަޓީ މެނޭޖްމަންޓް ސިސްޓަމެއް ނެތް ގެސްޓްހައުސްތަކާއި ކުދި ވިޔަފާރިތަކަށް، ފަތުރުވެރިންގެ މައުލޫމާތު ބެލެހެއްޓުމަށް މި ފުރިހަމަ ޕްލެޓްފޯމަކީ ވަރަށް ބޮޑު އެހީއަކަށް ވާނެ ކަމަށެވެ.
ފިނޭންސް މިނިސްޓަރު ވަނީ މިފަދަ ފުރިހަމަ ނިޒާމެއް ކުރު މުއްދަތެއްގެ ތެރޭގައި ގާއިމުކުރެވުނީ ކަމާގުޅޭ މުއައްސަސާތަކުގެ ވަރަށް ބޮޑު އެއްބާރުލުމަކާއެކު ކަމަށް ވިދާޅުވެފައެވެ. އެގޮތުން، ކޮންޓްރޯލަރ ޖެނެރަލް އޮފް އިމިގްރޭޝަން، ކޮމިޝަނަރ އޮފް ޕޮލިސް (ރިޓަޔާޑް) އަހުމަދު ފަސީހް ފޯރުކޮށްދެއްވި ފުރިހަމަ އެއްބާރުލުން ހާއްސަ ގޮތެއްގައި ފާހަގަކުރައްވައި މިނިސްޓަރު ވަނީ ޝުކުރު އަދާކުރައްވާފައެވެ. އަދި މި ވިއުގަ ފަރުމާކުރުމާއި ގާއިމުކުރުމުގައި މީރާގެ މުވައްޒަފުން ކުރެއްވި ފަންނީ އަދި އިހްލާސްތެރި މަސައްކަތްތަކަށް ވެސް މިނިސްޓަރުގެ ވާހަކަފުޅުގައި ވަނީ ތައުރީފުކުރައްވާފައެވެ.
