ވެލާނާ އިންޓަނޭޝަނަލް އެއާޕޯޓު (ވީއައިއޭ) ގައި "މޯލްޑިވިއަން" އިން ހިންގާ ސީޕްލޭން ޓާމިނަލް އިތުރަށް ތަރައްގީކޮށް، ރަސްމީކޮށް ހުޅުވައިފިއެވެ.
މި ޓާމިނަލް ރަސްމީކޮށް ހުޅުއްވައިދެއްވީ ޓޫރިޒަމް މިނިސްޓަރު މުހައްމަދު އަމީންއެވެ.
މިކަމާ ގުޅިގެން ޓޫރިޒަމް މިނިސްޓްރީން ބުނީ ސީޕްލޭން ޓާމިނަލްގައި ފުޅާދާއިރާއެއްގައި ހިދުމަތް ދެވޭނެހެން "ހުވަނދުމާ ލައުންޖް" ގެ ޖާގަ ބޮޑުކުރެވިފައިވާކަމަށާއި، ފުރަންދާ ފަރާތްތަކަށް ފަސޭހަކަމާއެކު މަޑުކޮށްލައިގެން ތިބެވޭނެހެން އައުޓްޑޯ ސަރަހައްދު ވެސް ބޮޑުކުރެވިފައިވާކަމަށެވެ.
މީގެއިތުރުން ފަސިންޖަރުންނަށް ފަސޭހައިން ވަދެވޭނެ އާ އެންޓްރެންސްއަކާއި ކުޑަކުދިން ގޮވައިގެން ދަތުރުކުރާ އާއިލާތަކަށް ހާއްސަ ކުޑަކުދިން ކުޅޭނެ ސަރަހައްދެއް ގާއިމުކުރެވިފައިވާކަމަށް ޓޫރިޒަމް މިނިސްޓްރީން ވަނީ ބުނެފައެވެ.
ޓޫރިޒަމް މިނިސްޓްރީން ބުނީ ޓާމިނަލްގެ ހިދުމަތްތައް އަވަސްކުރުމަށް އިތުރު ވީއައިޕީ ބޯޑިން ގޭޓެއް ވެސް ގާއިމުކުރެވިފައިވާކަމަށެވެ.
ރާއްޖެއަކީ ދުނިޔޭގައި ވެސް އެންމެ ބޮޑު ސީޕްލޭން އޮޕަރޭޝަން ހިންގާ ގައުމަށްވާއިރު، ރިސޯޓުތަކަށް ދަތުރުކުރާ ފަތުރުވެރިންގެ ދަތުރުގެ އިތުރަށް ފުރިހަމަކޮށް، އަރާމު އަދި ފަސޭހަ ހިދުމަތެއް ފޯރުކޮށްދިނުމަކީ ސަރުކާރުން ސިވިލް އޭވިއޭޝަން ދާއިރާ ހަރުދަނާކުރުމަށް ކުރަމުންދާ މަސައްކަތުގެ މުހިންމު ބައެކެވެ.
މި ބަދަލުތަކާއެކު މޯލްޑިވިއަން ސީޕްލޭން މެދުވެރިކޮށް ދަތުރުކުރާ ފަސިންޖަރުންނަށް ޓާމިނަލްގައި ހޭދަކުރާ ވަގުތު އިތުރަށް ފުރިހަމަވެ، ލުއިފަސޭހަތަކެއް ލިބިގެންދާނެކަމަށް މޯލްޑިވިއަން އިން ވަނީ ބުނެފައެވެ.
