މިނިސްޓާ އޮފް ފިނޭންސް އެންޑް ޕަބްލިކް އެންޓަޕްރައިސަސް ހަސަން ޒަރީރު، ގަތަރުގެ ވެރިރަށް ދޯހާގައި މާލީ އަދި ތަރައްގީގެ ދާއިރާއާ ގުޅުންހުރި މުހިންމު އިސްވެރިންތަކަކާ ބައްދަލުކުރައްވައި، ރާއްޖެއަށް ބޭނުންވާ އެކި ދާއިރާތަކުން ގުޅުން ބަދަހިކުރުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރައްވައިފިއެވެ.
ްަގަތަރަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން، މިނިސްޓަރު ޒަރީރު ވަނީ ގަތަރު ނޭޝަނަލް ބޭންކް (ކިއުއެންބީ) ގެ ގްރޫޕް ޗީފް އެގްޒެކެޓިވް އޮފިސާ އަބްދުﷲ މުބާރަކް އަލް-ހަލީފާއާ ބައްދަލުކުރައްވާފައެވެ. މި ބައްދަލުކުރެއްވުމުގައި މައިގަނޑު ގޮތެއްގައި މަޝްވަރާކުރެވުނީ ދެގައުމުގެ ދެމެދުގައިވާ މާލީ އެއްބާރުލުން އިތުރަށް ހަރުދަނާކުރުމާއި، އިންވެސްޓްމަންޓް އަދި ތަރައްގީގެ އެކި ދާއިރާތަކުން ގުޅުން ބަދަހިކުރެވިދާނެ ފުރުސަތުތަކާ ގުޅޭގޮތުންނެވެ. އަދި ދިގު މުއްދަތަކަށް ދެމިގެންދާނެ ފަދަ ދެމެހެއްޓެނިވި އިގްތިސާދީ ކުރިއެރުމާއި ތަރައްގީއަށް އެއްބާރުލުން ދިނުމުގެ ގޮތުން އިގްތިސާދީ ގުޅުން ފުޅާކުރުމާ ގުޅޭގޮތުން ވެސް ވާހަކަދެކެވުނެވެ.
މީގެއިތުރުން، މިނިސްޓަރު ޒަރީރު ވަނީ ގަތަރުގެ ފިނޭންސް މިނިސްޓާ އަލީ ބިން އަހްމަދު އަލް ކުވާރީއާ ވެސް ބައްދަލުކުރައްވާފައެވެ. މި ބައްދަލުކުރެއްވުމުގައި ދެ ގައުމުގެ ދެމެދުގައި އޮތް އިގްތިސާދީ އަދި ވިޔަފާރީގެ ގުޅުން އިތުރަށް ވަރުގަދަކުރުމަށާއި، އަމިއްލަ ވިޔަފާރިތައް ކުރިއެރުވުމަށް ހުރި ފުރުސަތުތަކުގެ އިތުރުން، އިންވެސްޓްމަންޓްގެ އައު ދާއިރާތައް ހޯދުމާ ގުޅޭގޮތުން މަޝްވަރާކުރެއްވިއެވެ.
ހަމައެއާއެކު، ދޯހާގައި ބޭއްވުނު 2026 ވަނަ އަހަރުގެ އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކް (އޭއައިއައިބީ) ގެ އަހަރީ ބައްދަލުވުމުގެ ހަވާސާގައި، މިނިސްޓާ ވަނީ އޯޕެކް ފަންޑުގެ ރައީސް ޑރ. އަބްދުލްހަމީދު އަލްހަލީފާއާ ބައްދަލުކުރައްވާފައެވެ. މި ބައްދަލުވުމުގައި "ކަންޓްރީ ޕާޓްނަޝިޕް ފްރޭމްވަރކް އެގްރީމަންޓް" ގެ ދަށުން އެއްބާރުލުން ދެވިދާނެ ދާއިރާތަކާއި، "އިމަޖެންސީ ލައިން އޮފް ކްރެޑިޓް" ފެސިލިޓީއެއް ގާއިމުކުރުމުގެ މުހިންމުކަމާ ގުޅޭގޮތުން މަޝްވަރާކުރެވުނެވެ. އަދި ރާއްޖޭގެ ދެމެހެއްޓެނިވި ތަރައްގީއަށް މުހިންމު ފެނާއި ނަރުދަމާ، އަދި ބަނދަރާއި ފަޅު ފުންކުރުން ފަދަ ބޮޑެތި މަޝްރޫއުތަކުގައި ގުޅިގެން މަސައްކަތްކުރުމާ ގުޅޭގޮތުން ވެސް ވާހަކަދެއްކެވިއެވެ.
އަދި ހަމަ މި ބައްދަލުވުމުގެ ހަވާސާގައި ކުވައިތުގެ ފިނޭންސް މިނިސްޓާ ޑރ. ޔައުގޫބް އަލް ސައްޔިދު އަލް ރިފާއީއާ ބައްދަލުކުރައްވައި، ސިއްހީ ދާއިރާއާއި ގޮނޑުދޮށް ހިމާޔަތްކުރުން ފަދަ މުހިންމު ދާއިރާތަކުން މިހާރު ކުރިއަށްދާ މަސައްކަތްތަކާ ގުޅޭގޮތުންނާއި، ކުވައިތު ސާުކާރާއި ކުވައިތު ފަންޑް މެދުވެރިކޮށް ރާއްޖޭގައި ކުރިއަށް ރޭވިފައިވާ ތަރައްގީގެ މަޝްރޫއުތައް އިތުރަށް ހަރުދަނާކުރުމާ ގުޅޭގޮތުން ވެސް މިނިސްޓާ ޒަރީރު ވަނީ މަޝްވަރާކުރައްވާފައެވެ.
މި ބައްދަލުވުންތައް ކުރިއަށްގޮސްފައިވަނީ ދޯހާގައި ބޭއްވުނު 2026 ވަނަ އަހަރުގެ އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކް (އޭއައިއައިބީ) ގެ އަހަރީ ބައްދަލުވުމުގައި ބައިވެރިވުމަށް މިނިސްޓާ އޮފް ފިނޭންސް އެންޑް ޕަބްލިކް އެންޓަޕްރައިސަސް ހަސަން ޒަރީރު ގަތަރަށް ކުރައްވާ ދަތުރުފުޅުގެ ތެރެއިންނެވެ.
ދިވެހިރާއްޖެއާއި ގަތަރާ ދެމެދު ހާރިޖީ ގުޅުން ގާއިމުކޮށްފައިވަނީ 26 މޭ 1984 ގައެވެ.
